ក្រុម​ប្រឹក្សា​ឃុំ​ក្នុង​ខេត្ត​កំពត​ធ្វើ​ទស្សនកិច្ច​សិក្សា​ស្វែង​យល់​ពី​សាលាក្តី​ខ្មែរ​ក្រហម


សមាជិក​ក្រុម​ប្រឹក្សា​ឃុំ​ជាង​៣៥០​នាក់​មក​ពី​ខេត្ត​កំពត​បាន​បំពេញ​ទស្សន​កិច្ច​សិក្សា​នៅ​សាលាក្តី​ខ្មែរ​ក្រហម​នៅ​ថ្ងៃ​ទី​១២ ខែ​កក្កដា ឆ្នាំ​២០១១ ដើម្បី​ស្វែង​យល់​អំពី​ដំណើរការ​របស់​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ ក្នុង​ការ​ស្វែង​រក​ការពិត​និង​យុត្តិធម៌​តាម​រយៈ​ការ​ជំនុំ​ជម្រះ​ក្តី​អតីត​មេ​ដឹកនាំ​ជាន់​ខ្ពស់​និង​អ្នក​ទទួល​ខុស​ត្រូវ​ខ្ពស់បំផុត​​ក្នុង​ឧក្រិដ្ឋកម្ម​ធ្ងន់ធ្ងរ​ក្នុង​របប​កម្ពុជា​ប្រជា​ធិបតេយ្យ ចន្លោះពីឆ្នាំ ១៩៧៥ ដល់ឆ្នាំ១៩៧៩។ ក្រុម​សមាជិក​ឃុំ​ទាំងនេះ​រំពឹង​ថា​នឹង​នាំ​យក​នូវ​ព័ត៌មាន​ទាំង​នេះ​ទៅ​ផ្សព្វផ្សាយ​បន្ត​ជូន​ដល់​ប្រជា​ពលរដ្ឋ​នៅ​ក្នុង​ភូមិ​ឃុំ​របស់​គាត់។

ដំណើរ​ទស្សនកិច្ច​សិក្សា​រយៈពេល​មួយ​ថ្ងៃ​ដែល​រៀបចំ​ដោយ​ផ្នែក​កិច្ចការ​សាធារណៈ​នៃ​សាលាក្តី​ខ្មែរ​ក្រហម​នេះ​ អ្នក​ចូលរួម​ទាំងអស់​បាន​ទស្សនា​គុក​ទួល​ស្លែង និង​តំបន់​វាល​ពិឃាត​ជើងឯក​និង​ធ្វើ​ទស្សនកិច្ច​សិក្សា​នៅ​ទីតាំង​នៃ​អង្គ​ជំនុំ​ជម្រះ​វិសាមញ្ញ​ដោយ​ផ្ទាល់ និង​ទទួល​បាន​ការ​ផ្តល់​ឧទ្ទេសនាម​ពី​ក្រុម​មន្ត្រី​កិច្ចការ​សាធារណៈ​ទាក់ទង​នឹង​ប្រវត្តិ​នៃ​ការ​កកើត​សាលាក្តី​ ដំណើរ​ការ​នីតិ​វិធី​ និង​ព័ត៌មាន​ទាក់ទង​នឹង​សំណុំរឿង​ផ្សេងៗ​ដែល​កំពុង​ត្រូវ​បាន​ជំនុំជម្រះ។ សំណួរ​ជា​ច្រើន​ទាក់ទង​នឹង​ដំណើរការ​របស់​សាលាក្តី​ត្រូវបាន​ចោទ​សួរ​ឡើង​ដោយ​អ្នក​ចូលរួម​ និង​ត្រូវ​បាន​ឆ្លើយ​បំភ្លឺ​ពី​មន្ត្រី​តុលាការ​ខ្មែរ​ក្រហម។
 
លោក​ ទូច វ៉ាន់ហន មេឃុំ​បន្ទាយ​មាស​ខាងកើត ស្រុក​បន្ទាយ​មាស​ ដែល​ជា​អ្នក​ចូល​រួម​ម្នាក់​ក្នុង​ចំណោម​អ្នក​ចូលរួម​ជា​សមាជិកឃុំសង្កាត់ និងមេភូមិជាច្រើនទៀត បានថ្លែងថា ដំណើរ​ទស្សនកិច្ច​សិក្សា​នេះ​មាន​សារប្រយោជន៍​ណាស់ និងបានផ្តល់នូវព័ត៌មានជាច្រើនទាក់ទងនឹង​របប​ខ្មែរ​ក្រហម និង​សាលាក្តី​ជំនុំ​ជម្រះ​ក្តីនេះ។ លោកទូច វ៉ាន់ហន បានថ្លែងថា៖ «ខ្ញុំ រីករាយនឹង​ដំណើរ​ទស្សនកិច្ច​សិក្សា​ដែល​រៀបចំ​ដោយ​សាលាក្តី​ខ្មែរក្រហម​នេះ។ ខ្ញុំ​បាន​ឃើញ​ដោយ​ផ្ទាល់​នូវ​រណ្តៅ​សាកសព​នៅ​ជើងឯក និង​រូបថត​ជន​រងគ្រោះ​នៅ​គុក​ទួលស្លែង។ ខ្ញុំ​សែន​រន្ធត់​ជា​ខ្លាំង និង​អាណិត​ដល់​ជន​រងគ្រោះ​ទាំង​នោះ។ ពេល​ខ្ញុំ​ឃើញ​រូបភាព​ទាំងនេះ ខ្ញុំ​នឹក​ឃើញ​ពី​អនុស្សាវរីយ៍​របស់​ខ្ញុំ​ដែល​នៅ​ក្នុង​របប​ខ្មែរក្រហម ដែល​ទទួល​រង​ទុក្ខ​វេទនា​យ៉ាង​ខ្លាំង»។
    
