លោកវិល្លាមប៊ឺរ (ទី២ ពីខាងស្ដាំ) និងគណៈប្រតិភូជួបជាមួយថ្នាក់ដឹកនាំ អ.វ.ត.ក
មន្រ្តីជាន់ខ្ពស់នៃសហរដ្ឋអាមេរិកបានមកធ្វើទស្សនកិច្ចនៅសាលាក្តីខ្មែរក្រហមកាលពីព្រឹកថ្ងៃសៅរ៍ ទី ១៧ ខែ កក្កដា ឆ្នាំ ២០១០។ ដំណើរទស្សនកិច្ចនេះគឺដើម្បីស្វែងយល់អំពីកិច្ចការរបស់សាលាក្តីខ្មែរក្រហមដែលត្រៀមនឹងប្រកាសសាលក្រមទី១នៅថ្ងៃទី ២៦ ខែកក្កដា ខាងមុខនេះ។
អនុរដ្ឋមន្រ្តីក្រសួងការបរទេសទទួលបន្ទុកកិច្ចការនយោបាយនៃសហរដ្ឋអាមេរិក លោក វីល្លាម ប៊ឺន បានដឹកនាំគណៈប្រតិភូដែលមានសមាជិកចំនួន៦រូប មកកាន់អង្គជំនុំជម្រះវិសាមញ្ញក្នុងតុលាការកម្ពុជា និង បានចូលទស្សនាសាលសវនាការដែលអាចទទួលអ្នកចូលរួមស្តាប់ចំនួន ៥០០នាក់។
ស្វាគមន៍គណៈប្រតិភូក្នុងឧិកាសនោះ ឯកឧត្តម ក្រាញ់ តូនី ប្រធានរដ្ឋបាលស្តីទី និងលោក ឃ្នុត រ៉ូសិនហក អនុប្រធានរដ្ឋបាល បានថ្លែងអំណរគុណចំពោះដំណើរទស្សនកិច្ចរបស់គណៈប្រតិភូ និងបានជម្រាបជូនអំពីកិច្ចការទូទៅរបស់អង្គជំនុំជម្រះវិសាមញ្ញ។ ថ្នាក់ដឹកនាំជាន់ខុ្ពស់របស់អង្គជំនុំជម្រះវិសាមញ្ញក៏បាន ជម្រាបគណៈប្រតិភូអំពីលទ្ធផលការងារដែលអង្គជំនុំជម្រះសម្រេចបានរយៈពេលកន្លងមក និងអំពីឩបសគ្គដែលអង្គជំនុំជម្រះជួបប្រទះនាពេលបច្ចុប្បន្ននិងទៅអនាគត រួមទាំងការស្វែងរកជំនួយផង។
ជាការឆ្លើយតប លោក វីល្លាម ប៊ឺន អបអរសាទចំពោះលទ្ធផលដែលអង្គជំនុំជម្រះវិសាមញ្ញ សម្រចបាន និងកោតសរសើរចំពោះឥទ្ធិពលជាវិជ្ជមាននិងរយៈពេលវែងដែលអង្គជំនុំជម្រះវិសាមញ្ញមានមកលើ សង្គមកម្ពុជាជាទូទៅ និងមកលើប្រព័ន្ធតុលាការកម្ពុជាដោយចំពោះ។ លោកបានមានប្រសាសន៍ថា “នៅក្នុង អំឡុងពេលទស្សនកិច្ចរបស់ខ្ញុំនៅសាលាក្តីខ្មែរក្រហម ខ្ញុំមានសេចក្តីស្ញប់ស្ញែងចំពោះកិច្ចខិតខំប្រឹងប្រែងរបស់បុគ្គលិកសាលាក្តីខ្មែរក្រហមទាំងបុគ្គលិកជាតិនិងអន្តរជាតិ”។ លោក ប៊ឺន បានបន្ថែមទៀតថា “ខណៈដែល កំពុងតែត្រៀមប្រកាសសាលក្រមទី១របស់ខ្លួន សាលាក្តីខ្មែរក្រហមបានក្លាយជាគំរូដ៏ល្អមួយសម្រាប់ប្រព័ន្ធយុត្តិធម៌នៅព្រះរាជាណាចក្រកម្ពុជាទាំងការដាក់ឲ្យមានការទទួលខុសត្រូវចំពោះឧក្រិដ្ឋកម្មធ្ងន់ធ្ងរដែលបាន កើតឡើងនៅក្នុងរបបកម្ពុជាប្រជាធិបតេយ្យ និងការលើកកម្ពស់នីតិរដ្ឋនៅព្រះរាជាណាចក្រកម្ពុជា។
ទស្សនកិច្ចនេះគឺជាផ្នែកមួយនៃដំណើរទស្សនកិច្ចរយៈពេល២ថ្ងៃរបស់លោក ប៊ឺន នៅព្រះរាជាណាចក្រ កម្ពុជា ដើម្បីអបអរសាទខួបទី៦០នៃទំនាក់ទំនងទ្វេរភាគីរវាងព្រះរាជាណាចក្រកម្ពុជានិងសហរដ្ឋអាមេរិក។ការធ្វើទស្សនកិច្ចនៅអង្គជំនុំជម្រះវិសាមញ្ញប្រព្រឹត្តទៅភ្លាមៗបន្ទាប់ពីគណៈប្រតិភូមកដល់រាជធានីភ្នំពេញ។