ឆ្លើយតបនឹងកំណត់សំគាល់ របស់លោកសហចៅក្រមស៊ើបអង្កេតអន្តរជាតិបម្រុង ទាក់ទងនឹងការបញ្ជូនត្រឡប់វិញនូវសំណុំឯកសារដែលការិយាល័យរដ្ឋបាលផ្ញើជូនអង្គបុរេជំនុំជម្រះ តាមរយៈលិខិតលេខ១០៩៤ អ.វ.ត.ក/Ad ចុះថ្ងៃទី១៦ ខែធ្នូ ឆ្នាំ២០១១ និងតាមរយៈលិខិតលេខ១០១៤ អវតក/រប ចុះថ្ងៃទី១៩ ខែមករា ឆ្នាំ២០១២ និងទាក់ទងនឹងសំណើសុំដាក់បណ្តឹងដិតចិត្តចំពោះចៅក្រម ប្រាក់ គឹមសាន ចុះថ្ងៃទី០៨ ខែកុម្ភៈ ឆ្នាំ២០១២ របស់លោកសហចៅក្រមស៊ើបអង្កេតអន្តរជាតិបម្រុង ចៅក្រម
ជាតិនៃអង្គបុរេជំនុំជម្រះសូមបង្ហាញហេតុផលពិត ដូចតទៅ៖
លោកសហចៅក្រមស៊ើបអង្កេតអន្តរជាតិបម្រុង បានចូលបំពេញការងារនៅការិយាល័យសហចៅក្រមស៊ើបអង្កេត ដោយចាប់ផ្តើមពីទំនាក់ទំនងជាមួយសហចៅក្រមស៊ើបអង្កេតជាតិ តាមរយៈលិខិតចុះថ្ងៃទី០២ ខែធ្នូ ឆ្នាំ២០១១ ហើយលោក Laurent បានទទួលនូវការឆ្លើយតបពីសហចៅក្រមស៊ើបអង្កេតជាតិវិញ តាមរយៈលិខិតចុះថ្ងៃទី០៥ ខែធ្នូ ឆ្នាំ២០១១ និងសេចក្តីប្រកាសព័ត៌មាន ចុះថ្ងៃទី០៦ ខែធ្នូ ឆ្នាំ២០១១។
ក្នុងលិខិតចុះថ្ងៃទី០៥ ខែធ្នូ ឆ្នាំ២០១១ សហចៅក្រមស៊ើបអង្កេតជាតិ បានបញ្ជាក់ជាអាទិថា៖ “.....អំពីការចាប់ផ្តើមចំណាត់ការនីតិវិធីដែលខ្ញុំអាចពិភាក្សាជាមួយលោកចៅក្រមបាន គឺក្រោយពេលមានការតែងតាំងលោកចៅក្រមដោយឧត្តមក្រុមប្រឹក្សានៃអង្គចៅក្រមនៃព្រះរាជាណាចក្រកម្ពុជាជាមុនសិន....”។ តាមសេចក្តីប្រកាស
ព័ត៌មាន ចុះថ្ងៃទី០៦ ខែធ្នូ ឆ្នាំ២០១១ សហចៅក្រមស៊ើបអង្កេតជាតិបានបញ្ជាក់ជាថ្មីទៀតថា៖ “....សហចៅក្រមស៊ើបអង្កេតអន្តរជាតិបម្រុង ត្រូវតែរង់ចាំទទួលការ
តែងតាំងជាផ្លូវការតាមនីតិវិធីជាធរមានជាមុនសិន មុននឹងចាប់ផ្តើមការងារបស់ខ្លួន”។
តាមខ្លឹមសារឯកសារទាំងពីរខាងលើ លោក Laurent ពុំបានជួបប្រជុំពិភាក្សាដើម្បីចាប់ផ្តើមធ្វើការងារជាមួយសហចៅក្រមស៊ើបអង្កេតជាតិដែលឈានទៅដល់ការខ្វែងយោបល់ បង្កើតបានជាកំណត់ហេតុនៃការខ្វែងយោបល់គ្នាទាក់ទងនឹងកិច្ចស៊ើបសួរណាមួយ ដែលលោក Laurent ចង់ធ្វើ ឬចាប់ផ្តើមធ្វើក្នុងសំណុំរឿង ០០៣ និងសំណុំរឿង ០០៤ ឡើយ។ ដូច្នេះអ្វីដែលកើតឡើងនៅការិយាល័យសហចៅក្រមស៊ើបអង្កេត គឺវិវាទទាក់ទងនឹង នីតិសម្បទារបស់លោកសហចៅក្រមស៊ើបអង្កេតអន្តរជាតិបម្រុងដែលពុំស្ថិតនៅក្នុងសមត្ថកិច្ចនៃ អ.វ.ត.ក ឡើយ។
ដោយសារនៅការិយាល័យសហចៅក្រមស៊ើបអង្កេត កំពុងតែមានការយល់មិនស្របគ្នាលើបញ្ហានីតិសម្បទានោះលោក Laurent មិនគួរព្យាយាមធ្វើកិច្ចណាមួយ ឬដាក់សំណើណាមួយមកអង្គបុរេជំនុំជម្រះឲ្យដោះស្រាយនោះទេ លោកគួរតែស្វែងរកការបញ្ជាក់ពីនីតិសម្បទារបស់លោកតាមផ្លូវច្បាប់ពីស្ថាប័នមានសមត្ថកិច្ចជាមុន មុននឹងបន្តកិច្ចនីតិវិធីណាមួយក្នុងការស៊ើបសួររបស់លោកព្រោះថា