សេចក្តី​ប្រកាស​ព័ត៌មាន​របស់​សហ​ចៅក្រមស៊ើប​អង្កេត​ទាក់ទង​នឹង​ដើមបណ្តឹង​រដ្ឋប្បវេណី​នៅក្នុង​សំណុំរឿង ​០០៤​

ក្នុង​រយៈកាល​កន្លង​មក ​ការិយាល័យ​សហចៅក្រម​ស៊ើប​អង្កេត​មិនបាន​ធ្វើការ​ជូន​ដំណឹង​ដល់ ​សាធារណជន​អំពី​ទីតាំង​ឧក្រិដ្ឋកម្ម​នៅក្នុង​សំណុំរឿង​ ០០៤ ​នោះទេ ​ដោយហេតុថា ​ដោយខុស​ពីសំណុំ ​រឿង ​០០២​ សំណុំរឿង​ ០០៤​ មាន​វិមតិ​សង្ស័យ​ជាក់ច្បាស់ថា​តើជន​សង្ស័យ​នៅក្នុង​សំណុំ​រឿងនេះ​ស្ថិត​នៅក្នុង​​ប្រភេទ​នៃ ​“អ្នក​ទទួល​ខុសត្រូវ​ខ្ពស់​បំផុត​” ស្រប​តាម​មាត្រា ​២ ​ស្តីអំពី​សមត្ថកិច្ច​យុត្តា​ធិការ​នៃច្បាប់​ស្តីពីការ​បង្កើត ​អ.វ.ត.ក ​ដែរ ​ឬយ៉ាងណា ​។

ប្រសិន​បើតុលាការ​មិន​មាន​យុត្តាធិការ​ទេនោះវានឹង​មិនមែន​ជារឿង​សមស្រប​នោះឡើយ​ក្នុងការ​ដែលត្រូវ​ជំរុញ​ឲ្យមាន​ការដាក់​ពាក្យ​សុំតាំង​ខ្លួនជា​ដើមបណ្តឹង​រដ្ឋប្បវេណី​បន្ថែម​ទៅលើ​ពាក្យ​សុំតាំង​ខ្លួនជា​ដើម​បណ្តឹង​រដ្ឋប្បវេណី​ដែល​ទទួល​បាន​ចំនួន ​២០០ ​រួចមក​ហើយ​នៅក្នុង​សំណុំរឿង​នេះ ​ព្រោះថា ​ការណ៍នេះ​អាចនឹង​បង្កើត​ឲ្យមាន​ការ​រំពឹង​ទុក ​ឬក្តី​សង្ឃឹម​ ដែល​​នឹង​មិន​អាច​សម្រេច​បាន​នាពេល​ក្រោយ​តែប៉ុណ្ណោះ​។

ទោះ​បីជា​​យ៉ាង​នេះ​ក្តី ​​ដោយ​​យោង​ទៅ​លើ​ហេតុ​ដែល​ថា ​​មានការ​កើន​ឡើង​ជាខ្លាំង​​នូវព័ត៌មាន​​ ដែល​​មាន​​លក្ខណៈ​​ជា​ការ​​ប៉ាន់​​ស្មាន ​​និង​ភ័ន្តច្រឡំ ​ដែលបាន​ចុះផ្សាយ​នៅក្នុង​ប្រព័ន្ធផ្សព្វផ្សាយ​នានា ​និង ​នៅលើគេហ​ទំព័រមួយ​ជាក់លាក់ ​យើង​សូមធ្វើ​ការ​ផ្តល់ជូន​នូវ​ព័ត៌មាន​ដូចខាង​ក្រោមដោយនឹងមិន​ធ្វើឲ្យប៉ះ​ពាល់​ដល់​បញ្ហា​ច្បាប់មួយ​ចំនួនដែល​នឹងត្រូវដោះ​ស្រាយ​នៅក្នុង​ដីកា​ដំណោះស្រាយ​ឡើយ៖​

