មន្ដ្រីយុត្តិធម៌មូលដ្ឋាន៨០រូបទស្សនកិច្ច និងសិក្សាស្វែងយល់អំពីសេវាយុត្តិធម៌របស់សាលាក្ដីខ្មែរក្រហម

បើទោះបីជាសាលាក្ដីខ្មែរក្រហមមិនបើកសវនាការ ប៉ុន្ដែផ្នែកកិច្ចការសាធារណៈនៃសាលាក្ដីខ្មែរក្រហមនៅតែមមាញឹករៀបចំឲ្យមានដំណើរ ទស្សនកិច្ចរបស់សាធារណៈជនទៅកាន់សាលាក្ដីខ្មែរក្រហមរៀងរាល់សប្ដាហ៍។ ជាក់ស្ដែងនៅរសៀលថ្ងៃសុក្រ ទី២០ ខែមករា ឆ្នាំ ២០១៧មានមន្ដ្រីមណ្ឌលសេវាកម្មយុត្ដិធម៌ ក្រុង ស្រុក ខណ្ឌ ចំនួន៨០រូប បានធ្វើដំណើរទៅទស្សនកិច្ចសិក្សាស្វែងយល់អំពីការផ្ដល់សេវាយុត្តិធម៌ និងដំណើរការរបស់សាលាក្ដីខ្មែរក្រហម។ ទស្សនកិច្ចសិក្សានេះធ្វើឡើងតាមរយៈការរៀបចំរបស់នាយកដ្ឋានសន្ធានកម្ម និងយុត្តិធម៌មូលដ្ឋាននៃក្រសួងយុត្តិធម៌ សហការជាមួយផ្នែកកិច្ចការសាធារណៈរបស់អង្គជំនុំជម្រះវិសាមញ្ញក្នុងតុលាការកម្ពុជា។ 

ជាការចាប់ផ្ដើម អ្នកចូលរួមបានទស្សនាវីឌីអូសង្ខេបស្តីពីដំណើរការសវនាការទាក់ទងនឹងសំណុំរឿង ០០២ វគ្ក០២ ដែលតុលាការនេះកំពុងដំណើរការនៅពេលសព្វថ្ងៃ។  

បន្ទាប់ពីទស្សនាវីឌីអូចប់ លោក ញ៉ែម សំណាង មន្ដ្រីរបស់សាលាក្ដីខ្មែរក្រហមមកពីផ្នែកអង្គភាពគាំពារសាក្សី និងអ្នកជំនាញ បានធ្វើបទបង្ហាញទៅមន្ដ្រីទាំងអស់។ លោក សំណាង បានលើកឡើងអំពីតួនាទីរបស់ផ្នែកអង្គភាពគាំពារសាក្សី និងអ្នកជំនាញនៅក្នុងតុលាការនេះ។ លោកគូសបញ្ជាក់ថា អង្គភាពរបស់លោក ធ្វើការទាក់ទងផ្ទាល់ជាមួយខាងភាគីតុលាការរួមមាន ភាគីការិយាល័យសហព្រះរាជអាជ្ញា ភាគីសហចៅក្រមស៊ើបអង្កេត សាលាដំបូង និងតុលាការកំពូលនៃតុលាការនេះ ដើម្បីនាំយកសាក្សីមកផ្ដល់សក្ខីកម្មនៅចំពោះមុខអង្គជំនុំជម្រះ។ លោកបន្ដថា សាក្សីទាំងអស់ត្រូវបានបង្ហាញដីការកោះពីតុលាការ ព្រមទាំងមានការផ្ដល់សេវាដឹកជញ្ជូនទៅមក ថ្លៃស្នាក់នៅ ហូបចុក និងការពិនិត្យសុខភាពពីគ្រូពេទ្យឯករាជ្យ។ លោកថា ការផ្ដល់ជូនទាំងនោះ គឺដើម្បីជម្រះការសង្ស័យអំពីការកោះហៅ និងជួយសម្រួលការចំណាយផ្សេងៗរបស់សាក្សី។ លោក សំណាង ក៏បញ្ជាក់ផងដែរថា អង្គភាពរបស់លោកបាននាំយកសាក្សីមកផ្ដល់សក្ខីកម្មក្នុងតុលាការនេះមាន ក្នុងសំណុំរឿង ០០១ ចំនួន ៥៨ រូប សំណុំរឿង ០០២/០១ ចំនួន ៩២ រូប និង ០០២/០២ ចំនួន ១២២ រូប។ 