អង្គបុរេជំនុំជម្រះមិនមានយុត្តាធិការក្នុងការដោះស្រាយបញ្ហានីតិសម្បទានោះទេប៉ុន្តែលោកនៅតែបង្ខំធ្វើកិច្ចការទាំងនេះដោយបំពានទាំងខ្លួនពុំទាន់ទទួលបាននីតិសម្បទាស្របច្បាប់ពីស្ថាប័នមានសមត្ថកិច្ច ដែលជាហេតុបង្កើតអោយមានរឿងរ៉ាវទាំងអស់ ដែលទាក់ទងនឹងសំណុំរឿង០០៣ និង ០០៤ ដោយឥតអៀនខ្មាស ហើយប្រែក្លាយរឿងរ៉ាវទាំងនេះ អោយទៅជារឿងថ្មីមួយទៀត ក្រោមរូបភាពជា“កំណត់ហេតុនៃការខ្វែងយោបល់រវាងសហចៅក្រមស៊ើបអង្កេត” ហើយបញ្ជូនកំណត់ហេតុដែលលោក Laurent ចាត់ទុកថាជាការខ្វែងយោបល់រវាងសហចៅក្រមស៊ើបអង្កេតមកចំពោះមុខអង្គបុរេជំនុំជម្រះ ដើម្បីដោះស្រាយជាសមត្ថកិច្ចតាមវិធាន ៧២ នៃវិធានផ្ទៃក្នុង។
ទង្វើរបស់លោក Laurent បានឆ្លុះបញ្ចាំងយ៉ាងច្បាស់ថែមទៀត តាមរយៈកំណត់សំគាល់របស់លោក ចុះថ្ងៃទី២១ ខែមិនា ឆ្នាំ២០១២ ក្នុងកថាខណ្ឌ ១៧ ដល់ ២០។ លោក Laurent បានបង្ហាញជូនសាធារណៈជន ដោយឥតអៀនខ្មាសនូវរាល់ហេតុការណ៍ដែលកើតមានឡើង ដែលពុំមែនជា “ការខ្វែងយោបល់រវាងសហចៅក្រមស៊ើបអង្កេតទាល់តែសោះ”។
ដូច្នេះលោក Laurent ជាអ្នកប្រឌិត “កំណត់ហេតុនៃការខ្វែងយោបល់គ្នារវាងសហចៅក្រមស៊ើបអង្កេត” លោក Laurent ជាអ្នកបង្កើតនូវនីតិវិធីច្របូកច្របល់នៅ
ចំពោះមុខអង្គបុរេជំនុំជម្រះ ដែលពុំធ្លាប់កើតមានពីមុនមក បង្កើតបានជាអនីយ័តភាពក្នុងការដោះស្រាយរឿងនៅចំពោះមុខអង្គបុរេជំនុំជម្រះ។ អាស្រ័យហេតុនេះ មធ្យោ បាយតែមួយគត់ដើម្បីកំចាត់ភាពច្របូកច្របល់ទាំងនេះ សំណុំឯកសារទាំងមូលត្រូវបញ្ជូនត្រឡប់ទៅម្ចាស់ដើមវិញ តាមរយៈលិខិតចុះថ្ងៃទី០៣ ខែកុម្ភៈ ឆ្នាំ២០១២។
បន្ទាប់មក នៅថ្ងៃទី ០៨ ខែ កុម្ភៈ ឆ្នាំ ២០១២ មានសំណុំឯកសារមួយត្រូវបានបញ្ជូនមកចំពោះមុខអង្គបុរេជំនុំជម្រះ។
នៅពេលនោះក្រឡាបញ្ជីបានដាក់សំណុំឯកសារនេះ ជូនប្រធានអង្គបុរេជំនុំជម្រះដើម្បីពិនិត្យ។ បន្ទាប់ពីបានពិនិត្យសំណុំឯកសារនេះឃើញថា ជាសំណុំឯកសារដែលចុះ
ថ្ងៃទី ១៦ ខែធ្នូ ឆ្នាំ២០១១ និងចុះថ្ងៃទី១៩ ខែ មករា ឆ្នាំ២០១២ របស់លោក Laurent ដដែល ដោយមិនមានអ្វីប្រែប្រួលនោះទេ ហើយក៏មិនបានដាក់ភ្ជាប់នូវលិខិត
បញ្ជាក់ពីនីតិសម្បទាតាមផ្លូវច្បាប់របស់ខ្លួន ដើម្បីបំពេញនូវចំណុចខ្វះខ្វាត។ សំណុំឯកសារនេះមិនបានទទួលយកមកដោះស្រាយនៅចំពោះមុខអង្គបុរេជំនុំជម្រះទេ ដោយលោកប្រធានអង្គបុរេជំនុំជម្រះមិនអនុញ្ញាតអោយក្រឡាបញ្ជីទទួលយកសំណុំឯកសារនេះ។ ដោយលោកមិនសុខចិត្តនឹងការសម្រេចខាងលើ នៅថ្ងៃទី០៨ ខែកុម្ភៈ ឆ្នាំ២០១២ ដោយលោក Laurentបានដាក់ពាក្យបណ្តឹងប្តឹងដិតចិត្តប្រធានអង្គបុរេជំនុំជម្រះ។
ឆ្លើយតបនឹងសំណើសុំដាក់បណ្តឹងដិតចិត្តនេះ តាមរយៈលិខិតចុះថ្ងៃទី១០ ខែកុម្ភៈ ឆ្នាំ២០១២ លោកចៅ-ក្រម ប្រាក់ គឹមសាន សម្រេចពុំទទួលយកមកពិចារណាឡើយ ដោយហេតុថាលោក Laurent ពុំមានលក្ខណៈសម្បត្តិគ្រប់គ្រាន់តាមផ្លូវច្បាប់ក្នុងការប្តឹងដិតចិត្តចំពោះរូបលោក។