របបខ្មែរក្រហមបានឡើងកាន់អំណាចនៅថ្ងៃទី ១៧ មេសា ឆ្នាំ ១៩៧៥ ហើយត្រូវទំលាក់ចុះពីអំណាចនៅថ្ងៃទី ៧ មករា ឆ្នាំ ១៩៧៩ ។ ប្រជាជន ជាង ៣ លាននាក់ បានបាត់បង់ជីវិត ។ សង្គ្រាមស៊ីវិលបានបន្ដ ក្រោយពី ការដួលរលំនៃរបបខ្មែរក្រហម ។ នៅទីបំផុត សង្គ្រាមស៊ីវិលបានត្រូវបញ្ចប់ នៅឆ្នាំ ១៩៩៨ នៅពេលដែលរចនាសម្ព័ន្ធនយោបាយ និងយោធារបស់ ខ្មែរក្រហមត្រូវកំទេចចោល។
នៅឆ្នាំ ១៩៩៧ រាជរដ្ឋាភិបាលកម្ពុជា បានសំណូមពរអោយអង្គការ សហប្រជាជាតិជួយឧបត្ថម្ភបង្កើតសាលាជម្រះក្ដី ដើម្បីកាត់ទោស មេដឹកនាំ ជាន់ខ្ពស់ខ្មែរក្រហម។
នៅឆ្នាំ ២០០១ រដ្ឋសភាជាតិកម្ពុជា បានអនុម័ត ច្បាប់មួយ ដើម្បីបង្កើតតុលាការកាត់សេចក្ដីឧក្រិដ្ឋកម្មដែលបានប្រព្រឹត្ដឡើងនៅ ប្រទេសកម្ពុជាក្នុងអំឡុងពេលរបបខ្មែរក្រហមពីឆ្នាំ ១៩៧៥-១៩៧៩ ។ តុលាការនេះមានឈ្មោះថា អង្គជំនុំជម្រះវិសាមញ្ញ ក្នុងតុលាការកម្ពុជា ដើម្បីកាត់សេចក្ដីឧក្រិដ្ឋកម្មដែលបានប្រព្រឹត្ដឡើងក្នុងរបបកម្ពុជាប្រជាធិបតេយ្យ (អង្គជំនុំជម្រះវិសាមញ្ញ ) ។
រាជរដ្ឋាភិបាលកម្ពុជាបានទទូចសុំថា ដើម្បីជាផលប្រយោជន៍ដល់ ប្រជាជនកម្ពុជាទាំងអស់ តុលាការជម្រះក្ដី ត្រូវប្រព្រឹត្ដទៅនៅក្នុងប្រទេសកម្ពុជា ដោយប្រើប្រាស់មន្ដ្រី និងចៅក្រមកម្ពុជា គួបផ្សំជាមួយមន្ដ្រី និងចៅក្រម អន្ដរជាតិ។ កម្ពុជាបាន អញ្ជើញសហគមន៍ អន្ដរជាតិអោយចូលរួមសហការ ក្នុងការកាត់សេចក្ដីនេះ ដើម្បីធានាអោយមានយុត្ដិធម៌ជាលក្ខណៈស្ដង់ដារ អន្ដរជាតិ ព្រោះកម្ពុជាយល់ឃើញថា ខ្លួននៅទន់ខ្សោយផ្នែកតុលាការ និងចរិត លក្ខណៈអន្ដរជាតិនៃឧក្រិដ្ឋកម្ម ។ ចុងបញ្ចប់ កិច្ចព្រមព្រៀងមួយជាមួយ អង្គការសហប្រជាជាតិ ត្រូវបានចុះហត្ថលេខានៅខែ មិថុនា ឆ្នាំ ២០០៣ ដែលចែងថា តើសហគមន៍អន្ដរជាតិនឹងជួយឧបត្ថម្ភ និងសហការរបៀប ដូចម្ដេចនៅក្នុងអង្គជំនុំជម្រះវិសាមញ្ញនេះ ។
