ប្រធានផ្នែកកិច្ចការសាធារណៈ ធ្វើបទបង្ហាញពីសារៈសំខាន់នៃការជំនុំជម្រះក្ដីលើឧក្រិដ្ឋកម្មកើតឡើងនៅក្នុងរបបខ្មែរក្រហម និងសមិទ្ធិផលនៃការជំនុំជម្រះក្ដីជូន លោកគ្រូអ្នកគ្រូចំនួនជាង៣០០ នាក់មកពីខេត្តព្រះសីហនុ

eccc

លោក នេត្រ ភក្ដ្រា ប្រធានផ្នែកកិច្ចការសាធារណៈ និងជាអ្នកនាំពាក្យនៃអង្គជំនុំជម្រះវិសាមញ្ញក្នុ​ង​តុ​លា​​​ការកម្ពុជា (អ.វ.ត.ក) បានទទួលស្វាគមន៍ និងធ្វើបទបង្ហាញពីសារៈសំខាន់នៃ​ការ​​ជំនុំជម្រះក្ដីលើ​ឧក្រិ​ដ្ឋកម្មកើតឡើងនៅក្នុងរបបខ្មែរក្រហម និងសមិទ្ធិផលនៃការជំនុំជម្រះក្ដីជូនលោកគ្រូអ្នក​គ្រូចំនួន​ជាង​៣០០ នាក់មកពីខេត្តព្រះសីហនុ នាថ្ងៃទី២៥ ខែមីនា ឆ្នាំ​២០២៣ នៅក្នុងសារៈ​មន្ទី​រ​ឧក្រិដ្ឋ​កម្ម​ប្រ​ល័យ​ពូជសាសន៍ទួលស្លែង​។ ដំ​ណើរ​​ទស្សន​កិច្ចសិក្សា​របស់​លោកគ្រូ​អ្នកគ្រូ​ ​ដែល​រៀបចំឡើងដោយក្រុ​ម​ការងាររាជរដ្ឋាភិបាល​ចុះ​មូល​​ដ្ឋាន​ខេត្ត​ព្រះ​សី​ហនុ នៅទីតាំង​ដែលជាអតីតមន្ទីរសន្តិសុខ និងជា​គុក​សម្ងាត់​របស់ខ្មែរ​ក្រ​ហមនេះ គឺក្នុង​គោល​បំណង​​ស្វែងយល់អំពីឧក្រិដ្ឋកម្ម​ដែលកើត​មាន​ឡើង​នៅ​របប​កម្ពុ​ជា​ប្រជា​ធិ​​បតេយ្យ ជា​ពិសេស​ឧក្រិ​ដ្ឋកម្មដែលបានកើតឡើងនៅក្នុងសារ​មន្ទីរ​ឧក្រិ​ដ្ឋកម្មប្រ​ល័យ​ពូជ​សាសន៍​ទួលស្លែង ។

លោកប្រធានផ្នែកកិច្ចការសាធារណៈបាន​ជម្រាបជូន​លោក​​គ្រូអ្នកគ្រូថា​ សាលាក្ដីខ្មែរក្រហម​បាន​កាត់​ទោស​ខ្មែរក្រហមតែពីរជំពូកប៉ុននោះ គឺអតីតមេដឹកនាំជាន់ខ្ពស់​ និងអ្នកទទួល​ខុស​ត្រូវ​លើ​ឧក្រិដ្ឋកម្ម​ធ្ងន់ធ្ងរ​បំផុត​​នៅក្នុងរបប​កម្ពុជាប្រជាធិបតេយ្យ ឬរបបខ្មែរក្រហម។ លោកបន្ដថា ការ​ជំនុំជម្រះក្ដីនេះ​ក្នុង​គោល​បំណង​ផ្ដល់​ជូននូវ​ភាពយុត្តិធម៌ជូនជនរងគ្រោះ ស្វែង​រក​ការ​ពិត ការផ្សះផ្សារជាតិ ការផ្សះ​ផ្សារ​ផ្លូវចិត្តជនរងគ្រោះ និង​ការចងចាំអប់រំកូនចៅជំនាន់ក្រោយ​អំពីឧក្រិដ្ឋកម្មដែលបាន​កើតមាន​ឡើង​នៅ​ក្នុ​ង​របប​ប្រល័យពូជសាសន៍នោះ។ លោក​ភក្ដ្រា​ បន្ថែមថា ការជំនុំជម្រះក្ដី​នៅក្នុង អ.វ.ត.ក ត្រូវ​បាន​បញ្ចប់​រួចរាល់​ហើយ ដោយ ​ខៀវ សំផន ដែលជាអតីតម្រមុខរដ្ឋនៃរបប​ខ្មែរក្រហម ត្រូវបានតុលាការ​ផ្ដន្ទា​ទោសដាក់​ពន្ធនា​គារ​អស់​មួយជីវិត ពីបទ​ឧក្រិដ្ឋកម្ម​ប្រឆាំងមនុស្សជាតិ ឧក្រិដ្ឋកម្ម​សង្គ្រាម និង​ឧក្រិដ្ឋកម្ម​ប្រល័យពូជសាសន៍​ជនជាតិចាម និងវៀតណាម។

