ផ្នែកកិច្ចការសាធារណៈ បង្ហាញពីសារៈសំខាន់នៃការជំនុំជម្រះក្ដីលើឧក្រិដ្ឋកម្មកើតឡើងនៅក្នុងរបបខ្មែរក្រហមជូននិស្សិតចំនួនជាង២០០នាក់ មកពីខេត្តកំពង់ចាម

ECCC

ផ្នែកកិច្ចការសាធារណៈ នៃ​អង្គជំនុំជម្រះវិសាមញ្ញ​ក្នុង​តុលាការកម្ពុជា (អ.វ.ត.ក) បង្ហាញពីសារៈ​សំ​ខាន់នៃការជំនុំជម្រះក្ដីលើឧក្រិ​ដ្ឋកម្មកើតឡើងនៅក្នុងរបបខ្មែរក្រហមជូននិស្សិតចំនួនជាង២០០នាក់ មកពីខេត្តកំពង់ចាមនាថ្ងៃទី២២ ខែមីនា ឆ្នាំ២០២៣ នៅក្នុងសារៈមន្ទីរឧក្រិដ្ឋកម្មប្រល័យពូជសាសន៍​ទួល​ស្លែង។

នៅចំពោះមុខនិស្សិត​ដែលចូលរួម​ក្នុងកម្មវិធីទស្សនកិច្ចសិក្សារៀបចំដោយ​អង្គជំនុំជម្រះ​វិសាមញ្ញ​ក្នុង​តុលាការកម្ពុជានេះ លោក នេត្រ ភក្ដ្រា ប្រធានផ្នែកកិច្ចការសាធារណៈ បានលើក​ឡើងថា អ.វ.ត.ក បាន​បញ្ចប់​ការ​ជំនុំជម្រះ​ក្ដី​លើអតីតមេដឹកនាំជាន់ខ្ពស់​ និងអ្នកទទួល​ខុសត្រូវ​នៃរបប​កម្ពុជាប្រជាធិប​តេយ្យ​រួច​រាល់​ហើយ។ លោក​បន្ដថា មាន​អតីតមេដឹកនាំជាន់​ខ្ពស់​ខ្មែរក្រហម​មួយរូប គឺ ខៀវ សំផន ត្រូវ​បាន​ផ្ដន្ទា​ទោ​ស​​ដាក់​ពន្ធធនាគារអស់មួយ​ជិវិត ហើយសព្វថ្ងៃនេះ អតីតប្រមុខរដ្ឋរបបខ្មែរក្រហមរូប​នេះ​កំពុងអនុវត្ត​ទោស​នៅក្នុងពន្ធនាគារនៅក្នុងខេត្តកណ្ដាល។ អ្នកនាំពាក្យរូបនេះបន្ថែមថា បន្ទាប់​ពី​ការ​​ជំនុំ​ជម្រះក្ដីចប់ សាលាក្ដីខ្មែរ​ក្​រហម​ត្រូវ​ធ្វើការ​ងារស្នូល​រយៈពេលបីឆ្នាំបន្ថែម​ទៀតទៅលើ​ការ​រៀប​ចំ និង​រក្សាឯក​សារ​ជាង​បីលាន​ទំព័រ​ទុកជាកេរដំណែល​សម្រាប់​កូនចៅជំនាន់​ក្រោយ និងការ​ផ្សព្វ​ផ្សាយ​​​អំពី​ដំណើការ​ជម្រះក្ដី​​របស់​សាលាក្ដីដែលបានអនុវត្តកន្លងមក ក៏ដូចជា​ប្រវត្តិសាស្ដ្រ​ទាក់​ទង​នឹង​របប​​កម្ពុជា​ប្រជាធិប​តេយ្យ​ជូន​សាធារណៈជនយល់ដឹង​ និងការ​ចងចាំ​។   

