ថ្ងៃនេះ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានសហការរៀបចំការប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិ (International Humanitarian Law Moot Court Competition) នៅវគ្គជម្រុះថ្នាក់ជាតិ ដែលរៀបចំដោយគណៈកម្មាធិការកាកបាទក្រហមអន្តរជាតិ។
បណ្តានិស្សិតដែលបានចូលរួមប្រកួតប្រជែងមានចំនួន ៤ ក្រុម មកពីសាកលវិទ្យាល័យនានាបានឈានទៅដល់វគ្គពាក់កណ្តាលផ្តាច់ព្រ័ត និងវគ្គផ្តាច់ព្រ័ត ដែលត្រូវបានរៀបចំនៅក្នុងបរិវេណបន្ទប់សវនាការ អ.វ.ត.ក ដោយអនុវត្តតាមលក្ខខណ្ឌសុវត្ថិភាពនៃជំងឺកូវីដ-១៩។ មានសាស្រ្តាចារ្យជនជាតិខ្មែរ និងបរទេស និងអ្នកប្រកបវិជ្ជាជីវៈច្បាប់ចំនួនប្រាំពីររូប បានបំពេញមុខងារជាអ្នកវិនិច្ឆ័យក្នុងការប្រកួតប្រជែងនេះ។ ក្រុមដែលទទួលជ័យជម្នះ រួមមានកញ្ញា ម៉ាក ពុធវរៈនុត កញ្ញា គឹម រូសាលីណា និងលោក សុខ ច័ន្ទវិជ័យសម្បត្តិ នឹងបន្តទៅចូលរួមប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិរបស់កាកបាទក្រហម អាស៊ី-ប៉ាស៊ីហ្វិក ដែលរៀបចំនៅទីក្រុងហុងកុង។
លោកស្រី Dena FISHER ជាប្រធានបេសកកម្មប្រចាំតំបន់មេគង្គរបស់គណៈកម្មាធិការកាកបាទក្រហមអន្តរជាតិ មានប្រសាសន៍ថា៖ “វាជាកិត្តិយសដ៏ធំធេងណាស់ ដែលយើងអាចរៀបចំការប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិ នៅវគ្គផ្តាច់ព្រ័តនៅ អ.វ.ត.ក និងបានឃើញពីសមត្ថភាពដ៏គួរឲ្យកោតសរសើររបស់ប្អូនៗនិស្សិតនៅក្នុងបន្ទប់សវនាការ។
“ច្បាប់មនុស្សធម៌អន្តរជាតិដែលមានចែងក្នុងអនុសញ្ញាទីក្រុងហ្សឺណែវ និងពិធីសារបន្ថែមនានារបស់អនុសញ្ញាទាំងនេះ គឺជាបណ្តុំវិធាននានាដែលមានគោលបំណងទប់ស្កាត់នូវទុក្ខវេទនារបស់មនុស្សជាតិ និងបញ្ចៀសកុំឲ្យកើតមានអំពើឃោរឃៅបំផុតដោយសារសង្រ្គាម។ ការរៀបចំព្រឹត្តិការណ៍នៅឆ្នាំនេះ អ.វ.ត.ក បានផ្តល់ឱកាសពិសេសដល់អនាគតអ្នកច្បាប់កម្ពុជាជំនាន់ក្រោយ ក្នុងការសម្រួចទេពកោសល្យវិជ្ជាជីវៈរបស់ខ្លួន ក្នុងការដោះស្រាយចំពោះការរំលោភបំពានច្បាប់មនុស្សធម៌អន្តរជាតិនាពេលអនាគត នៅទីកន្លែងមួយដែលបង្កើតឡើងដើម្បីធ្វើការស៊ើបអង្កេតទៅលើអំពើឃោរឃៅនានាពីអតីតកាល។
“គណៈកម្មាធិការកាកបាទក្រហមអន្តរជាតិ សូមថ្លែងអំណរគុណយ៉ាងជ្រាលជ្រៅដល់ អ.វ.ត.ក ដែលបន្តឧបត្ថម្ភគាំទ្រដល់គំនិតផ្តួចផ្តើមនេះ និងបានផ្តល់នូវបទពិសោធន៍បំផុសស្មារតីដល់ប្អូនៗនិស្សិតដែលខិតខំប្រឹងប្រែងចូលរួមការប្រកួតប្រជែងនៅថ្ងៃនេះ។ ខ្ញុំសូមសម្តែងការអបអរសាទរដល់អ្នកច្បាប់វ័យក្មេងទាំងអស់របស់យើង ដែលបានជោគជ័យដល់វគ្គផ្តាច់ព្រ័តក្នុងការប្រកួតប្រជែងនេះ និងសូមជូនពរឲ្យពួកគេទទួលបានជោគជ័យថែមទៀតនាពេលអនាគត”។
អ.វ.ត.ក សូមអបអរសាទរដល់ប្អូនៗនិស្សិតទាំងអស់ដែលបានចូលរួម និងបានខិតខំប្រឹងប្រែងលើកកម្ពស់គោលការណ៍សំខាន់ៗនៃច្បាប់មនុស្សធម៌អន្តរជាតិ។