ការិយាល័យសហមេធាវីនាំមុខតំណាងដើមបណ្តឹងរដ្ឋប្បវេណី
ការិយាល័យសហមេធាវីនាំមុខតំណាងដើមបណ្តឹងរដ្ឋប្បវេណីត្រូវបានបង្កើតឡើងស្របតាមមាត្រា១២ និង មាត្រា១២ (ស្ទួន) នៃវិធានផ្ទៃក្នុងរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ការិយាល័យ នេះបំពេញការងារដោយឯករាជ្យ ដើម្បីផលប្រយោជន៍របស់ដើមបណ្តឹងរដ្ឋប្បវេណី។
ការិយាល័យសហមេធាវីនាំមុខតំណាងដើមបណ្តឹងរដ្ឋប្បវេណីមានសហមេធាវីនាំមុខជាតិម្នាក់និងមេធាវីនាំមុខអន្តរជាតិម្នាក់ ហើយអ្នកទាំងពីរនេះគាំទ្រដោយបុគ្គលិកច្បាប់និងអ្នកគ្រប់គ្រងសំណុំរឿង។ អ្នកទាំងពីរត្រូវតែ ធ្វើការរួមគ្នានៅគ្រប់បញ្ហាទាំងអស់ លើកលែងតែអ្នកទាំងពីរសម្រេចចិត្តរួមគ្នាថាប្រគល់សិទ្ធិទៅឲ្យ សហមេធាវីនាំមុខណាម្នាក់ទទួលខុសត្រូវការងារណាមួយដោយចំពោះ។
សហមេធាវីនាំមុខតំណាងដើមបណ្តឹងរដ្ឋប្បវេណី ត្រូវធានាប្រសិទ្ធិភាពនៃការរៀបចំតំណាងសម្រាប់ដើម បណ្តឹងរដ្ឋប្បវេណីក្នុងអំឡុងពេលសវនាការនិងបន្ទាប់ពីសវនាការ។ ការទទួលខុសត្រូវជាចម្បងរបស់សហ មេធាវីនាំមុខតំណាងដើមបណ្តឹងរដ្ឋប្បវេណីនៅក្នុងតុលាការគឺ ស្វែងរកការគាំទ្រសាធារណៈ រៀបចំយុទ្ធសាស្រ្ត សម្រាប់ការធ្វើជាតំណាងផលប្រយោជន៍របស់ក្រុមដើមបណ្តឹងរដ្ឋប្បវេណីក្នុងអំឡុងពេលសវនាការនិងបន្ទាប់ពីសវនាការ។ សហមេធាវីនាំមុខតំណាងដើមបណ្តឹងរដ្ឋប្បវេណីធ្វើការងារក្រោមកិច្ចសហការជិតស្និទ្ធជាមួយ នឹងមេធាវីដើមបណ្តឹងរដ្ឋប្បវេណីដែលតំណាងឲ្យដើមបណ្តឹងរដ្ឋប្បវេណីដែលត្រូវបានទទួលស្គាល់ដោយ តុលាការ។ មេធាវីដើមបណ្តឹងរដ្ឋប្បវេណីគាំទ្រសហមេធាវីនាំមុខសម្រាប់ដើមបណ្តឹងរដ្ឋប្បវេណី ក្នុងការធ្វើជា តំណាងផលប្រយោជន៍ក្រុមផ្សេងៗគ្នានៃដើមបណ្តឹងរដ្ឋប្បវេណី។ ការគាំទ្រទាំងនេះរួមទាំងការធ្វើពាក្យបណ្តឹងសរសេរនិងផ្ទាល់មាត់ ការវិភាគកូនក្តីនិងសាក្សី និងសកម្មភាពផ្សេងៗទៀតដែលទាក់ទងនឹងនីតិវិធីតុលាការ។