លោក នេត្រ ភក្ដ្រា បន្ថែមថា សមិទ្ធិ​ផល​សម្រេច​បាន​ដោយ អ.វ.ត.ក និងបុព្វហេតុនៃការ​ជំនុំជម្រះក្តី នេះ គឺកើតចេញពីការសង្គ្រោះជាតិនិងប្រជាជន មក​ការ​នាំ​យកសុខសន្តិភាព​ពេញ​លេញ និងការ​កាត់​សេចក្តីលើអ្នកទទួលខុស​ត្រូវចំពោះឧក្រិដ្ឋកម្ម និង​ការ​ផ្តល់​យុត្តិធម៌ជូន​ជនរង​គ្រោះ​។ លោក​បន្ដ​​ថា និស្សិត និងយុវជនទាំងឡាយ​ ដើរតួនា​ទីយ៉ាង​សំខាន់​ក្នុងការ​ផ្សព្វផ្សាយ​បន្ដ​នូវ​ចំណេះ​ដឹង​ពាក់ព័ន្ធ​ប្រវត្ដិ​សាស្ដ្ររបបកម្ពុជាប្រជាធិបតេយ្យ ក៏ដូចជាដំណើការ​នៃការជំនុំជម្រះក្ដី ដែល​​បានធ្វើ​ឡើង​នៅ​ចំពោះមុខអង្គជំនុំជម្រះវិសា​មញ្ញ​ក្នុងតុលាការកម្ពុជា ក្នុងគោលបំណង​ចូល​រួម​ទប់​​ស្កាត់បង្កា​កុំ​ឱ្យមាន​របប​សាហាវឃោរឃៅដូចរបបខ្មែរក្រហមវិលត្រលប់មកកម្ពុជាសារជាថ្មី។

ក្នុងដំណើរទស្សនកិច្ចសិក្សានៅថ្ងៃនេះ សិស្សានុសិស្ស​ទាំងអស់​បានទៅទស្សនកិច្ចសិក្សា​នៅ​សារៈ​មន្ទីរ​ឧក្រិដ្ឋកម្ម​ប្រល័យពូជសាសន៍ទួលស្លែង មជ្ឈ​មណ្ឌល​ប្រល័យពូជសាសន៍ជើងឯក និង​វិមាន​ឈ្នះ​ឈ្នះ​។ ក្រោយ​ពេល​បញ្ចប់​ទស្សន​កិច្ច​សិក្សា​នៅ​ក្នុង​មួយ​ថ្ងៃ​នេះ សិស្សា​នុសិស្ស​​ទាំងអស់​បាន​ទទួល​ព័ត៌​មាន និង​ចំណេះដឹង​យ៉ាងច្រើន​ជុំ​វិញការ​ធ្វើទារុណ​កម្ម​យ៉ាង​ព្រៃ​ផ្សៃ និង​ការកាប់សម្លាប់​ប្រ​ជា​​ពល​រដ្ឋ​កម្ពុជា​នៅ​ក្នុង​របប​ប្រល័យ​ពូជ​សាសន៍​ខ្មែរ​ក្រហម ​ដំណើ​ការ​ជំនុំ​ជម្រះ​ក្តី​លើ​អតីត​មេដឹក​នាំខ្មែរក្រហម​ និង​ការ​ពលី​របស់​ថ្នាក់ដឹក​នាំកម្ពុជា​ដើម្បី​រំដោះ​ប្រទេស​ជាតិ​ចេញ​ពី​របប​ប្រល័យ​ពូជសា​សន៍​នោះ។

សូមបញ្ជាក់​ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និង​ពលរដ្ឋទូទៅ ដើ​ម្បី​ជួយជម្រុញដល់​ការចងចាំ និងការចូលរួម​ទប់​ស្កាត់ការវិល​ត្រ​ឡប់​មកវិញនូវ​អំពើឃោរឃៅ​ ដូចក្នុងរបបខ្មែរក្រហមមកលើ​ទឹក​ដី​កម្ពុជាសាជាថ្មី។​ចាប់តាំងពីតុលាការ​ដំ​ណើ​ការដំបូង រហូតមកដល់ឆ្នាំ​២០២៣ នេះ សាធារណ​ជនជាតិ និង​អន្តរ​ជាតិ​​ជាងកន្លះ​លាន​នាក់​ហើយ​ បានចូលរួមក្នុងដំណើរទស្សនកិច្ចសិក្សា ក្រោមការសម្រប​សម្រួល និង​រៀបចំ​ដោយផ្នែកកិច្ចការ​សាធារណៈ​នៃសាលាក្តីខ្មែរក្រហម៕

ECCC

ECCC

ECCC

ECCC

ECCC

ECCC

Most read