លោកស្រី Megan Hirst ជនជាតិអូស្រ្តាលី ត្រូវបានជ្រើសរើសជាសហមេធាវីនាំមុខអន្តរជាតិថ្មីតំណាងដើមបណ្តឹងរដ្ឋប្បវេណីនៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ លោកស្រី Megan Hirst ជំនួសតំណែងលោកស្រី Marie Guiraud (ជនជាតិបារាំង) ដែលបានលាលែងពីមុខតំណែងកាលពីខែ មិថុនា ឆ្នាំ២០១៩ ដែលមានសុពលភាពចាប់ពីថ្ងៃទី២៦ ខែសីហា ឆ្នាំ២០១៩។
លោកស្រី Hirst មានបទពិសោធន៍បម្រើការងារក្នុងវិស័យច្បាប់សិទ្ធិមនុស្ស និងច្បាប់ព្រហ្មទណ្ឌអន្តរជាតិ រយៈពេល ១៥ឆ្នាំ។ លោកស្រីមានបរិញ្ញាបត្រច្បាប់ពីសាកលវិទ្យាល័យ Queensland និងបរិញ្ញាបត្រជាន់ខ្ពស់ផ្នែកច្បាប់ពីសាកលវិទ្យាល័យ Cambridge។ រយៈពេលដប់ឆ្នាំកន្លងទៅ លោកស្រី Hirst បានក្លាយជាអ្នកជំនាញផ្នែកការចូលរួមរបស់ជនរងគ្រោះនៅក្នុងកិច្ចដំណើរការនីតិវិធីព្រហ្មទណ្ឌអន្តរជាតិ។ លោកស្រីបានតំណាងឲ្យជនរងគ្រោះនៅចំពោះមុខតុលាការព្រហ្មទណ្ឌអន្តរជាតិ (ICC) នៅក្នុងរឿងក្តីរដ្ឋអាជ្ញា តទល់នឹង Dominic Ongwen និងនៅក្នុងកិច្ចដំណើរការនីតិវិធីនានាមុនការជំនុំជម្រះ ទាក់ទិនទៅនឹងស្ថានភាពនៅក្នុងប្រទេសបង់ក្លាដេស/មីយ៉ានម៉ា និងស្ថានភាពនៅក្នុងប្រទេសអាហ្វហ្គានីស្ថង់។កាលពីមុន លោកស្រីធ្លាប់បម្រើការងារជាក្រឡាបញ្ជីនៅអង្គភាពជនរងគ្រោះ និងសំណងនៃតុលាការ ICC និងនៅអង្គភាពជនរងគ្រោះនៃតុលាការពិសេសសម្រាប់ប្រទេសលីបង់។ លោកស្រីជាសហអ្នកពិនិត្យកែសម្រួលសៀវភៅដែលមានចំណងជើងថា ការចូលរួមរបស់ជនរងគ្រោះនៅក្នុងប្រព័ន្ធយុត្តិធម៌ព្រហ្មទណ្ឌអន្តរជាតិ ហើយបច្ចុប្បន្ននេះ លោកស្រីបម្រើការងារជាសហអនុប្រធានផ្នែកជនរងគ្រោះនៃគណៈមេធាវីនៃតុលាការ ICC (ឆ្នាំ២០១៩-ឆ្នាំ២០២០)។
លោកស្រី ក៏ប្រកបវិជ្ជាជីវៈមេធាវីនៅគណៈមេធាវីប្រទេសអង់គ្លេស និងប្រទេសវ៉ែល ផងដែរ ដោយលោកស្រីតំណាងឲ្យជនរងគ្រោះចំពោះការសួរដេញដោលជាសាធារណៈទៅលើការរំលោភបំពានផ្លូវភេទ។ ក្រៅពីការងារជាមេធាវី លោកស្រី Hirst ទទួលបន្ទុករៀបចំគម្រោងអន្តរជាតិនានាជាប្រចាំ ទាក់ទិននឹងសិទ្ធិមនុស្ស និងការវិវត្តន៍វិធានគតិយុត្តិ។ លោកស្រីមានបទពិសោធន៍យ៉ាងច្រើននៅទីម័រខាងកើត ដោយលោកស្រីបម្រើការងារ តាំងពីឆ្នាំ២០០៥ ពាក់ព័ន្ធនឹងការឆ្លើយតបទៅនឹងអំពើឃោរឃៅជាទ្រង់ទ្រាយធំ និងការពង្រឹងវិស័យយុត្តិធម៌។
លោកស្រី Hirst នឹងធ្វើការជាមួយលោក ពេជ អង្គ ដែលជាសហមេធាវីនាំមុខជាតិតំណាងដើមបណ្តឹងរដ្ឋប្បវេណី នៅក្នុងកិច្ចដំណើរការនីតិវិធីក្នុងសំណុំរឿង ០០២/០២។ ដើមបណ្តឹងរដ្ឋប្បវេណីធានាឲ្យមានការរៀបចំតំណាងប្រកបដោយប្រសិទ្ធភាពសម្រាប់ដើមបណ្តឹងរដ្ឋប្បវេណី ដែលជាជនរងគ្រោះនៃឧក្រិដ្ឋកម្មនានានៅក្នុងយុត្តាធិការរបស់ អ.វ.ត.ក ដែលអាចចូលរួមក្នុងកិច្ចដំណើរការនីតិវិធី និងធ្វើការទាមទារសំណងផ្លូវចិត្ត និងសំណងសមូហភាព។ ការទទួលខុសត្រូវចម្បងរបស់សហមេធាវីនាំមុខតំណាងដើមបណ្តឹងរដ្ឋប្បវេណី រួមមាន តំណាងឲ្យផលប្រយោជន៍ដើមបណ្តឹងរដ្ឋប្បវេណីដែលរួមគ្នាជាក្រុមតែមួយ ផ្តល់នូវការអះអាង និងយុទ្ធសាស្រ្តជាទូទៅ ព្រមទាំងតំណាងនៅចំពោះមុខតុលាការអំពីផលប្រយោជន៍របស់ដើមបណ្តឹងរដ្ឋប្បវេណីដោយសហការយ៉ាងជិតស្និទ្ធជាមួយនឹងមេធាវីដើមបណ្តឹងរដ្ឋប្បវេណីម្នាក់ៗ។