ករណី​ ០០២

សំណុំរឿង០០២ ជាសំណុំរឿងទី២នៅចំពោះមុខអង្គជំនុំជម្រះវិសាមញ្ញក្នុងតុលាការ ប្រឆាំងនឹងជនជាប់ចោទចំនួនបួនរូប។

នួន ជា អាយុ៨៤ឆ្នាំ អតីតអនុលេខាបក្សកុម្មុយនីស្តកម្ពុជា

អៀង សារី អាយុ៨៥ឆ្នាំ អតីតរដ្ឋមន្រ្តីក្រសួងការបរទេស

ខៀវ សំផន អាយុ៧៩ឆ្នាំ អតីតប្រមុខរដ្ឋកម្ពុជាប្រជាធិបតេយ្យ

អៀង ធីរិទ្ធ អាយុ៧៨ឆ្នាំ អតីតរដ្ឋមន្រ្តីក្រសួងសង្គមកិច្ច

ជនជាប់ចោទទាំង៤រូប ត្រូវបានចោទប្រកាន់លើកដំបូង និងត្រូវបានបង្គាប់ឲ្យបញ្ជូនទៅជំនុំជម្រះក្តីតាមរយៈដីកាបញ្ជូនរឿងទៅជំនុំជម្រះរបស់សហចៅក្រមស៊ើបអង្កេត នៅថ្ងៃទី ១៥ ខែ កញ្ញា ឆ្នាំ ២០១០។ ក្រោយពីទទួលបានបណ្តឹងឧទ្ធរណ៍ពីជនជាប់ចោទទាំងបួនរូប អង្គបុរេជំនុំជម្រះបានបញ្ជាក់គាំទ្រ និងធ្វើការកែប្រែផ្នែកខ្លះក្នុងដីកាបញ្ជូនរឿងទៅជំនុំជម្រះ និងចេញសាដីកាចុះថ្ងៃទី ១៣ ខែ មករា ឆ្នាំ ២០១១ បង្គាប់ឲ្យបញ្ជូនសំណុំរឿងទៅជំនុំជម្រះ ។

ជនជាប់ចោទទាំងបួនរូបត្រូវបានចោទពីបទឧក្រិដ្ឋកម្មប្រឆាំងនឹងមនុស្សជាតិ ការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងបទប្រល័យពូជសាសន៍ និងអំពើមនុស្សឃាត ការធ្វើទារុណកម្ម និងការធ្វើទុក្ខបុកម្នេញខាងផ្នែកសាសនា ក្រោមក្រមព្រហ្មទណ្ឌកម្ពុជា ឆ្នាំ១៩៥៦។

គេរំពឹងថា សវនាការជំនុំជម្រះក្តីនឹងចាប់ផ្តើមនៅក្នុងឆមាសដំបូងក្នុងឆ្នាំ២០១១។