សន្និ​សីទ​កា​សែត​​មុន​ការ​ប្រកាស​សាល​ដី​កា​ស្ថា​ពរ​លើ​បណ្តឹង​សា​ទុក្ខ​ក្នុង​សំណុំ​រឿង​០០​២​/​០​​១​ ​ប្រឆាំង​នឹង​ខៀវ​ សំផ​ន ​និង ​នួន ​ជា​​

ផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សូមអញ្ជើញតំណាងប្រព័ន្ធផ្សព្វផ្សាយជាតិ និងអន្តរជាតិ ចូលរួមក្នុងសន្និសីទកាសែតមួយដែលរៀបចំឡើងមុនការប្រកាសសាលដីកាស្ថាពរលើបណ្តឹងសាទុក្ខក្នុងសំណុំរឿង០០២/០១ ប្រឆាំងនឹងខៀវ សំផន និង នួន ជា។ សន្និសីទកាសែតនេះនឹងប្រព្រឹត្តទៅនៅថ្ងៃទី២១ ខែវិច្ឆិកា ឆ្នាំ ២០១៦ ពីម៉ោង ១០ ព្រឹក ដល់ម៉ោង ១១ព្រឹក នៅសណ្ឋាគារសាន់វេ  រាជធានីភ្នំពេញ។ សន្និសីទនេះនឹងមានការបកប្រែជាភាសាខ្មែរ និងអង់គ្លេស។

        សូមរំលឹកថា សំណុំរឿង០០២/០១ គឺជាការជំនុំជម្រះលើកទីមួយនៃការជំនុំជម្រះយ៉ាងតិចពីរប្រឆាំងនឹង ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យ និង នួន ជា អតីតអនុលេខាបក្សកុម្មុយនីស្តកម្ពុជា។ បទចោទនៅក្នុងសំណុំរឿង ០០២/០១ គឺផ្តោតលើបទឧក្រិដ្ឋប្រឆាំងនឹងមនុស្សជាតិ ដែលបានប្រព្រឹត្តនៅក្នុងអំឡុងពេលជម្លៀសនៅទីក្រុងភ្នំពេញក្នុងខែមេសា ឆ្នាំ១៩៧៥ និងការផ្លាស់ទីដោយបង្ខំបន្តបន្ទាប់ពីតំបន់ដទៃទៀត រួមទាំងការកាប់សម្លាប់អតីតមន្ត្រីរដ្ឋការសម័យ លន់ នល់ នៅទួលពោធិ៍ជ្រៃ ក្នុងខេត្តពោធិ៍សាត់។ នៅថ្ងៃទី ៧ ខែ សីហា ២០១៤ អង្គជំនុំជម្រះសាលាដំបូង រកឃើញថា ជនជាប់ចោទមានពិរុទ្ធភាពពីបទឧក្រិដ្ឋប្រឆាំងនឹងមនុស្សជាតិ និងបានសម្រេចផ្តន្ទាទោសដាក់ពន្ធនាគារជនជាប់ចោទទាំងពីរអស់មួយជីវិត។ នួន ជា និង ខៀវ សំផន បានធ្វើបណ្តឹងសាទុក្ខប្រឆាំងនឹងសាលក្រមរបស់អង្គជំនុំជម្រះសាលាដំបូង ដោយម្នាក់ៗបានលើកទឡ្ហីករណ៍បណ្តឹងសាទុក្ខរៀងៗខ្លួនចំនួន ២២៣ និង១៤៨ ។ សហព្រះរាជអាជ្ញា ក៏បានដាក់បណ្តឹងសាទុក្ខដោយកម្រិតត្រឹមតែការស្វែងរកដំណោះស្រាយទាក់ទងនឹងភាពអាចអនុវត្តបាននូវទម្រង់ពង្រីកបន្ថែមនៃសហឧក្រិដ្ឋកម្មរួម ដែលហៅថា  “សហឧក្រិដ្ឋកម្មរួមទម្រង់ទី III” (JCE III) នៅចំពោះមុខ អ.វ.ត.ក។ លទ្ធផលនៃបណ្តឹងសាទុក្ខរបស់ភាគីទាំងពីរនឹងត្រូវប្រកាសដោយអង្គជំនុំជម្រះតុលាការកំពូលនៅថ្ងៃទី ២៣ ខែវិច្ឆិកា ឆ្នាំ ២០១៦។