កិច្ច​ប្រជុំ​ពេញ​អង្គ​លើក​ទី​១១ ​របស់​អ​.​វ.​ត.​ក ​នឹង​ប្រ​ព្រឹត្ត​ទៅ​នៅ​ថ្ងៃ​ទី​១៦ ​ខែ​តុលា​ ឆ្នាំ ​២០១​៤​​

អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងបើកកិច្ចប្រជុំពេញអង្គលើកទី១១ របស់ខ្លួននៅថ្ងៃទី ១៦ ខែតុលា ឆ្នាំ ២០១៤។ កិច្ចប្រជុំពេញអង្គនេះនឹងពិភាក្សាលើសំណើសុំធ្វើវិសោធនកម្មទៅលើវិធានផ្ទៃក្នុងចំនួន ៤ ចំណុច ដែលផ្តល់អនុសាសន៍ដោយគណៈកម្មាធិការវិធានផ្ទៃក្នុង និងនីតិវិធីឈរលើមូលដ្ឋាននៃសំណើរបស់ការិយាល័យសហព្រះរាជអាជ្ញា និងអង្គភាពគាំពារជនរងគ្រោះ។ នៅក្នុងកិច្ចប្រជុំពេញអង្គលើកទី១១ នេះដែរ ចៅក្រម ម៉ាទីន ខារ៉ុបគីន នឹងត្រូវស្បថចូលកាន់តំណែងជាចៅក្រមស៊ើបអន្តរជាតិបម្រុងនៃអង្គជំនុំជម្រះសាលាដំបូង ហើយ លោក អូលីវីយ៉េ បូវ៉ាល់ឡេ នឹងស្បថចូលកាន់តំណែងជាសហចៅក្រមស៊ើបអង្កេតអន្តរជាតិបម្រុង។

អ.វ.ត.ក សូមអញ្ជើញតំណាងសារព័ត៌មានទាំងអស់មកចូលរួមក្នុងពិធីបើកកិច្ចប្រជុំពេញអង្គនេះ ដែលនឹង ចាប់ផ្តើមនៅវេលាម៉ោង ៩ព្រឹក ថ្ងៃព្រហស្បតិ៍ ទី១៦ ខែតុលា ឆ្នាំ ២០១៤ នៅសាលសវនាការរបស់អវតក។ សុន្ទរកថាបើកកិច្ចប្រជុំពេញអង្គនេះនឹងត្រូវថ្លែងដោយ ឯកឧត្តម គង់ ស្រ៊ីម ប្រធានកិច្ចប្រជុំពេញអង្គ និងលោកចៅ
ក្រម ចាងហូ ជុង អនុប្រធានកិច្ចប្រជុំពេញអង្គ។

អ.វ.ត.ក នឹងចេញសេចក្តីប្រកាសព័ត៌មានមួយនៅថ្ងៃដដែលនេះ បន្ទាប់ពីបញ្ចប់កិច្ចប្រជុំពេញអង្គ។