ក្រោយពីបទបង្ហាញរបស់ភាគីតំណាងអង្គភាពគាំពារសាក្សី និងអ្នកជំនាញ ប្រធានផ្នែកកិច្ចការសាធារណៈសាលាក្តីខ្មែរក្រហម លោក ឌឹម សុវណ្ណារុំ បានពន្យល់ពីរចនាសម្ព័ន្ធរបស់តុលាការនេះទៅកាន់មន្ដ្រីទាំងនោះ ដោយលោកបានគូសបញ្ជាក់អំពីភាពខុសគ្នារវាងតុលាការខ្មែរក្រហម និងតុលាការផ្សេងៗរបស់ជាតិ។ លោកបញ្ជាក់ថា តុលាការនេះមិនមានសាលាឧទ្ធរណ៍ទេ ប៉ុន្ដែមានអង្គបុរេជំនុំជម្រះជាអ្នកដើរតួនាទីក្នុងការដោះស្រាយបណ្តឹងផ្សេងៗ និងការខ្វែងយោបល់គ្នាក្នុងចំណោមសហចៅក្រមស៊ើបអង្កេត រវាងសហព្រះរាជអាជ្ញា និងមេធាវីការពារក្តី មុនពេលបញ្ជូនសំណុំរឿងឱ្យជំនុំជម្រះ។ លោក ឌឹម សុវណ្ណារុំបានបន្តថា តុលាការនេះក៏មានការិយាល័យរដ្ឋបាលដែលមានផ្នែកផ្សេងៗស្ថិតក្រោមការគ្រប់គ្រង រួមនឹងផ្នែកកិច្ចការសាធារណៈដែលជាអ្នករៀបចំទស្សនកិច្ចសិក្សានេះផងដែរ។ 

លោកបានពន្យល់ផងដែរថា ផ្នែកកិច្ចការសាធារណៈមានតួនាទីតំណាងឲ្យតុលាការក្នុងការចែកចាយព័ត៌មានអំពីតុលាការទៅប្រព័ន្ធផ្សព្វផ្សាយ រួមនឹងសាធារណជនទាំងក្នុង និងក្រៅប្រទេស។ លោកបន្ថែមថា ផ្នែកកិច្ចការសាធារណៈក៏បានរៀបចំចងក្រងឯកសារផ្សេងៗរបស់តុលាការសម្រាប់ចែកជូនសាធារណៈជនដើម្បីបានយល់ដឹងអំពីដំណើរការ និងព័ត៌មានផ្សេងៗអំពីតុលាការនេះ។ ក្រោយបញ្ចប់បទបង្ហាញ អ្នកចូលរួមបានចោទសួរសំនួរជាច្រើនដែលជាចម្ងល់របស់មហាជនទាក់ទងនឹងសាលាក្ដីខ្មែរក្រហម។ សំនួរទាំងនោះត្រូវបានប្រធានផ្នែកកិច្ចការសាធារណៈ បកស្រាយយ៉ាងក្បុះក្បាយ និងផុសផុល។ ក្រោយចប់កម្មវិធី លោក ឌឹម សុវណ្ណារុំ បានចែកសៀវភៅសាលដីការបស់អង្គជំនុំជម្រះតុលាការកំពូល ក្នុងសំណុំរឿង ០០២/០១ ទៅកាន់មន្ដ្រីទាំងអស់ម្នាក់មួយក្បាលដើម្បីយកទៅតម្កល់ទុកប្រើប្រាស់ក្នុងការិយាល័យការងាររបស់ខ្លួន។ 