លោកទូច វ៉ាន់ហន បានថ្លែងថា លោក​និង​ក្រុម​ប្រឹក្សា​ឃុំ និង​មេភូមិ​ដទៃ​ទៀត​នឹង​យក​នូវ​ព័ត៌មាន​និង​ចំណេះ​ដឹង​ដែល​បាន​ទទួល​នៅ​ក្នុង​អំឡុងពេល​នៃ​ដំណើរ​ទស្សនកិច្ច​សិក្សា​នេះ​ទៅ​ផ្សព្វផ្សាយ​ជូន​ដល់​ប្រជា​ពលរដ្ឋ​ដទៃ​ទៀត​នៅ​ក្នុង​ភូមិ​ឃុំ​អំពី​ដំណើរការ​ជំនុំ​ជម្រះ​ក្តី​នេះ។ លោក វ៉ាន់ហន គូស​បញ្ជាក់​ថា៖ «ខ្ញុំ​នឹង​នាំ​យក​ព័ត៌មាន​និង​ទិដ្ឋភាព​ដ៏​អស្ចារ្យ​នៃ​សាលាក្តី​ខ្មែរក្រហម​ទៅ​ប្រាប់​ដល់​ប្រជាពលរដ្ឋ​យើងខ្ញុំ ហើយ​បើ​គាត់​ចង់​មក​ទស្សនា​ដោយ​ផ្ទាល់​នៅ​សាលាក្តី ខ្ញុំនឹងជួយ​ទំនាក់ទំនង​ជូន​គាត់ក្នុង​នាម​ជាអាជ្ញាធរ»។



ចំណែក​លោក ណឹម បៀវ ប្រធាន​ភូមិ​ត្រពាំង​កញ្ឆែត ឃុំ​សំរោង ស្រុក​ទឹកឈូ ខេត្តកំពត បាន​សម្តែង​នូវ​ការ​រីករាយ​ដែល​បាន​ទទួល​នូវ​ព័ត៌មាន​សំខាន់​ពី​ដំណើរការ​ជំនុំ​ជម្រះ​ក្តី​លើ​អតីត​មេ​ដឹកនាំ​ខ្មែរក្រហម និង​មក​ទស្សនា​ដោយ​ផ្ទាល់​នៅ​ក្នុង​សាល​សវនាការ។ លោកថ្លែងថា៖ «សាលាក្តី​ខ្មែរក្រហម​នឹង​ផ្តល់​យុត្តិធម៌​ដល់​ជន​រងគ្រោះ​ក្នុង​របប​ខ្មែរ​ក្រហម។ ខ្ញុំ​មាន​ការ​អណោច​អធម​យ៉ាង​ខ្លាំង​នៅ​ពេល​ដែល​ខ្ញុំ​ឃើញ​រណ្តៅ​សាកសព​នៃ​ជន​រងគ្រោះ​និង​រូបភាព​ជន​រងគ្រោះ​នៅ​មន្ទីរ ស-២១។ ខ្ញុំ​ជឿជាក់​ថា​យុត្តិធម៌​នឹង​ត្រូវ​បាន​ផ្តល់​ឲ្យ​ដល់​ជន​រងគ្រោះ​តាម​រយៈ​សាលាក្តី​ខ្មែរក្រហម​ដែល​កំពុង​តែ​ធ្វើ​កិច្ចការ​របស់​ខ្លួន​បាន​យ៉ាង​ល្អ​នេះ»។

សាលាក្តី​ខ្មែរក្រហម​បាន​ទទួល​នូវ​ការ​ចូលរួម​យ៉ាង​ច្រើន​ពី​សំណាក់​ប្រជា​ពលរដ្ឋ​កម្ពុជា។ រហូត​មក​ទល់​ពេល​នេះ មាន​ប្រជាជន​ជិត ១០ ម៉ឺននាក់ បាន​មក​ចូលរួម​ទស្សនា​សវនាការ និង​ដំណើរ​ទស្សនកិច្ច​សិក្សា​ដោយ​ផ្ទាល់​ដែល​រៀបចំ​ឡើង​ដោយ​សាលាក្តី​ខ្មែរក្រហម៕

Most read