១. ដីកាសន្និដ្ឋានបញ្ជូនរឿងឲ្យស៊ើបសួរទីបីនៅក្នុងសំណុំរឿង ០០៤ រាប់បញ្ចូលនូវទីតាំងឧក្រិដ្ឋកម្ម និងអង្គហេតុឧក្រិដ្ឋកម្ម ដូចខាងក្រោម៖
ក- ខេត្តកំពង់ចាម (ភូមិភាគកណ្តាល)
•    មន្ទីរសន្ដិសុខវត្ដអូរត្រកួន ឃុំពាមជីកង ស្រុកកងមាស
•    មន្ទីរសន្ដិសុខវត្ដបាធាយ ឃុំបាធាយ ស្រុកបាធាយ
•    មន្ទីរសន្ដិសុខមិត្តសុប (គរ) ឃុំគរ ស្រុកព្រៃឈរ
•    មន្ទីរសន្ដិសុខវត្ដភ្នំប្រុស ឃុំក្រឡា និង ឃុំអំពិល ស្រុកកំពង់សៀម
•    កន្លែងសម្លាប់មនុស្សគោកព្រីង ឃុំវិហារធំ ស្រុកកំពង់សៀម
•    មន្ទីរសន្ដិសុខចំការស្វាយចន្ទី ឃុំស្វាយទាប ស្រុកចំការលើ
•    ការដ្ឋានធ្វើពលកម្មដោយបង្ខំនៅទំនប់អន្លង់ជ្រៃ ស្រុកព្រៃឈរ
•    ការប្រល័យពូជសាសន៍ជនជាតិចាមនៅខេត្ដកំពង់ចាម
ខ- ខេត្តកំពង់ធំ (ភូមិភាគកណ្តាល)
•    មន្ទីរសន្ដិសុខវត្ដស្រងែ ឃុំត្បែង ស្រុកកំពង់ស្វាយ
•    គុក និងកន្លែងសម្លាប់មនុស្សនៅទួលតាផ្លុង ឃុំកំពង់ចិនជើង ស្រុកស្ទោង
•    មន្ទីរសន្ដិសុខវត្ដកណ្ដាល ឃុំច្រនៀង ស្រុកបារាយណ៍
•    មន្ទីរសន្ដិសុខវត្ដបារាយណ៍ជាន់ដែក ឃុំបាល្ល័ង ស្រុកបារាយណ៍
គ- ខេត្តពោធិសាត់ (ភូមិភាគពាយ័ព្យ)
•    គុកលេខ៨ ឃុំស្យា ស្រុកកណ្តៀង
•    ទីតាំងសម្លាប់នៅទួលពោធិ៍ជ្រៃ ឃុំស្រែស្ដុក ស្រុកកណ្តៀង


ឃ- ខេត្តបាត់ដំបង (ភូមិភាគពាយ័ព្យ)
•    មន្ទីរសន្តិសុខវត្ដគីរីរម្យ ឃុំភ្នំសំពៅ ស្រុកបាណន់
•    ទីតាំងសម្លាប់នៅបន្ទាយអូតាក្រៃ ឃុំត្រែង ស្រុករតនមណ្ឌល
•    មន្ទីរសន្ដិសុខបន្ទាយត្រែង ឃុំត្រែង ស្រុករតនមណ្ឌល
•    មន្ទីរសន្ដិសុខវត្ដធម្មយុត ស្រុកមោងឫស្សី
•    មន្ទីរសន្ដិសុខវត្ដកណ្ដាលដែលស្ថិតនៅចំកណ្ដាល ទីក្រុងបាត់ដំបង
•    មន្ទីរសន្ដិសុខវត្ដសម្ដេច ឃុំតាប៉ុន ស្រុកសង្កែ
•    មន្ទីរសន្ដិសុខវត្ដពោធិ៍លង្ការ ឃុំកំពុងព្រៀង ស្រុកសង្កែ
ង- ខេត្តបន្ទាយមានជ័យ (ភូមិភាគពាយ័ព្យ)
•    មន្ទីរសន្ដិសុខវត្ដបន្ទាយនាង ឃុំបន្ទាយនាង ស្រុកមង្គលបូរី
•    ទីតាំងសម្លាប់នៅល្អាងភ្នំគួយយំ ឃុំអូរប្រាសាទ ស្រុកមង្គលបុរី
•    ទីតាំងសម្លាប់នៅវត្ដចំការខ្នុរ ឃុំអូរអំបិល ស្រុកស៊ីសុផុន
•    មន្ទីរសន្ដិសុខភ្នំទ្រយោង ស្រុកព្រះនេត្រព្រះ
•    មន្ទីរសន្ដិសុខភូមិចក្រី ឃុំជួប ស្រុកព្រះនេត្រព្រះ
•    វត្ដព្រះនេត្រព្រះ និងចំការតាឡឹង
•    ទំនប់ត្រពាំងថ្ម ឃុំប៉ោយចារ ស្រុកភ្នំស្រុក
•    ស្ពានស្រែង និងទំនប់ព្រៃរនាម ស្រុកព្រះនេត្រព្រះ

