ឯកឧត្តម ក្រាញ់ តូនី អញ្ជើញដឹកនាំគណប្រតិភូរបស់ អ.វ.ត.ក ទស្សនកិច្ចស្ថានីយ៍ផ្សាយរបស់ស្ថាប័នផ្សព្វផ្សាយអប់រំកម្ពុជា (EBC)

ECCC

ឯកឧត្តម ក្រាញ់ តូនី ប្រធានរដ្ឋបាលស្តីទី និងមន្ដ្រីជាន់ខ្ពស់ផ្នែករដ្ឋបាលមួយចំនួនរបស់អង្គជំនុំជម្រះវិសាមញ្ញក្នុងតុលាការកម្ពុ​ជា (អ.វ.ត.ក) នៅរសៀលថ្ងៃសុក្រ ទី២៤ ខែកុម្ភៈ ឆ្នាំ២០២៣ អញ្ជើញទស្សនកិច្ចស្ថានីយ៍ផ្សាយរបស់​ស្ថាប័ន​ផ្សព្វផ្សាយអប់រំកម្ពុជា (EBC) ស្ថិតនៅក្នុងសង្កាត់បឹងទំពុន, ខណ្ឌមានជ័យ, រាជធានីភ្នំពេញ។ ដំណើរទស្សនកិច្ចនេះទទួលបានការស្វាគមន៍យ៉ាងរាក់​ទាក់​​ពី ឯកឧត្តម សុខ ពុទ្ធិវុធ រដ្ឋលេខាធិការ​ក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មការ​គ្រប់គ្រងគម្រោង​ផ្សព្វផ្សាយអប់រំកម្ពុជា (EBC)

ឯកឧត្តម សុខ ពុទ្ធិវុធ បានជម្រាបគណៈប្រតិភូសាលាក្ដីខ្មែរក្រហមថា ស្ថាប័នផ្សព្វផ្សាយអប់រំកម្ពុជា​ (EBC) គឺជាស្ថាប័នផ្សព្វ​ផ្សាយ​ការអប់រំដំបូងគេបង្អស់នៅក្នុងប្រទេសកម្ពុជា ដែលទទួលបានការគាំទ្រពីសំណាក់​ ក្រសួងប្រៃសណីយ៍ និងទូរគម​នាគមន៍ ក្រ​សួងអប់រំ យុវជន និងកីឡា ក្រសួងសេដ្ឋកិច្ច និង​ហិរញ្ញវត្ថុ និងក្រសួងព័ត៌មាន ដោយមានការគាំទ្របច្ចេកទេសពីស្ថានីយផ្សព្វ​ផ្សាយអប់រំ (EBS) និងជំនួយផ្នែកហិរញ្ញវត្ថុពីក្រសួងវិទ្យាសាស្ត្រ និងបច្ចេកវិទ្យាគមនាគមន៍ (MSIT) នៃសាធារណរដ្ឋកូរ៉េ ។ ឯកឧត្តមបានបន្ថែថា ចក្ខុវិស័យរបស់ EBC គឺ “ផលិតមាតិកាអប់រំ និងប្រព័ន្ធគ្រប់គ្រងការរៀនសូត្រតាមអ៊ីនធឺណិត (Platform) សម្រាប់បង្រៀនសិស្សតាមប្រព័ន្ធអ៊ីនធឺណិតតាមរយៈបច្ចេកវិទ្យាឌីជីថល”។ ឯកឧត្តមបញ្ជាក់ថា ស្ថាប័ននេះបានចូលរួមចំណែកយ៉ាងសំខាន់​ក្នុងការ​កាត់បន្ថយគម្លាតក្នុងវិស័យអប់រំនៅកម្ពុជា ស្របតាមបដិវត្តន៍ឧស្សាហកម្ម 4.0 នាពេលបច្ចុប្បន្ន។

