សហមេធាវីនាំមុខតំណាងដើមបណ្តឹងរដ្ឋប្បវេណី សូមស្វាគមន៍ចំំពោះសាលដីកាស្ថាពររបស់អង្គជំនុំជម្រះតុលាការកំពូលនៅក្នុងសំំណុំរឿង ០០២/០២។ អង្គជំនុំជម្រះបានតម្កល់និងបញ្ជាក់ពីការផ្តន្ទាទោស ខៀវ សំផន ចំំពោះឧក្រិដ្ឋកម្មប្រឆាំងមនុស្សជាតិ ការបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ និងអំពើប្រល័យពូជសាសន៍។ សាលដីកានេះ និងសាលដីកាក្នុងសំណុំរឿង ០០២/០១ បង្ហាញពីការបដិសេធរបស់កម្ពុជា និងសហគមន៍អន្តរជាតិចំពោះឧក្រិដ្ឋកម្មដែលប្រព្រឹត្តដោយ នួន ជា និងខៀវ សំផន ដែលជាមេដឹកនាំជាន់ខ្ពស់នៃរបបខ្មែរក្រហម។
អ.វ.ត.ក បានស្តាប់សក្ខីកម្មដ៏សោកសៅរបស់សាក្សីចំនួន ១២៣ រូប និងដើមបណ្តឹងរដ្ឋប្បវេណីចំនួន ១១៦រូប នៅដំណាក់កាលនៃការជំនុំជម្រះក្តីនៃសំណុំរឿង ០០១ និង ០០២ ។ រឿងរ៉ាវនៃការធ្វើទារុណកម្ម ការធ្វើទុក្ខបុកម្នេញផ្នែកសាសនា និងនយោបាយ ការធ្វើឱ្យក្លាយជាទាសករ ការបង្ខំឱ្យរៀបការ ការរំលោភសេពសន្ថវៈ អំពើហឹង្សាផ្លូវភេទ ការសម្លាប់រង្គាល និងការសម្លាប់ ត្រូវបានទទួលយកដោយចៅក្រម ដែលត្រូវបានបង្កើតឡើងជាអចិន្ត្រៃយ៍នៅក្នុងកំណត់ត្រារបស់តុលាការ ហើយនឹងក្លាយជាផ្នែកសំខាន់នៃកេរដំណែលនៃ អ.វ.ត.ក។
ឧក្រិដ្ឋកម្មទាំងនេះបានប្រព្រឹត្តនៅក្នុងសម័យកម្ពុជាប្រជាធិបតេយ្យ ហើយអ្នកដែលត្រូវបានផ្តន្ទាទោស មិនត្រឹមតែរំលោភលើច្បាប់របស់ប្រទេសកម្ពុជាប៉ុណ្ណោះទេ ប៉ុន្តែថែមទាំងរំលោភលើច្បាប់អន្តរជាតិផងដែរ។ សាលដីកាបានរួមចំណែកគោលការណ៍គតិយុត្តិដ៏មានតម្លៃដល់ស្ថាប័ននៃច្បាប់ព្រហ្មទណ្ឌអន្តរជាតិ ហើយនឹងបន្តមានឥទ្ធិពលទៅប្រទេសផ្សេងក្រៅពីប្រទេសកម្ពុជា។
ខណៈដែលដំណើរការតុលាការនៅពេលនេះខិតជិតចូលទីបញ្ចប់ ប៉ុន្តែនៅមានកិច្ចការងារជាច្រើនត្រូវធ្វើបន្តជាមួយដើមបណ្តឹងរដ្ឋប្បវេណីនិងជនរងគ្រោះផ្សេងទៀត។ ការឈឺចាប់របស់ពួកគាត់ មិនអាចជាសះស្បើយបានទាំងស្រុងឡើយ ប៉ុន្តែប្រទេសកម្ពុជា និងពិភពលោកបានទទួលស្គាល់ថាអ្វីដែលបានកើតឡើងចំពោះពួកគាត់ គឺមិនអាចថ្លែងនិងបំភ្លេចបានឡើយ។
