អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងបើកសវនាការទៅលើជនជាប់ចោទ អៀង សារី ពាក់ព័ន្ធនឹងមាត្រា ៦៨(៣) នៃវិធានផ្ទៃក្នុង។
សវនាការនឹងប្រព្រឹត្តទៅជាសាធារណៈនៅសាលសវនាការនៃ អ.វ.ត.ក ចាប់ពីម៉ោង ៩:០០ ព្រឹក ថ្ងៃទី៤ ខែឧសភា ឆ្នាំ២០១១។
សាលសវនាការនៃ អ.វ.ត.ក មានកៅអីចំនួន៤៨២ សម្រាប់ទទួលអង្គទូត តំណាងសារព័ត៌មាន និងសាធារណជនទូទៅ។ គោលការណ៍នៃការបែងចែកកៅអីគឺ អ្នកមកមុនបានកន្លែងអង្គុយមុន។ តំណាងអង្គទូតនិងតំណាងសារព័ត៌មានដែលមានបំណងកក់កៅអីអង្គុយក្នុងសវនាការ សូមទាក់ទងមកផ្នែកកិច្ចការសាធារណៈនៃ អ.វ.ត.ក តាមរយៈសារអេឡិកត្រូនិក PAS@ECCC.GOV.KH យ៉ាងយឺតបំផុតត្រឹមម៉ោង ១៦:០០ រសៀល ថ្ងៃអង្គារ ទី៣ ខែឧសភា ឆ្នាំ២០១១។
អ្នកចូលរួមគួរតែមកដល់ អ.វ.ត.ក យ៉ាងតិច ៤៥នាទី មុនពេលបើកសវនាការ ដើម្បីទុកពេលវេលាគ្រប់គ្រាន់សម្រាប់ឲ្យខាងសន្តិសុខចុះឈ្មោះនិងឆែកឆេរ។ ដើម្បីអាចចូលក្នុងបរិវេណសាលសវនាការបាន អ្នកចូលរួមត្រូវតែបង្ហាញអត្តសញ្ញាណប័ណ្ណ (មានបិទរូបថត) និងឆ្លងកាត់ការត្រួតពិនិត្យសន្តិសុខ។
អ្នកចូលរួមត្រូវតែប្រកាន់អាកប្បកិរិយាសមរម្យនិងថ្លៃថ្នូរគ្រប់ពេលវេលា និងមានសម្លៀកបំពាក់ត្រឹមត្រូវ (មិនអនុញ្ញាតឲ្យស្លៀកខោខ្លី សម្លៀកបំពាក់នៅមាត់សមុទ្រ ឬសម្លៀកបំពាក់ស្តើងហួសហេតុ ឬពាក់ស្បែកជើងផ្ទាត់ ។ល។)។ អ្នកចូលរួមមិនត្រូវស្លៀកសម្លៀកបំពាក់ដែលមានពាក្យស្លោកដែលបង្ហាញការគាំទ្រឬមាក់ងាយដល់ក្រុមណាមួយឡើយក្នុងអំឡុងសវនាការ។ សូមកត់សម្គាល់ថា អ្នកដែលមានអាយុក្រោម ១៦ឆ្នាំ នឹងមិនត្រូវបានអនុញ្ញាតឲ្យចូលក្នុងសាលសវនាការឡើយ ហើយអ្នកដែលមានអាយុពី១៦-១៨ឆ្នាំ ត្រូវបានអនុញ្ញាតឲ្យចូលក្នុងសាលសវនាការតែក្នុងករណីមានមនុស្សចាស់មកជាមួយតែប៉ុណ្ណោះ។ មិនអនុញ្ញាតឲ្យយកទូរស័ព្ទដៃ កាបូបយួរឬស្ពាយ ចំណីអាហារ ឬភេសជ្ជៈ ចូលក្នុងសាលសវនាការឡើយ។
ការផ្តល់ជូនតំណាងសារព័ត៌មាន
នឹងមានការផ្តល់ការផ្សាយបន្តផ្ទាល់អំពីដំណើរការសវនាការ នៅក្នុងបន្ទប់សម្រាប់អ្នកសារព័ត៌មាន (C-១០៥) ដែលស្ថិតនៅជាន់ផ្ទាល់ដីនៃសាលសវនាការ។ នៅក្នុងបន្ទប់ C-១០៨ មានកុំព្យូទ័រមួយចំនួនដែលភ្ជាប់ប្រព័ន្ធអ៊ិនថឺណិតរួចជាស្រេច ដែលអ្នកសារព័ត៌មានអាចប្រើប្រាស់បាន។ អ្នកសារព័ត៌មានពុំត្រូវបានអនុញ្ញាតឲ្យភ្ជាប់កុំព្យូទ័រផ្ទាល់ខ្លួនទៅនឹងប្រព័ន្ធអ៊ិនថឺណិតរបស់ អ.វ.ត.ក ឡើយ។ ដូច្នេះ បើអ្នកសារព័ត៌មានណាម្នាក់មានបំណងភ្ជាប់អ៊ិនថឺណិតទៅនឹងកុំព្យូទ័រផ្ទាល់ខ្លួន សូមយក 3G modems ផ្ទាល់ខ្លួនមកជាមួយ។
តំណាងសារព័ត៌មានដែលមានបំណងចូលរួមតាមដានដំណើរការសវនាការនៅ អ.វ.ត.ក សូមយកមកជាមួយនូវប័ណ្ណព័ត៌មានដែលចេញដោយ អ.វ.ត.ក ឬចេញដោយស្ថាប័នដែលខ្លួនបម្រើការ និងដែលនៅមានសុពលភាពនៅឡើយ។
តើធ្វើយ៉ាងណាដើម្បីទៅដល់ អ.វ.ត.ក ?
អ.វ.ត.ក មានទីតាំងនៅខាងឆ្វេងដៃនៃផ្លូវជាតិលេខ៤ ក្នុងសង្កាត់ចោមចៅ ចម្ងាយ១៦គីឡូម៉ែត្រពីរាជធានីភ្នំពេញ។ តំណាងសារព័ត៌មាននិងសាធារណជនសូមចូលតាមច្រកទ្វារសម្រាប់ភ្ញៀវដែលស្ថិតនៅទិសខាងកើត។