អង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី៨ ខែកុម្ភៈ ឆ្នាំ២០២៣ នេះ បានរៀបចំទស្សនកិច្ចសិក្សាជូននិស្សិតចំនួន២០០ នាក់ មកពីសាកលវិទ្យាល័យវេស្ទើន និងសាកលវិទ្យាល័យកំពង់ចាម ក្នុងខេត្តកំពង់ចាម។ គោលបំណងនៃការរៀបចំដំណើរទស្សនកិច្ចសិក្សានេះ គឺដើម្បីផ្ដល់ឱ្យនិស្សិតទាំងអស់បានចងចាំ និងឈ្វេងយល់ឱ្យកាន់តែស៊ីជម្រៅអំពីឧក្រិដ្ឋកម្មដ៏សាហាវយង់ខ្នង ដែលបានកើត ឡើងនៅក្នុងរបបឃោរឃៅខ្មៅងងឹត និងដើម្បីរំឮកវិញ្ញាណក្ខ័ណជនរងគ្រោះពីរបបនោះផងដែរ។
និស្សិតទាំងអស់បានទទួលនូវព័ត៌មានជាច្រើនអំពីភាពវេទនាខ្លោចផ្សារដែលបានកើតឡើងលើប្រជាពលរដ្ឋកម្ពុជាក្នុងរបបខ្មែរក្រហម តាមរយៈការទស្សនាសារៈមន្ទីរប្រល័យពូជសាសន៍គុកទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះ និងព័ត៌មានជុំវិញដំណើរការជំនុំជម្រះក្តីលើអតីតមេដឹកនាំខ្មែរក្រហម ដែលធ្វើបទបង្ហាញដោយមន្ត្រីផ្នែកកិច្ចការសាធារណៈនៃសាលាក្តីខ្មែរក្រហម។
និស្សិតដែលបានចូលរួមក្នុងកម្មវិធីទស្សនកិច្ចសិក្សានេះលើកឡើងថា ទស្សនកិច្ចសិក្សានេះពិតជាមានសារៈសំខាន់សម្រាប់ពួកគាត់ ព្រោះពួកគាត់បានយល់ដឹង និងឃើញផ្ទាល់ភ្នែកអំពីស្លាកស្នាមហេតុការណ៍ដ៏អាក្រក់ដែលដក់ជាប់នៅក្នុងដួងចិត្តខ្មែរគ្រប់រូប រួមមានដូចជា របៀបគ្រប់គ្រងដ៏ព្រៃផ្សៃ និងយង់ឃ្នងពីពួកខ្មែរក្រហម ការរស់នៅដ៏លំបាកវេទនាក្នុងសម័យនោះ ការធ្វើទារុណកម្មលើប្រជាជនខ្មែរ និងបិទសិទ្ធិសេរីភាពគ្រប់បែបយ៉ាង។
យុវជនទាំងនេះក៏បានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ពួកគេក៏បានថ្លែងអំណរគុណសាលាក្ដីខ្មែរក្រហម ដែលបានរៀបចំកម្មវិធីដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។
ចាប់តាំងពីតុលាការដំណើរការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
រូបថតដោយ: Andre Kwok