ភាពខុសគ្នារវាងសហមេធាវីនាំមុខតំណាងដើមបណ្តឹងរដ្ឋប្បវេណី និង មេធាវីតំណាងដើមបណ្តឹងរដ្ឋប្បវេណី
មុនពេលមានសវនាការ ដើមបណ្តឹងរដ្ឋប្បវេណីចូលរួមក្នុងដំណើរការតុលាការជាលក្ខណៈបុគ្គល ហើយពួក គាត់មានសិទ្ធិទទួលបានមេធាវីធ្វើជាតំណាង។
នៅពេលដែលសំណុំរឿងក្តីឈានដល់ដំណាក់កាលសវនាការ ដើមបណ្តឹងរដ្ឋប្បវេណីនឹងត្រូវរួមបញ្ចូលគ្នា ជាក្រុមៗហើយតំណាងដោយសហមេធាវីនាំមុខតំណាងដើមបណ្តឹងរដ្ឋប្បវេណី។ នៅក្នុងដំណាក់កាលនេះ មេធាវីតំណាងដើមបណ្តឹងរដ្ឋប្បវេណីនឹងដើរតួនាទីជាភ្នាក់ងារសម្រាប់ភ្ជាប់ទំនាក់ទំនងរវាងដើមបណ្តឹង រដ្ឋប្បវេណីម្នាក់ៗ និងផ្តល់ជំនួយដល់សហមេធាវីនាំមុខតំណាងដើមបណ្តឹងរដ្ឋប្បវេណី។
សហមេធាវីនាំមុខតំណាងដើមបណ្តឹងរដ្ឋប្បវេណី
លោក ពេជ្រ អង្គ (កម្ពុជា)
លោក ពេជ្រ អង្គ មានសញ្ញាប័ត្រអនុបណ្ឌិតច្បាប់ផ្នែកសិទ្ធិមនុស្សនិងសិទ្ធិឯកជន និងបរិញ្ញាប័ត្រច្បាប់មកពី ទីក្រុងលីយ៉ុង ប្រទេសបារាំង។ មុនពេលទទួលបានការតែងតាំងក្នុងតួនាទីនេះ លោកគឺជាមេធាវីតំណាងដើម បណ្តឹងរដ្ឋប្បវេណី។ លោកធ្លាប់ជាគ្រូបង្រៀននៅសាកលវិទ្យាល័យនីតិសាស្រ្តនិងវិទ្យាសាស្រ្តសេដ្ឋកិច្ច និង សាកលវិទ្យាល័យបៀលប្រាយ។ លោកក៏ជាមេធាវីនៅគណៈមេធាវីអន្តរជាតិកម្ពុជា និងជំនួយការច្បាប់នៅ ក្រសួងកិច្ចការនារី។
លោកស្រី អេលីហ្សាប៊ែត ស៊ីម៉ុងណូ ហ្វត (Elisabeth Simondnau Fort) (បារាំង)
លោកស្រី ស៊ីម៉ុងណូ ហ្វត បានទទួលសញ្ញាប័ត្រផ្នែកច្បាប់ពីសាកលវិទ្យាល័យ ប៉ារីស II អាសាស និង សាកលវិទ្យាល័យ ប៉ារីស X ណង់ទែរ។ លោកស្រីមានបទពិសោធន៍ជាង៣០ឆ្នាំជាមេធាវីនៅ ម៉ុងប៉េលីយើ។ ក្នុងអំឡុងពេលនេះ លោកស្រីបានការពារសិទ្ធិជនរងគ្រោះ ដោយផ្តោតជាពិសេសទៅលើសិទ្ធិស្រ្តីនិងកុមារ នៅតុលាការព្រហ្មទណ្ឌជាច្រើន។ លោកស្រី ស៊ីម៉ុងណូ ហ្វត ជាសមាជិកនៃក្រុមអ្នកបង្កើតសមាគម “អ្នកច្បាប់និងកុមារ” (L’ Avocat et l’ Enfant) និងធ្លាប់ជាសមាជិកក្រុមមេធាវីផ្តល់សេវាស្ម័គ្រចិត្តដល់ ឧក្រិដ្ឋជនដែលជាអនីតិជន។