យុវជនចំនួនជាង ២០០ នាក់ មកពីស្រុកស្វាយអន្ទរ ខេត្តព្រៃវែង បានចូលរួមក្នុងកម្មវិធីទស្សនកិច្ចសិក្សាដែលរៀបចំឡើងនៅថ្ងៃពុធ ទី០១ ខែមីនា ឆ្នាំ២០២៣ ដោយសាលាក្ដីខ្មែរក្រហម។ យុវជនទាំងនោះបានបញ្ជាក់ថា មូលហេតុដែលពួកគាត់ចំណាយពេលវេលាដើម្បីចូលរួមក្នុងកម្មវិធីទស្សនកិច្ចទីតាំងឧក្រិដ្ឋកម្មបន្សល់ទុកពីរបបខ្មែរក្រហមនេះ គឺពួកគាត់ចង់ស្វែងយល់ឱ្យកាន់តែច្រើន និងចងចាំពីអ្វីដែលបានកើតមានឡើងនៅក្នុងទីតាំងទាំងនោះ។ យុវជនទាំងនោះបានបន្ថែមថា លើសពីការយល់ដឹង ទស្សនកិច្ចនេះក៏មានសារៈសំខាន់ក្នុងការរួមចំណែកទប់ស្កាត់មិនឱ្យរបបប្រល័យពូជសាសន៍ខ្មែរក្រហមកើតមានឡើងជាថ្មីក្នុងទឹកដីកម្ពុជាទៀតផងដែរ។
លោក ហៃ សំណាង តំណាងយុវជនចូលរួមក្នុងកម្មវិធីទស្សនកិច្ចនេះបាននិយាយថា យុវជនទាំងអស់មានការចាប់អារម្មណ៍យ៉ាងខ្លាំង ដែលបានមកចូលរួមទស្សនកិច្ចនៅទីតាំងប្រវត្តិសាស្ដ្ររបស់កម្ពុជា បន្សល់ទុកដោយរបបខ្មែរក្រហម។ ប្រធានក្រុមដឹកនាំយុវជនរូបនេះបន្ថែមថា ទស្សនកិច្ចនេះបានផ្ដល់ឱ្យយុវជនបានឃើញទិដ្ឋភាពជាក់ស្ដែង និងយល់ដឹងច្រើនក្រោយពេលបានស្ដាប់ការពន្យល់ និងបកស្រាយពីមន្ដ្រីពាក់ព័ន្ធនូវតាមទីតាំងនីមួយៗ។ លោកថា កម្មវិធីនេះនឹងផ្ដល់ឱ្យយុវជនបានចងចាំនូវអ្វីដែលរបបខ្មែរក្រហមបានប្រព្រឹត្តលើប្រជាពលរដ្ឋកម្ពុជា ហើយពួកគាត់បានប្ដេជ្ញាថានឹងចូលរួមការពារសន្ដិភាព និងទប់ស្កាត់មិនឱ្យរបបប្រល័យពូជសាសន៍នេះកើតមានជាថ្មីម្ដងទៀតនោះទេ។
ក្នុងដំណើរទស្សនកិច្ចសិក្សាដែលរៀបចំឡើងដោយអង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្ដីខ្មែរក្រហមនៅថ្ងៃនេះ យុវជនទាំងអស់ បានទស្សនកិច្ចសិក្សាសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះ រួមនឹងមានបទបង្ហាញមន្ដ្រីមកពីសាលាក្ដីខ្មែរក្រហម អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យផងដែរ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ យុវជនទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញដំណើការជំនុំជម្រះក្តីលើអតីតមេដឹកនាំខ្មែរក្រហម ការធ្វើទារុណកម្មយ៉ាងព្រៃផ្សៃ ការកាប់សម្លាប់ប្រជាពលរដ្ឋកម្ពុជាដោយពួកខ្មែរក្រហម និងការពលីរបស់ថ្នាក់ដឹកនាំកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