ឯកឧត្តម ក្រាញ់ តូនី បានជម្រាបឯកឧត្តម សុខ ពុទ្ធិវុធ និងសហការីថា ដំណើរទស្សនកិច្ចរបស់គណៈប្រតិភូ អ.វ.ត.ក នៅពេលនេះ គឺចង់ស្វែងយល់ឱ្យកាន់តែច្បាស់អំពីសមត្ថភាព និងបច្ចេកវិទ្យារបស់ស្ថាប័នផ្សព្វផ្សាយអប់រំនៅកម្ពុជា (EBC) ដើម្បីឈានទៅដល់កិច្ចសហប្រតិបត្តិការលើការផលិតមាតិការរួមគ្នា​ទាក់ទងនឹង​ដំណើការជំនុំជម្រះ​ក្ដីអតីត​មេដឹកនាំជាន់ខ្ពស់របប​ខ្មែរក្រហម សម្រាប់ផ្សព្វផ្សាយអប់រំដល់យុវជនជំនាន់ក្រោយ និងសាធារណៈជនទូទៅ។  ឯកឧត្តមបន្ថែមថា សាលាក្ដីខ្មែរក្រហមមានបំណង​ផ្សព្វផ្សាយឱ្យបានទូលំទូលាយនូវបណ្ណសារនៃសំណុំរឿង ដែលមានជាង៣លានទំព័រឯកសារ ការផ្សព្វផ្សាយ និងការអប់រំ  ក្នុងស្មារតីលើកកម្ពស់ការយល់ដឹងនៃដំណើការកាត់​សេចក្តី សមិទ្ធផល និងកេរតំណែលរបស់ អ.វ.ត.ក ដល់យុវជនជំនាន់ក្រោយ។

ជាមួយគ្នានោះដែរ លោក ឃ្នុត រ៉ូហ្សិនហក អនុប្រធានរដ្ឋបាលនៃសាលាក្ដីខ្មែរក្រហមក៏បានជម្រាបជូនឯកឧត្តម សុខ​ ពុទ្ធិវុធ និងសហការី ថា អ.វ.ត.ក មានបំណងចែកចាយចំណេះដឹង និងបង្កើតកម្មវិធីអប់រំផ្សព្វផ្សាយអំពីឯកសារ​របស់ខ្លួន ជូនគ្រូបង្រៀននៅតាមសាលានីមួយៗផងដែរ ដើម្បីឱ្យពួកគេបានយល់ដឹង និងអាចប្រើប្រាស់ឯកសាររបស់​សាលាក្ដីខ្មែរក្រហមសម្រាប់ដាក់បញ្ចូល​ក្នុងកម្មវិធីបង្រៀនក្នុងថ្នាក់​របស់ពួកគេ។ លោកបន្ដថា ការបណ្ដុះបណ្ដាល និងគាំទ្រលោកគ្រូអ្នកគ្រូឱ្យយល់អំពីដំណើការជំនុំជម្រះក្ដីរបស់សាលាក្ដីខ្មែរក្រហម មានសារៈសំខាន់ណាស់ដើម្បីបង្កើនប្រសិទ្ធិភាពអប់រំ និងការផ្ទេរចំណេះដឹងដល់សិស្សានុសិស្ស។

សូមបញ្ជាក់ថា គណៈប្រតិភូរបស់សាលាក្ដីខ្មែរក្រហមដែលអញ្ជើញអមដំណើរឯកឧត្តម​ ក្រាញ់ តូនី ប្រធានរដ្ឋបាលស្តីទី ទៅទស្សនកិច្ចនោះរួមមាន លោក ឃ្នុត រ៉ូហ្សិនហក អនុប្រធានរដ្ឋបាល ឯកឧត្តម ថោង សុជាតិ មន្ដ្រីគ្រប់គ្រងជាន់ខ្ពស់ នៃ អ.វ.ត.ក និងសហការីបច្ចេកទេសចំនួនបីរូប៕

 

ECCC

ECCC

ECCC

ECCC

ECCC

ECCC

ECCC

ECCC

ECCC

ECCC