លោកប្រធានផ្នែកកិច្ចសាធារណៈ បញ្ជាក់បន្ថែមថា សមិទ្ធផលសម្រេចបានដោយ អ.វ.ត.ក និង​បុព្វ​ហេតុ​នៃការជំនុំជម្រះក្តីនេះ កើតចេញពីការសង្គ្រោះជាតិនិងប្រជាជន ការនាំ​យក​សុខ​សន្តិ​ភាព​ពេញ​លេ​ញ និងការកាត់សេចក្តីលើអ្នកទទួលខុស​ត្រូវចំពោះឧក្រិដ្ឋកម្ម និងការ​ផ្តល់​យុត្តិធម៌ជូន​ជន​រង​គ្រោះ​។ លោក​បន្ដ​​ថា លោកគ្រូអ្នកគ្រូដើរតួនា​ទីយ៉ាង​សំខាន់​ក្នុងការ​ផ្សព្វ​ផ្សាយ​​បន្ដ​នូវ​ចំណេះ​ដឹងពាក់​ព័ន្ធ​ប្រវត្ដិ​សាស្ដ្ររបបកម្ពុជាប្រជាធិបតេយ្យ ក៏ដូចជាដំណើការ​នៃការជំនុំជម្រះក្ដី ដែល​​បានធ្វើឡើង​នៅ​ចំពោះ​មុខអង្គជំនុំជម្រះវិសា​មញ្ញ​ក្នុងតុលាការកម្ពុជា ក្នុង​គោលបំណង​ចូល​រួម​ទប់​​ស្កាត់បង្កាកុំឱ្យមាន​របប​​សាហាវឃោរឃៅដូចរបបខ្មែរក្រហមវិលត្រលប់មកកម្ពុជាសារជាថ្មី។ គួររំឮកថា ​លោក នេត្រ ភក្ដ្រា ប្រធានផ្នែកិច្ចការសាធារណៈ​បាន​ទទួលស្វាគមន៍ និងធ្វើ​បទបង្ហាញ​ជូនលោក​​គ្រូ​អ្នកគ្រូមក​ពី​ខេត្ត​​​ព្រះ​សីហនុនេះ មាន​ចំនួនសរុបទាំងអស់​ ជាង​ ១ ៦៣០ នាក់ ក្នុងកម្មវិធី​ទស្សន​កិច្ច​សិក្សា​ចំនួន​បួន​​លើ។

ក្រៅពី​ទស្សនកិច្ចសិក្សា​ខាងលើ ជារៀងរាល់​សប្ដាហ៍ សាលាក្ដីខ្មែរក្រហមក៏​បានរៀបចំទស្សនកិច្ច​សិក្សា និងធ្វើបទ​បង្ហាញ​ជំវិញ​ដំណើ​ការជំនុំជម្រះក្ដីលើអតីតមេដឹកនាំជាន់ខ្ពស់ និង​អ្នក​ទទួល​ខុស​ត្រូវ​ក្នុ​ង​​​របបខ្មែរក្រហម ជូន​សិស្សា​នុ​សិស្ស និ​ស្សិត យុវជន និងពលរដ្ឋទូទៅ ដើម្បីជួយ​ជម្រុញ​ដល់​ការ​ចង​ចាំ និងការចូល​រួមទប់​ស្កាត់​ការវិលត្រឡប់មកវិញនូវអំពើឃោរឃៅ ដូច​ក្នុង​​របបខ្មែរ​ក្រហម​មក​លើ​ទឹក​ដី​កម្ពុជាសាជាថ្មី។ ចា​ប់​តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារ​ណ​ជន​ជាតិ និងអន្តរជាតិ​ជាង​កន្លះ​លាននាក់ហើយ បា​ន​ចូលរួមក្នុងដំណើរទស្សនកិច្ចសិក្សា ក្រោម​ការ​សម្រប​សម្រួល និងរៀបចំ​ដោ​យ​ផ្នែក​កិច្ចការសាធារណៈនៃសាលាក្តីខ្មែរក្រហម៕

eccc

eccc

eccc

eccc

eccc

 

 

Most read