នៅចន្លោះពីថ្ងៃទី ១ ដល់ ៥ ខែ កក្កដា ឆ្នាំ ២០២៤ អង្គភាពគាំពារជនរងគ្រោះ និងមេធាវីដើមបណ្តឹងរដ្ឋប្បវេណីបានធ្វើដំណើរជាមួួយនឹងកម្មវិធីផ្សព្វផ្សាយនៃមជ្ឈមណ្ឌលធនធានចល័តរបស់ អ.វ.ត.ក. (ឡានក្រុង) ទៅកាន់ខេត្តតាកែវ។ ជារួម មានដើមបណ្តឹងរដ្ឋប្បវេណីចំនួន ៣២ នាក់ (ស្រី១៥) ត្រូវបានជូនដំណឹង និងទទួលបាននូវ សៀវភៅសង្ខេបនៃសាលក្រម/សាលដីកាក្នុងសំណុំរឿង ០០២/០១ និង ០០២/០២ និងវិញ្ញាបនបត្រថ្លែងអំណរគុណ។
សហសេវិករបស់យើងបានជួបជាមួយនឹងដើមបណ្តឹង ២២ នាក់នៅសាលាចំនួន៤ ជារួមមាន វិទ្យាល័យហុ៊ន សែន អង្គតាសោម វិទ្យាល័យជា ស៊ីម តាកែវ វិទ្យាល័យសុខ អាន ទន្លាប់ និង សកលវិទ្យាល័យប៊ៀលប្រាយ ហើយបានសម្របសម្រួលឲ្យពួកគាត់បានចូលរួមក្នុងកម្មវិធីផ្សព្វផ្សាយរបស់ អ.វ.ត.ក. និងជួបពិភាក្សាអន្តរជំនាន់ជាមួយនឹងសិស្ស និស្សិត នៅក្នុងបរិវេណសាលាទាំងនោះ។
ដើម្បីជួបជាមួយនឹងដើមបណ្តឹងរដ្ឋប្បវេណីដែលមិនអាចធ្វើដំណើរមកកាន់សាលាបាន បុគ្គលិករបស់អង្គភាពគាំពារជនរងគ្រោះ បានធ្វើដំណើរទៅកាន់ភូមិចំនួន១០ ដែលស្ថិតនៅក្នុងតំបន់ជុំវិញសាលាទាំងនោះ។ ក្នុងបេសកកម្មនោះ យើងបានជួប និង ជូនដំណឹងដល់មនុស្ស ១០នាក់ ដែលជាដើមបណ្តឹងរដ្ឋប្បវេណី ប្តីឫប្រពន្ធ ឫសាច់ញាតិរបស់អ្នកដែលបានចែកឋានទៅ ឫក៏អ្នកដែលបានរើទីលំនៅទៅរស់នៅកន្លែងផ្សេង។
អង្គភាពគាំពារជនរងគ្រោះនឹងបន្តជូនដំណឹងដល់ដើមបណ្តឹងរដ្ឋប្បវេណីដែលនៅសែសសល់ដ៏ទៃផ្សេងទៀត ដោយសហការជាមួយនឹងកម្មវិធីផ្សព្វផ្សាយនៃមជ្ឍមណ្ឌលធនធានចល័តនៃ អ.វ.ត.ក. ក្នុងដំណើរចុះទៅផ្សព្វផ្សាយបន្តបន្ទាប់ខាងមុខទៀត។
