វ៉ង រិទ្ធ ជាយុវសិស្សម្នាក់ ក្នុងចំណោមសិស្សានុសិស្សជាង ២០០ នាក់ មកពីវិទ្យាល័យ ព្រៃព្នៅ ក្នុងស្រុកពារាំង ខេត្តព្រៃវែង បានមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយសាលាក្ដីខ្មែរក្រហម នៅថ្ងៃទី១៥ ខែមីនា ឆ្នាំ២០២៣ នេះ។ យុវសិស្សថ្នាក់ទី១២ រូបនេះបានលើកឡើងថា រូបគាត់មានការរីករាយជាខ្លាំងដែលបានឱកាសមកចូលរួមក្នុងដំណើរទស្សនកិច្ចសិក្សានេះ។ លោកបន្ដថា កម្មវិធីនេះនឹងជួយឱ្យរូបលោក ក៏ដូចជាមិត្តរួមវិទ្យាល័យទាំងអស់ នឹងទទួលបានចំណេះដឹងយ៉ាងច្រើនបន្ថែមពីការអានសៀវភៅមេរៀន អំពីរបបប្រល័យពូជសាសន៍ខ្មែរក្រហម។
យុវជនរូបនេះបញ្ជាក់ថា «ចំពោះខ្ញុំគិតថា ដំណើរទស្សនកិច្ចសិក្សានេះសំខាន់មែនទែន ព្រោះអីយើងសិក្សានៅក្នុងសាលាវាអត់បានចំណេះដឹងច្រើនដូចយើងបានមកទស្សនកិច្ចផ្ទាល់ទេ មកទស្សនកិច្ចផ្ទាល់ ស្ដាប់ហ្គាយ (មគ្គុទេសន៍) ស្ដាប់អ្នកអត្ថាធិប្បាយ យើងមានការយល់ដឹងច្រើនបន្ថែពីសៀវភៅពុម្ភដែលគេបានរៀបរៀងឡើង។» យុវជនវ័យ១៨ ឆ្នាំរូបនេះបន្ថែមថា ការយល់ដឹងអំពីប្រវត្តិសាស្ដ្រខ្មៅងងឹតរបស់កម្ពុជានេះ ក៏ជាការរួមចំណែកក្នុងការទប់ស្កាត់របបប្រល័យពូជសាសន៍កើតឡើងជាថ្មីម្ដងទៀតបាននោះដែរ។
យុវសិស្សម្នាក់ទៀត ឈ្មោះ វ៉ាន់ ឆានុ ក៏បានលើកឡើងស្រដៀងគ្នានេះដែរ ដោយលោកថា ការចូលរួមក្នុងដំណើរទស្សនកិច្ចរបស់សាលាក្ដីខ្មែរក្រហមនេះ នឹងផ្ដល់ចំណេះដឹងដល់យុវជនបន្ថែមអំពីទង្វើដ៏ព្រៃផ្សៃរបស់ខ្មែរក្រហម ប្រព្រឹត្តលើប្រជាពលរដ្ឋកម្ពុជា នៅក្នុងរបបកម្ពុជាប្រជាធិបតេយ្យ។ លោកបន្ដថា ការចូលរួមក្នុងទស្សនកិច្ចនេះ លោកមានឱកាសបានឃើញរូបភាពភាពដែលខ្មែរក្រហមបានឃុំឃាំង សួរចម្លើយ ធ្វើទារុណកម្ម និងការសម្លាប់លើពលរដ្ឋស្លូតត្រង់។ បើតាមយុវសិស្សថ្នាក់ទី១១ រូបនេះ លោកចង់ឱ្យសិស្សានុសិស្សតាមសាលាផ្សេងៗបានមកចូលរួមក្នុងកម្មវិធីទស្សនកិច្ចសិក្សារបស់សាលាក្ដីខ្មែរក្រហមនេះផងដែរ ដើម្បីឱ្យពួកគេបានឃើញ និងយល់ដឹងរឿងរ៉ាវដែលកើតនៅតាមទីតាំងរបស់ប្រវត្ដិតសាស្ដ្រកម្ពុជាទាំងនេះ។
យុវជនទាំងពីររូប ក៏ដូចជាសិស្សានុសិស្សទាំងអស់ ក៏បានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ហើយយុវសិស្សទាំងនេះក៏បានថ្លែងអំណរគុណសាលាក្ដីខ្មែរក្រហម ដែលបានរៀបចំកម្មវិធីដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមជម្រាបជូនថា នៅថ្ងៃទី១៥ ខែមីនា ឆ្នាំ២០២៣ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្ស ជាង ២០០នាក់ មកពីវិទ្យាល័យ ព្រៃព្នៅ ក្នុងស្រុកពារាំង ខេត្តព្រៃវែង។ ការរៀបចំដំណើរទស្សនកិច្ចសិក្សានេះ គឺដើម្បីផ្ដល់ឱ្យសិស្សទាំងអស់បានចងចាំ និងបានឈ្វេងយល់ស៊ីជម្រៅអំពីឧក្រិដ្ឋកម្មដ៏សាហាវយង់ខ្នង ដែលបានកើតឡើងនៅក្នុងរបបឃោរឃៅខ្មៅងងឹត និងដើម្បីរំឮកវិញ្ញាណក្ខ័ណជនរងគ្រោះពីរបបនោះផងដែរ។
ក្នុងដំណើរទស្សនកិច្ចសិក្សានៅថ្ងៃទី១៥ ខែមីនា នេះ យុវសិស្សទាំងអស់បានទៅទស្សនកិច្ចសិក្សានៅវិមានឈ្នះឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងមានបទបង្ហាញមន្ដ្រីមកពីសាលាក្ដីខ្មែរក្រហម អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យផងដែរ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ យុវជន និងសិស្សានុសិស្សទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបប្រល័យពូជសាសន៍ខ្មែរក្រហម ដំណើការជំនុំជម្រះក្តីលើអតីតមេដឹកនាំខ្មែរក្រហម និងការពលីរបស់ថ្នាក់ដឹកនាំកម្ពុជាដើម្បីរំដោះប្រទេសជាតិចេញពីរបបប្រល័យពូជសាសន៍នោះ៕