តុលាការថ្មី ហើយពិសេសនេះ ត្រូវបានបង្កើតឡើងដោយរាជរដ្ឋាភិបាល កម្ពុជា និង អង្គការសហប្រជាជាតិ ប៉ុន្ដែតុលាការនេះ គឺឯករាជ្យម្ចាស់ការ មិនចំណុះអោយរាជរដ្ឋាភិបាល ឬអង្គការសហប្រជាជាតិទេ ។ តុលាការនេះ គឺជាតុលាការកម្ពុជា ដែលមានការចូលរួមពី សហគមន៍អន្ដរជាតិ ដែលនឹងអនុវត្ដ ទៅតាមស្ដង់ដារអន្ដរជាតិ ។ តុលាការនេះ នឹងផ្ដល់ជាគំរូតួនាទីថ្មីមួយសំរាប់ ដំណើរការកាត់ក្ដីនៅកម្ពុជា ។ នៅពេលដែលកិច្ចព្រមព្រៀងរបស់ អង្គការ សហប្រជាជាតិ និង រាជរដ្ឋាភិបាលកម្ពុជា ត្រូវបានផ្ដល់សច្ចាប័ន (អនុម័ត យល់ព្រម) ពីរដ្ឋសភាជាតិកម្ពុជា នោះតុលាការនេះ នឹងត្រូវបង្កើតទ្បើង នៅកម្ពុជា ។ បន្ទាប់មក គេនឹងបើក ការិយាល័យរដ្ឋបាលមួយ ដើម្បីពិភាក្សាបង្កើត អង្គជំនុំជម្រះវិសាមញ្ញ ហើយនឹងចាប់ផ្ដើមការត្រៀមរៀបចំ ដំណើរការកាត់ក្ដីជាផ្លូវការ ។
គេហទំព័រនេះ នឹងណែនាំបំភ្លឺលោកអ្នកអំពី អង្គជំនុំជម្រះវិសាមញ្ញ ហើយឆ្លើយតបទៅនឹង សំណួរមួយចំនួន ដែលប្រជាជន ឧស្សាហ៍សាកសួរអំពី ការជំនុំជម្រះក្ដីនេះ ។ ពេលដែល អង្គជំនុំជម្រះវិសាមញ្ញ ត្រូវបានបង្កើតឡើង ផ្នែកពិសេសមួយ នៃប្រព័ន្ធផ្សព្វផ្សាយ នឹងផ្ដល់ជូនព័ត៌មានដល់សាធារណជន ។
រចនាសម្ព័ន
ការិយាល័យរដ្ឋបាលនៃ អង្គជំនុំជម្រះវិសាមញ្ញ មានតួនាទីផ្ដល់សេវាកម្មដល់ អង្គបុរេជំនុំជម្រះ សហចៅក្រមស៊ើបអង្កេត ការិយាល័យសហព្រះរាជអាជ្ញា និង ការិយាល័យផ្សេងទៀត ។
បដិរូប
បដិរូប តំណាងអោយអង្គជំនុំជម្រះវិសាមញ្ញ ដោយមានការពណ៌នា រួមមួយនូវការគ្រប់គ្រងនៃ តុលាការកម្ពុជា ក្នុងសម័យបុរាណអង្គរ និង អមកួរផ្លែអូលីវ ជាសញ្ញារបស់ អង្គការសហប្រជាជាតិ ដែលតំណាងអោយ សន្ដិភាព ។ ពណ៌ជាផ្លូវការ គឺខៀវចាស់ ។ រូបនេះអង្គុយលើក្រណាត់តេអ៊ី ហើយកាន់ដាវមួយ ដើម្បីតំណាងអោយ អំណាចតុលាការ ។ វាគឺជារូបតាំងលើជញ្ជាំងកណ្ដាលគេ នៅកន្លែងអតីត តុលាការឧទ្ធរណ៍ ក្នុងក្រសួងយុត្ដិធម៌នៅទីក្រុងភ្នំពេញ ។ រូបនោះ អមដោយ អ្នកជំនួយការពីរនាក់ ដែលកំពុងអះអាងច្បាប់ ដែលបានចារដោយដៃលើ ស្លឹករឹត ។ ត្រាជាផ្លូវការបង្ហាញពី បដិរូបព័ទ្ធដោយរង្វង់ពីរដែលសរសេរឈ្មោះ ពេញជាអក្សរខ្មែរ
អង្គជំនុំជម្រះវិសាមញ្ញក្នុងតុលាការកម្ពុជា និងអក្សរកាត់ ជាភាសាអង់គ្លេស ECCC, (Extraordinary Chambers in the Courts of Cambodia) ជាភាសាបារាំង CETC (Chambres extraordinaries au sein des Tribunaux Cambodgiens)