អ.វ.ត.ក បានទទួលស្គាល់គម្រោងសំណងជាលក្ខណៈផ្លូវចិត្ត និងសមូហភាពចំនួន ១១ គម្រោង ក្នុងសំណុំរឿង ០០២/០១ និងចំនួន ១៣ គម្រោង ក្នុងសំណុំរឿង ០០២/០២ សម្រាប់ដើមបណ្តឹងរដ្ឋប្បវេណី (ជាជនជាតិខ្មែរ ក៏ដូចជាជនជាតិភាគតិចចាម និងវៀតណាម)។ គម្រោងទាំងនេះត្រូវបានអនុវត្តដោយអង្គការសង្គមស៊ីវិល សហការជាមួយសហមេធាវីនាំមុខ និងអង្គភាពគាំពារជនរងគ្រោះដោយមានជំនួយសប្បុរសពីសហគមន៍អន្តរជាតិ។
គម្រោងទាំងនេះត្រូវបានរៀបចំឡើងដោយមានការពិគ្រោះយោបល់ជាមួយដើមបណ្តឹងរដ្ឋប្បវេណី និងដើម្បីឆ្លើយតបទៅនឹងការឈឺចាប់ដែលពួកគាត់បានទទួលរងក្នុងអំឡុងសម័យខ្មែរក្រហម។ គម្រោងសំណង ត្រូវបានបែងចែកតាមផ្នែកដូចជា ផ្នែកការរំឭកនិងការគោរពវិញ្ញាណក្ខ័ន្ធ ផ្នែកការស្តារនីតិសម្បទា ផ្នែកអប់រំនិងចងក្រងឯកសារ ផ្នែកធានាមិនឱ្យកើតមានសារជាថ្មី និងផ្នែកការពេញចិត្ត ហើយមានគោលដៅគោរពវិញ្ញាណក្ខ័ន្ធដល់ជនរងគ្រោះដែលបានស្លាប់ទៅ ឱ្យដើម្បណ្តឹងរដ្ឋប្បវេណីទទួលបានសេវាសុខភាពទាំងផ្លូវកាយ និងផ្លូវចិត្ត ថែរក្សានិងជម្រុញឱ្យមានការយល់ដឹងអំពីប្រវត្តិសាស្ត្រនៅក្នុងសម័យខ្មែរក្រហម ជម្រុញឱ្យមានយន្តការសម្រាប់ការទប់ស្កាត់និងការពិនិត្យមើលជម្លោះក្នុងសង្គម និងជម្រុញឱ្យមានដំណោះស្រាយដោយសន្តិវិធី អប់រំដល់ក្មេងៗជំនាន់ក្រោយអំពីបទពិសោធ៍របស់ដើមបណ្តឹងរដ្ឋប្បវេណី និងចូលរួមជាមួយពួកគាត់តាមរយៈសិល្បៈនិងវប្បធម៌ វេទិកាថ្នាក់រៀន កិច្ចសន្ទនាអន្តរជំនាន់ សម្ភារៈនិងសៀវភៅអប់រំ។ ការចូលរួមរបស់ក្មេងៗជំនាន់ក្រោយ ផ្តល់ផលប្រយោជន៍ដល់ដើមបណ្តឹងរដ្ឋប្បវេណី ដោយមានការទទួលស្គាល់ និងចងចាំនូវការឈឺចាប់របស់ពួកគាត់។
ដោយមានជំនួយជាបន្តបន្ទាប់ពីរាជរដ្ឋាភិបាលកម្ពុជា និងសហគមន៍អន្តរជាតិ អ.វ.ត.ក នឹងបន្តធ្វើការងារជាមួយដើមបណ្តឹងរដ្ឋប្បវេណី និងជនរងគ្រោះនៅក្នុងដំណាក់កាលដែលនៅសេសសល់របស់តុលាការ។
យើងខ្ញុំទទួលស្គាល់ពីដំណើរការងារយ៉ាងសំខាន់របស់ អ.វ.ត.ក ក្នុងការនាំយកអ្នកដែលប្រព្រឹត្តបទឧក្រិដ្ឋធ្ងន់ធ្ងរបំផុត និងដែលបំពានទៅលើច្បាប់អន្តរជាតិ មកកាត់ទោស។ យើងខ្ញុំសូមថ្លែងអំណអរគុណដល់រាជ រដ្ឋាភិបាលកម្ពុជា និងអង្គការសហប្រជាជាតិសម្រាប់ការគាំទ្រដល់ការងាររបស់ អ.វ.ត.ក ហើយយើងខ្ញុំទន្ទឹងរង់ចាំដំណាក់កាលសំខាន់បន្ទាប់ទៀតរបស់ អ.វ.ត.ក។