មានដើមបណ្តឹងចំនួន ១១ នាក់ត្រូវបានជូនដំណឹងនៅខេត្តកំពង់ស្ពឺក្នុងដំណើរដែលមានកិច្ចសហការជាមួយនឹងកម្មវិធីផ្សព្វផ្សាយនៃមជ្ឈមណ្ឌលធនធានចល័តរបស់ អ.វ.ត.ក. ចាប់ថ្ងៃទី ៨ ដល់ ១២ កក្កដា នៅវិទ្យាល័យ៥ មានដូចជា វិទ្យាល័យបាត់ដឹង វិទ្យាល័យកំពង់ស្ពឺ វិទ្យាល័យ ហ៊ុន សែនភ្នំស្រួច វិទ្យាល័យ ចាន់ ថ្នាល និង វិទ្យាល័យឧដុង្គ ។
ទំនាក់ទំនងជាមួយនឹងដើមបណ្តឹងរដ្ឋប្បវេណីបានបន្តធ្វើទៀតនៅចន្លោះថ្ងៃទី ២២ ដល់ ២៧ ខែកក្កដា ដោយអង្គភាពគាំពារជនរងគ្រោះធ្វើដំណើរជាមួយនឹងកម្មវិធីផ្សព្វផ្សាយរបស់ អ.វ.ត.ក. ទៅកាន់ខេត្ត កំពត និងកែប។ មានដើមបណ្តឹងចំនួន ៣០ នាក់ ត្រូវបានជូនដំណឹងក្នុងដំណើរទៅកាន់ខេត្តទាំងពីនេះ ។ ក្នុងចំណោមអ្នកទាំងនោះ មាន៦ នាក់ត្រូវបានជូនដំណឹងផ្ទាល់ដល់ភូមិរបស់គាត់ និងមាន២៤នាក់បានជួបប្រជុំនៅតាមសាលាទាំង ៦ ដោយមាន វិទ្យាល័យ ហ៊ុន សែន ឈូក វិទ្យាល័យមិត្តភាពកម្ពុជា ជប៉ុន វិទ្យាល័យ ប៊ុនរ៉ានី ហ៊ុន សែន ចរិយ៉ាវង្ស វិទ្យាល័យ ហ៊ុន សែន ចំការដូង វិទ្យាល័យព្រះបិតាជាតិ វិទ្យាល័យ ជា ស៊ីម អង្គរជ័យ។
ដើមបណ្តឹងរដ្ឋប្បវេណីក៏មាន ឱកាសផងដែរក្នុងការទស្សនាមជ្ឈមណ្ឌលធនធានចល័ត និងផ្ទាំងរូបភាពនៃព្រឹត្តិការណ៍តាមកាលប្រវត្តិ។ បន្ថែមសកម្មភាពខាងលើ មានកិច្ចសន្ទនាអន្តរជំនាន់ដែលបានរៀបចំឡើងដើម្បីសម្របសម្រួលឲ្យមានការជួបជុំគ្នារវាងដើមបណ្តឹងរដ្ឋប្បវេណី និងសិស្សនុសិស្សថ្នាក់ទី ១១ និង ១២។ កិច្ចពិភាក្សាទាំងនេះអនុញាតឲ្យសិស្សានុសិស្សបានជួបប្រាស្រ័យផ្ទាល់ជាមួយនឹងសាក្សីរស់ និង មន្ត្រីនៃអ.វ.ត.ក. ជម្រុញឲ្យមានការយល់ដឹងអំពីព្រឹត្តិការណ៍ប្រវត្តិសាស្ត្រកាន់តែស៊ីជម្រៅ និងធ្វើឲ្យប្រាកដថាអតីតកាលត្រូវបានចងចាំ និងរៀនសូត្រក្នុងរបៀបមួយប្រកបដោយភាពវិជ្ជមាន និងស្ថាបនា។
ដើមបណ្តឹងរដ្ឋប្បវេណីគឺជាភាគីក្នុងសំណុំរឿង មានសិទ្ធិទទួលបានពត៌មានពាក់ព័ន្ធនឹងសំណុំរឿងនោះ។ ពួកគាត់ត្រូវបានជូនដំណឹងអំពីលទ្ធផលនៃការជំនុំជម្រះ មុខងារដែលនៅសេសសល់នៃ អ.វ.ត.ក. និងត្រូវបានប្រគល់ជូននូវសៀវភៅសង្ខេបនៃសាលក្រម/សាលដីកាក្នុងសំណុំរឿង ០០២/០១ និង ០០២/០២ និងវិញ្ញាបនបត្រថ្លែងអំណរគុណ។
