កិច្ចប្រជុំពេញអង្គលើកទី ៩ របស់ អ.វ.ត.ក បានបញ្ចប់នាថ្ងៃនេះ បន្ទាប់ពីបានជួបប្រជុំចាប់ពីថ្ងៃទី ២១ ដល់ថ្ងៃទី ២៣ ខែកុម្ភៈ ឆ្នាំ២០១១។ កិច្ចប្រជុំពេញអង្គនេះបានពិចារណាទៅលើសំណើសុំធ្វើវិសោធនកម្មវិធានផ្ទៃក្នុង ដើម្បីលើកស្ទួយដល់ការរៀបចំចាត់ចែងសវនាការឲ្យមានប្រសិទ្ធភាព និងធ្វើឲ្យកិច្ចដំណើរការនិតិវិធីជំនុំជម្រះកាន់តែឆាប់រហ័សជាងមុន។
តាមរយៈការបញ្ចប់កិច្ចប្រជុំពេញអង្គនេះ សំណើសុំធ្វើវិសោធនកម្មវិធានផ្ទៃក្នុងចំនួនប្រាំ(៥) ត្រូវបានអនុម័ត ដែលសំណើសុំមួយចំនួនក្នុងចំណោមសំណើសុំទាំងនេះ គឺពាក់ព័ន្ធនឺងអង្គជំនុំជម្រះសាលាដំបូង។ សំណើសុំធ្វើវិសោធនកម្មទាំងនេះ រួមមានការកែសម្រួលវិធានស្ដីពីភាពអាចទទួលយកបាននៃបណ្ដឺងដិតចិត្តចំពោះចៅក្រមណាម្នាក់នៃជំនុំជម្រះសាលាដំបូង។
វិសោធនកម្មវិធានផ្ទៃក្នុងមួយចំនួនទៀត ទាក់ទងនឹងលទ្ធភាពរបស់ជនជាប់ចោទដើម្បីចូលរួមដោយផ្ទាល់នៅចំពោះមុខអង្គជំនុំជម្រះ និងការបន្តដំណើរការនីតិវិធីសវនាការ ដើម្បីជាប្រយោជន៍យុត្តិធម៌ ក៏ត្រូវបានអនុម័តផងដែរ។ដោយសារបញ្ហាសុខភាព ឬបញ្ហាធ្ងន់ធ្ងរដទៃទៀត ដែលបណ្តាលឲ្យជនជាប់ចោទមិនអាចចូលរួមនៅចំពោះមុខអង្គជំនុំជម្រះបាន បទប្បញ្ញត្តិមួយ ក្នុងចំណោមបទប្បញ្ញត្តិទាំងនេះ អនុញ្ញាតឲ្យអង្គជំនុំជម្រះ អាចបន្តដំណើរការនីតិវិធី ដោយអវត្តមានរបស់ជនជាប់ចោទ ឬមួយ ដោយមានការយល់ព្រមពីជនជាប់ចោទ ឬមួយ អវត្តមាននេះបណ្តាលឲ្យមានការយឺតយ៉ាវយ៉ាងខ្លាំងដល់ដំណើរការនីតិវិធី និងក្នុងករណីដែលផលប្រយោជន៍នៃយុត្តិធម៌តម្រូវបែបនេះអង្គជំនុំជម្រះអាចបង្គាប់ឲ្យមានការចូលរួមរបស់ជនជាប់ចោទ តាមរយៈមធ្យោបាយសោតទស្សន៍។
កិច្ចប្រជុំពេញអង្គនេះបានអនុម័តបទប្បញ្ញត្តិថ្មីមួយ ដែលអនុញ្ញាតឲ្យអង្គជំនុំជម្រះសាលាដំបូង ចេញដីកាសម្រេចបំបែកដំណើរការនីតិវិធី និងបំបែកបទចោទមួយផ្នែក ឬទាំងមូលដែលពាក់ព័ន្ធនឹងជនជាប់ចោទម្នាក់ ឬ ច្រើននាក់។
កិច្ចប្រជុំពេញអង្គនេះបានអនុម័តវិសោធនកម្ម ដែលអនុញ្ញាតឲ្យការិយាល័យរដ្ឋបាលអាចចាត់តាំងមេធាវី ក្នុងកាលៈទេសៈដែលសហមេធាវីនាំមុខដើមបណ្តឹងរដ្ឋប្បវេណីទាំងពីររូបមិនអាចបំពេញមុខងាររបស់ខ្លួនបាន នៅក្នុងដំណាក់កាលណាមួយ។
កិច្ចប្រជុំពេញអង្គលើកក្រោយ នឹងត្រូវប្រារព្ធធ្វើនៅខែ សីហា ឆ្នាំ ២០១១ ខាងមុខនេះ។