លោក នេត្រ ភក្ដ្រា ប្រធានផ្នែកកិច្ចការសាធារណៈ ទទួលស្វាគមន៍ លោកគ្រូអ្នកគ្រូចំនួន ៤៥០ នាក់មកពីខេត្តព្រះសីហនុ

ECCC

លោក នេត្រ ភក្ដ្រា ប្រធានផ្នែកកិច្ចការសាធារណៈ និងជាអ្នកនាំពាក្យនៃអង្គជំនុំជម្រះវិសាមញ្ញក្នុ​ង​តុលា​​ការកម្ពុជា (អ.វ.ត.ក) ទទួលស្វាគមន៍លោ​កគ្រូ អ្នកគ្រូចំនួន ៤៥០ នាក់មកពី​ខេត្ត​ព្រះ​សី​ហនុ​នាថ្ងៃទី២២ ខែមីនា ឆ្នាំ​២០២៣ នៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង ​។ ដំណើរ​ ទស្សន​កិច្ចសិក្សា​របស់​លោកគ្រូ​អ្នកគ្រូ​ ​ដែល​រៀបចំឡើងដោយក្រុ​ម​ការងាររាជរដ្ឋាភិបាល​ចុះមូល​ដ្ឋាន​ខេត្ត​ព្រះសីហនុ នៅទីតាំង​ដែលជាអតីតមន្ទីរសន្តិសុខ និងជា​គុក​សម្ងាត់របស់ខ្មែរក្រហមនេះ គឺក្នុង​គោល​បំណង​​ស្វែងយល់អំពីឧក្រិដ្ឋកម្ម​ដែលកើត​មាន​ឡើង​នៅ​របប​កម្ពុ​ជា​ប្រជា​ធិ​​បតេយ្យ ជាពិសេស​ឧក្រិ​ដ្ឋកម្មដែលបានកើតឡើងនៅក្នុងសារ​មន្ទីរ​ឧក្រិ​ដ្ឋកម្មប្រ​ល័យ​ពូជ​សាសន៍​ទួលស្លែង ។

នៅក្នុងពេលស្វាគមន៍នោះ លោកប្រធានផ្នែកកិច្ចការសាធារណៈ ក៏បានចូល​រួមធ្វើបទបង្ហាញ​ខ្លីជូន​លោក​​គ្រូអ្នកគ្រូ អំពីសមិទ្ធផលសម្រេចបានដោយអង្គជំនុំជម្រះវិសាមញ្ញក្នុងតុលាការកម្ពុជា (សា​លា​ក្តី​ខ្មែរក្រ​ហម​) និងបុព្វហេតុនៃការជំនុំជម្រះក្តី៖ ចេញពីការសង្គ្រោះជាតិនិងប្រជាជន មក​ការ​នាំ​យកសុខសន្តិភាពពេញលេញ និងការកាត់សេចក្តីលើអ្នកទទួលខុស​ត្រូវចំពោះឧក្រិដ្ឋកម្ម និងការ​ផ្តល់​យុត្តិធម៌ជូនជនរងគ្រោះ។ លោក​បន្ដ​​ថា លោកគ្រូអ្នកគ្រូដើរតួនា​ទីយ៉ាង​សំខាន់​ក្នុងការ​ផ្សព្វផ្សាយ​បន្ដ​នូវ​ចំណេះ​ដឹងពាក់ព័ន្ធប្រវត្ដិសាស្ដ្ររបបកម្ពុជាប្រជាធិបតេយ្យ ក៏ដូចជាដំណើការ​នៃការជំនុំជម្រះក្ដី ដែល​​បានធ្វើឡើងនៅចំពោះមុខអង្គជំនុំជម្រះវិសា​មញ្ញ​ក្នុងតុលាការកម្ពុជា ក្នុងគោលបំណង​ចូល​រួម​ទប់​​ស្កាត់បង្កាកុំឱ្យមាន​របប​សាហាវឃោរឃៅដូចរបបខ្មែរក្រហមវិលត្រលប់មកកម្ពុជាសារជាថ្មី។

គួររំឮកថា ​មាន​គ្រូ​អ្នកគ្រូចំនួន ១ ៣២៥ នាក់​​ហើយ​ដែល​មកពីខេត្ត​ព្រះសីហនុ បាន​ស្ដាប់​ការ​ធ្វើ​បទ​បង្ហាញ​ពី​លោក នេត្រ ភក្ដ្រា ប្រធានផ្នែកកិច្ច​ការ​សាធារណៈ នៃសាលាក្ដីខ្មែរក្រហម អំពីសមិទ្ធផល​សម្រេច​បានដោយអង្គជំនុំជម្រះវិសាមញ្ញក្នុងតុលាការកម្ពុជា និងបុព្វហេតុនៃការជំនុំជម្រះក្តី​។

ក្រៅពី​ទស្សនកិច្ចសិក្សា​ខាងលើ ជារៀងរាល់​សប្ដាហ៍ សាលាក្ដីខ្មែរក្រហមក៏​បានរៀបចំទស្សនកិច្ច​សិក្សា និងធ្វើបទ​បង្ហាញ​អំពីដំណើ​ការជំនុំជម្រះក្ដីលើអតីតមេដឹកនាំជាន់ខ្ពស់ និងអ្នកទទួលខុសត្រូវក្នុ​ង​​របបខ្មែរក្រហម ជូន​សិស្សា​នុ​សិស្ស និ​ស្សិត យុវជន និងពលរដ្ឋទូទៅ ដើម្បីជួយ​ជម្រុញ​ដល់​ការ​ចង​ចាំ និងការចូល​រួមទប់​ស្កាត់​ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរ​ក្រហម​មក​លើ​ទឹក​ដី​កម្ពុជាសាជាថ្មី។ ចា​ប់​តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារ​ណ​ជន​ជាតិ និងអន្តរជាតិ​ជាង​កន្លះ​លាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោម​ការ​សម្រប​សម្រួល និងរៀបចំ​ដោ​យ​ផ្នែក​កិច្ចការសាធារណៈនៃសាលាក្តីខ្មែរក្រហម៕

 

ECCC

ECCC

eccc

ECCC

ECCC

ECCC

ECCC

ECCC

ECCC