ចាប់ពីថ្ងៃទី ២៣ ខែ សីហា ឆ្នាំ ២០១៦ តទៅ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងធ្វើសវនាការដេញដោលភ័ស្តុតាងលើការចោទប្រកាន់ពាក់ព័ន្ធទៅនឹងការរៀបអាពាហ៍ពិពាហ៍ដោយបង្ខំ និង ការរំលោភសេពសន្ធវៈ នៅអំឡុងរបបកម្ពុជាប្រជាធិបតេយ្យ។ ដើមបណ្តឹងរដ្ឋប្បវេណីចំនួន ០៨ រូប សាក្សីចំនួន ០៣ រូប និង អ្នកជំនាញចំនួន ០២ រូប ត្រូវបានសម្រេចយកមកស្តាប់សក្ខីកម្មនៅក្នុងផ្នែកនេះ ក្នុងការជំនុំ-ជម្រះក្តីលើសំណុំរឿង ០០២/០២ ប្រឆាំងនឹងជនជាប់ចោទ នួន ជា និង ខៀវ សំផន ។
យោងតាមដីកាដំណោះស្រាយ បក្សកុម្មុយនីស្តកម្ពុជាបានអនុវត្តគោលនយោបាយស្តីពីការដាក់កំហិតលើការរៀបអាពាហ៍ពិពាហ៍ តាមរយៈមធ្យោបាយចាំបាច់នានា ចាប់ពីមុនឆ្នាំ ១៩៧៥ រហូតដល់យ៉ាងហោចណាស់ ថ្ងៃទី ០៦ ខែ មករា ឆ្នាំ ១៩៧៩ ដើម្បីសម្រេចឲ្យបាន និង ការពារបដិវត្តន៍សង្គមនិយម។ យោងតាមការចោទប្រកាន់ នៅទូទាំងប្រទេសកម្ពុជា បុរស និង ស្រ្តី ត្រូវបានគេបង្ខំឲ្យរៀបការ នៅក្នុងពិធីរួមគ្នាដែលមានចាប់ពី ០២ ទៅជាង ១០០ គូក្នុងមួយលើកៗ។ តាមការចោទប្រកាន់ដដែល ចារីបានតម្រូវឲ្យអ្នករៀបការទាំងនោះរួមដំណេកដោយបង្ខំ ដែលធ្វើឲ្យជនរងគ្រោះទទួលរងនូវការបំពារបំពានផ្លូវភេទតាមវិធីបង្ខំ ដោយមិនមានការព្រមព្រៀងពីជនរងគ្រោះ។
រហូតមកដល់ពេលនេះ អង្គជំនុំជម្រះសាលាដំបូងបានស្តាប់សក្ខីកម្មសាក្សីចំនួន ៩២ រូប ដើមបណ្តឹងរដ្ឋប្បវេណីចំនួន ៤៨ រូប និង អ្នកជំនាញចំនួន ០៤រូប ក្នុងរយៈពេលសវនាការចំនួន ២១៦ ថ្ងៃ។ បន្ទាប់ពីបញ្ចប់សវនាការលើការរៀបអាពាហ៍ពិពាហ៍ដោយបង្ខំ និង ការរំលោភសេពសន្ធវៈ អង្គជំនុំជម្រះសាលាដំបូងនឹងធ្វើសវនាការដេញដោលលើភ័ស្តុតាងពាក់ព័ន្ធនឹងអង្គហេតុជម្លោះប្រដាប់អាវុធរវាងប្រទេសកម្ពុជាជាមួយប្រទេសវៀតណាម ហើយចុងក្រោយបំផុត អង្គជំនុំជម្រះនឹងធ្វើសវនាការលើតួនាទីរបស់ជនជាប់ចោទ នួន ជា និង ខៀវ សំផន។ អង្គជំនុំជម្រះរំពឹងថា សវនាការលើភ័ស្តុតាងនឹងបញ្ចប់នៅចុងឆ្នាំនេះ ហើយសាលក្រមនឹងប្រកាសនៅចុងឆ្នាំ ២០១៧ ខាងមុខ។
សម្រាប់ព័ត៌មានបន្ថែមសូមទំនាក់ទំនង៖
លោក ឡាស អូលសិន លោក នេត្រ ភក្ត្រា
មន្ត្រីផ្នែកច្បាប់ មន្ត្រីនាំពាក្យសាលាក្តីខ្មែរក្រហម
ទូរស័ព្ទចល័តៈ +៨៥៥ (០) ១២ ៤៨៨ ០២៣ ទូរស័ព្ទចល័តៈ +៨៥៥ (០) ១២ ៤៨៨ ១៥៦
សារអេឡិកត្រូនិកៈ olsenl@un.org សារអេឡិចត្រូនិកៈ neth.pheaktra@eccc.gov.kh