ច- ខេត្តតាកែវ (ភូមិភាគនិរតី)
•    មន្ទីរសន្ដិសុខវត្ដប្រធាតុ ឃុំគោកព្រេច ស្រុកគិរីវង់
ឆ- ការបោសសម្អាត
•    ការបោសសម្អាតនៅភូមិភាគកណ្ដាល
•    ការបោសសម្អាតនៅភូមិភាគពាយ័ព្យ

ជនរង​គ្រោះដែល​មានបំណង​ដាក់ពាក្យ​សុំតាំងខ្លួន​ជាដើម​បណ្តឹង​រដ្ឋប្បវេណី​ត្រូវទាក់ទង​ជាមួយ​នឹងផ្នែក​គាំពារ​ជនរងគ្រោះ​នៃ អ.វ.ត.ក. ​ដែលពួក​គេអាច​នឹងទទួល​បាន​ទំរង់​បែប​បទ​ និង​ព័ត៌មាន​បន្ថែម​នានា​ពាក់ព័ន្ធ​នឹង​លក្ខណៈ​វិនិច្ឆ័យ​នៃការ​ទទួល​យក ​ព្រម​ទាំងរយៈ​ពេល​កំណត់​នៃការ​ដាក់​ពាក្យ​សុំជា​ដើម​។

អង្គភាព​គាំពារជន​រងគ្រោះ​នៃអង្គ​ជំនុំជម្រះ​វិសាមញ្ញក្នុង​តុលាការ​កម្ពុជា ​(អ.វ.ត.ក)​ផ្លូវជាតិ​លេខ៤​ សង្កាត់ចោម​ចៅ ​ខណ្ឌដង្កោ ​រាជធានីភ្នំពេញ​​ប្រអប់​សំ​បុត្រ ​P.O. Box 71 ​រាជធានីភ្នំពេញ ​ព្រះរាជាណា​ចក្រកម្ពុជា​។

ការិយាល័យ​ប្រចាំនៅ​ប្រជុំជន​ក្រុង​៖
ផ្ទះលេខ ៦A ផ្លូវលេខ ២១ សង្កាត់ទន្លេបាសាក់ ខណ្ឌចំការមន
រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ: ០២៣ ២១៤ ២៩១ ឬ ០៩៧ ៧៤២ ៤២១៨

ការិយាល័យបើកធ្វើការចាប់ពីថ្ងៃចន្ទដល់ថ្ងៃសុក្រ លើកលែងថ្ងៃឈប់សម្រាក ។     

២. ក្នុងករណីដែលវិសាលភាពនៃកិច្ចស៊ើបសួរលាតសន្ធឹងដល់ទីតាំងឧក្រិដ្ឋកម្មផ្សេងៗទៀត សាធារណជននឹងត្រូវបានជូនដំណឹងបន្ថែមដោយឡែកក្នុងពេលវេលាសមស្រប។

៣. នៅ​ក្នុង​ដំណាក់​កាលនេះ​នៃនីតិវិធី​ សហ​ព្រះរាជ​អាជ្ញា​មិនមាន​មូលដ្ឋាន​ផ្លូវច្បាប់​ក្នុងការ​ជូន​ដំណឹង​ដល់​សាធារណៈ​ជន​អំពី​ទីតាំង​ឧក្រិដ្ឋកម្ម​ផ្សេង​ទៀត​ឡើយ​ដូច្នេះ​មានតែ​ព័ត៌មាន​ដែលផ្តល់​ដោយ​សហចៅក្រម​ស៊ើបអង្កេត​ប៉ុណ្ណោះ​ដែល​មាន​លក្ខណៈ​ត្រឹមត្រូវ​៕