សូមបញ្ជាក់ថា មន្ដ្រីទាំង៨០រូបដែលមកធ្វើទស្សនកិច្ចនៅសាលាក្ដីខ្មែរក្រហមទាំងនោះ ពួកគាត់ជាមន្ដ្រីដែលមានតួនាទីជាអ្នកបំរើសេវាប្រឹក្សាយោបល់ផ្នែកច្បាប់ជូនប្រជាពលរដ្ឋនៅតាមមូលដ្ឋាននៅទូទាំងប្រទេសកម្ពុជា។ សេវាកម្មទាំងនោះមាន សេវាកម្មវិវាទក្នុងគ្រួសារ វិវាទប៉ះពាល់អ្នកជិតខាង វិវាទកិច្ចសន្យាផ្សេងៗ ផ្នែកនីតិវិធីតុលាការ សេវារដ្ឋបាល បទព្រហ្មទណ្ឌ និងបញ្ហាចរាចរណ៍ជាដើម៕

Most read

នៅថ្ងៃទី ២៥ ខែ កក្កដា ឆ្នាំ ២០១៧ សហចៅក្រមស៊ើបអង្កេតអន្ដរជាតិ បានចេញដីកាបញ្ជូនសំណុំរឿងទៅពិនិត្យ យោងតាមវិធានផ្ទៃក្នុង ៦៦(៤) ដោយស្នើសុំ សហព្រះរាជអាជ្ញា ដាក់ដីកាសន្និដ្ឋានស្ថាពររបស់ខ្លួននៅក្នុងសំណុំរឿង ០០៣។ រដ្ឋាភិបាលជប៉ុនបានប្រកាសផ្តល់វិភាគទានថ្មីចំនួន ១ ២២១ ៨១៨ ដុល្លារអាមេរិក ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សម្រាប់ប្រើប្រាស់នៅឆ្នាំ ២០១៧។ វិភាគទានថ្មីនេះ បានធ្វើឱ្យជំនួយហិរញ្ញវត្ថុ...
នៅថ្ងៃនេះ សហចៅក្រមស៊ើបអង្កេត បានចេញដីកាសម្រេចលើសំណើសុំមតិយោបល់ដែលបានដាក់នៅថ្ងៃទី ៥ ខែ ឧសភា ឆ្នាំ ២០១៧ ទាក់ទងនឹងការដែលអាចចេញដីកាផ្អាកកិច្ចដំណើរការនីតិវិធីដោយសារស្ថានភាពថវិកា នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។... វិធានផ្ទៃក្នុងសម្រាប់អង្គជំនុំជម្រះវិសាមញ្ញក្នុងតុលាការកម្ពុជាចែងថា ខណៈដែលដីកាសន្និដ្ឋានស្ថាពររបស់សហព្រះរាជអាជ្ញា ត្រូវបានដាក់ជាការសម្ងាត់ក៏ដោយ ក៏សហព្រះរាជអាជ្ញាអាចបញ្ចេញនូវសេចក្តីសង្ខេបអំពីគោលបំណងនៃសេចក្តីសន្និដ្ឋានរបស់ខ្លួនជូនសាធារណជនបានដែរ។...
អង្គភាពគាំពារជនរងគ្រោះ នៃអង្គជំនុំជម្រះវិសាមញ្ញក្នុងតុលាការកម្ពុជា នឹងរៀបចំ ការតាំងពិព័រចល័ស្តីពី អាពាហ៍ពិពាហ៍ដោយបង្ខំក្នុងរបបខ្មែរក្រហម និង កិច្ចសន្ទនាអន្តរជំនាន់ នៅថ្ងៃទី ១៣-១៤ ខែ កញ្ញា ឆ្នាំ ២០១៧ ចាប់ពីម៉ោង ៩៖០០ ដល់ ម៉ោង ៧៖០០ ល្ងាច...

ស្វែង​យល់​ច្រើន​ទៀត​ពី៖

អ.វ.ត.ក​ លើ​ប្រព័ន្ធ​ព័ត៌មាន​សង្គម


Youtube
Twitter
Flickr

Instagram

Latest news