លោក នេត្រ ភក្ដ្រា ប្រធានផ្នែកកិច្ចការសាធារណៈ ទទួលស្វាគមន៍ លោកគ្រូអ្នកគ្រូចំនួន ៤៥០ នាក់មកពីខេត្តព្រះសីហនុ

លោក នេត្រ ភក្ដ្រា ប្រធានផ្នែកកិច្ចការសាធារណៈ និងជាអ្នកនាំពាក្យនៃអង្គជំនុំជម្រះវិសាមញ្ញក្នុ​ង​តុលា​ការកម្ពុជា (អ.វ.ត.ក) ទទួលស្វាគមន៍លោ​កគ្រូ អ្នកគ្រូចំនួន ៤៥០ នាក់ មកពី​ខេត្ត​ព្រះ​សី​ហនុ​ រៀបចំឡើងដោយក្រុ​ម​ការងាររាជរដ្ឋាភិបាលចុះមូលដ្ឋានខេត្តព្រះសីហនុ នៅព្រឹកថ្ងៃទី១៩ ខែមីនា ឆ្នាំ​២០២៣ នៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង ខណៈពេលដែល​លោក​គ្រូអ្នក​គ្រូ​ទាំង​នោះ អញ្ជើញមកបំពេញទស្សនកិច្ចសិក្សាស្វែងយល់អំពីឧក្រិដ្ឋកម្ម​ដែលកើត​មាន​ឡើង​នៅ​របប​កម្ពុ​ជា​ប្រជា​ធិ​​បតេយ្យ ជាពិសេសឧក្រិដ្ឋកម្មដែលបានកើតឡើងនៅក្នុងសារ​មន្ទីរ​ឧក្រិ​ដ្ឋកម្មប្រ​ល័យ​ពូជ​សាសន៍​ទួលស្លែង ដែលជាអតីតមន្ទីរសន្តិសុខ និងជា​គុក​សម្ងាត់របស់ខ្មែរក្រហម។

នៅក្នុងពេលស្វាគមន៍នោះ លោកប្រធានផ្នែកកិច្ចការសាធារណៈ ក៏បានចូល​រួមធ្វើបទបង្ហាញ​ខ្លីជូន​លោក​គ្រូអ្នកគ្រូផងដែរ អំពីសមិទ្ធផលសម្រេចបានដោយអង្គជំនុំជម្រះវិសាមញ្ញក្នុងតុលាការកម្ពុជា (សា​លាក្តីខ្មែរក្រ​ហម​) និងបុព្វហេតុនៃការជំនុំជម្រះក្តី៖ ចេញពីការសង្គ្រោះជាតិនិងប្រជាជន មក​ការ​នាំ​យកសុខសន្តិភាពពេញលេញ និងការកាត់សេចក្តីលើអ្នកទទួលខុស​ត្រូវចំពោះឧក្រិដ្ឋកម្ម និងការ​ផ្តល់​យុត្តិធម៌ជូនជនរងគ្រោះ។ លោក​បន្ដ​​ថា លោកគ្រូអ្នកគ្រូដើរតួនា​ទីយ៉ាង​សំខាន់​ក្នុងការ​ផ្សព្វផ្សាយ​បន្ដ​នូវ​ចំណេះ​ដឹងពាក់ព័ន្ធប្រវត្ដិសាស្ដ្ររបបកម្ពុជាប្រជាធិបតេយ្យ ក៏ដូចជាដំណើការ​នៃការជំនុំជម្រះក្ដី ដែល​បានធ្វើឡើងនៅចំពោះមុខអង្គជំនុំជម្រះវិសា​មញ្ញ​ក្នុងតុលាការកម្ពុជា ក្នុងគោលបំណង​ចូល​រួម​ទប់​ស្កាត់បង្កាកុំឱ្យមាន​របប​សាហាវឃោរឃៅដូចរបបខ្មែរក្រហមវិលត្រលប់មកកម្ពុជាសារជាថ្មី។

សូមបញ្ជាក់ថា ជារៀងរាល់សប្ដាហ៍ សាលាក្ដីខ្មែរក្រហមបានរៀបចំទស្សនកិច្ច​សិក្សា និងធ្វើបទ​បង្ហាញ​អំពីដំណើ​ការជំនុំជម្រះក្ដីលើអតីតមេដឹកនាំជាន់ខ្ពស់ និងអ្នកទទួលខុសត្រូវក្នុងរបបខ្មែរក្រហម ជូន​សិស្សា​នុ​សិស្ស និ​ស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូល​រួមទប់​ស្កាត់​ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចា​ប់​តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិ​ជាង​កន្លះ​លាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំ​ដោ​យ​ផ្នែក​កិច្ចការសាធារណៈនៃសាលាក្តីខ្មែរក្រហម៕

 

ECCC

ECCC

ECCC

ECCC

ECCC

ECCC

ECCC

ECCC

eccc

eccc

ECCC

eccc

Most read