និស្សិតជប៉ុនចំនួន៥រូបមកពីសាកលវិទ្យាល័យឈូ ក្នុងទីក្រុងតូក្យូ ប្រទេសជប៉ុន មកបំពេញទស្សនកិច្ចសិក្សានៅក្នុងទីស្នាក់ការថ្មីរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នាព្រឹកថ្ងៃទី ១៧ ខែកុម្ភៈ ឆ្នាំ២០២៣។ ទស្សនកិច្ចនេះមានត្រូវបានរៀបចំឡើងក្នុងគោលបំណងស្វែងយល់អំពីការគ្រប់គ្រង ការរៀបចំ និងការប្រព្រឹត្ដទៅនៃអង្គជំនុំជម្រះវិសាមញ្ញក្នុងតុលាការកម្ពុជា។
មន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម បានទទួលស្វាគមន៍ និងធ្វើបទបង្ហាញដល់និស្សិតទាំង៥រូប អំពីទិដ្ឋភាពទូទៅនៃការជំនុំជម្រះក្ដីរបស់ អ.វ.ត.ក លើអតីតមេដឹកនាំជាន់ខ្ពស់នៃរបបខ្មែរក្រហម។ បន្ទាប់មកទៀតក៏មានមន្ដ្រីរបស់ អ.វ.ត.ក ក្នុងផ្នែកផ្សេងៗគ្នារួមមាន ផ្នែកគ្រប់គ្រងតុលាការ ផ្នែកគាំពារជនរងគ្រោះ ផ្នែកសហមេធាវីការពារដើមបណ្ដឹងរដ្ឋប្បវេណី និងផ្នែកបណ្ណសារ ធ្វើបទបង្ហាញអំពីការងាររបស់ផ្នែកនីមួយៗ ជូននិស្សិតជប៉ុនទាំង ៥ រូបនេះដែរ៕