អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានទទួលស្វាគមន៍បណ្ណសាររក្សមកពីប្រទេសកម្ពុជា និងវៀតណាម សម្រាប់ "កម្មវិធីគ្រប់គ្រងកំណត់ត្រា និងបណ្ណសារឆ្នាំ២០២៤" នៅថ្ងៃទី២៨ ខែសីហា ឆ្នាំ២០២៤ ដែលរៀបចំឡើងដោយបណ្ណសារជាតិកូរ៉េ (NAK) និងក្រសួរមហាផ្ទៃ និងសុវត្ថិភាពកូរ៉េ ដើម្បីបង្កើនជំនាញ និងជំរុញការផ្លាស់ប្តូរចំណេះដឹងទាក់ទងនឹងប្រព័ន្ធឌីជីថល។
នៅក្នុងកម្មវិធីបណ្ដុះបណ្ដាលនាថ្ងៃនេះ មានកម្មវិធីឧទ្ទេសនាមចំនួនពីរសំខាន់ៗគឺ "គោលនយោបាយអភិរក្សឌីជីថលរយៈពេលវែង និងការគ្រប់គ្រងព័ត៌មានបច្ចេកវិទ្យា" និង "ការចងចាំរបស់អង្គការយូណេស្កូនៃគម្រោងអភិរក្សពិភពលោក និងករណីសិក្សា" អមដោយដំណើរទស្សនកិច្ចសិក្សាស្វែងយល់អំពី មជ្ឈមណ្ឌលធនធានរបស់ អ.វ.ត.ក.ផងដែរ។
កម្មវិធីបណ្ដុះបណ្ដាលនេះ គឺជាឱកាសដ៏ប្រពៃមួយសម្រាប់បណ្ណសាររក្សមកពីស្ថាប័នទាំងអស់ ដើម្បីទទួលបាននូវការយល់ដឹងអំពីបច្ចេកទេសអភិរក្សឌីជីថលកម្រិតខ្ពស់ និងវិធីសាស្ត្ររៀបចំបណ្ណសារបែបទំនើបកម្មដោយបណ្ណសារជាតិនៃប្រទេសកូរ៉េ។ សិក្ខាកាមចូលរួមក្នុងវគ្គបណ្ដុះបណ្ដាលនេះ រួមមាន បណ្ណសាររក្ស អ.វ.ត.ក. មជ្ឈមណ្ឌលតម្កល់ឯកសារច្បាប់ពាក់ព័ន្ធនឹង អ.វ.ត.ក. (LDC) បណ្ណសារជាតិកម្ពុជា សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងនាយកដ្ឋានកំណត់ត្រា និងបណ្ណសារនៃប្រទេសវៀតណាម (SRADV)។
ឯកឧត្តម ក្រាញ់ តូនី ប្រធានរដ្ឋបាលស្ដីទីនៃ អ.វ.ត.ក. មានប្រសាសន៍នៅក្នុងសន្ទរកថាស្វាគមន៍ថា “នៅក្នុងប្រទេសកម្ពុជា យើងមានច្បាប់គ្រប់គ្រងបណ្ណសារ ដែលបានអនុម័តនៅឆ្នាំ២០០៥ ហើយអនុក្រឹត្យស្តីពីការរៀបចំ និងការប្រព្រឹត្តទៅនៃក្រុមប្រឹក្សាបណ្ណសារត្រូវបានចេញនៅឆ្នាំ២០១៩ ដើម្បីបង្កើតគោលការណ៍ និងនីតិវិធីសម្រាប់គ្រប់គ្រង និងថែរក្សាបណ្ណសារសាធារណៈប្រកបដោយប្រសិទ្ធភាព។ យ៉ាងណាក៏ដោយ យើងដឹងថាច្បាប់នេះគួរពិចារណអំពីការធ្វើវិសោធនកម្ម និងធ្វើទំនើបកម្មស្របតាមការធ្វើឌីជីថលក្នុងពេលបច្ចុប្បន្ន»។
ឯកឧត្តមបន្ថែមថា៖ «សសរស្តម្ភនៃកំណែទម្រង់គឺធនធានមនុស្សលើសពីអ្វីទាំងអស់។ យើងត្រូវការអ្នកជំនាញដែលមានទស្សនៈវិស័យខ្ពស់។ ដូច្នេះហើយ ខ្ញុំជឿជាក់ថា កម្មវិធីនេះ នឹងរួមចំណែកយ៉ាងសំខាន់ដល់ការអភិវឌ្ឍបុគ្គលដែលមានជំនាញ និងសមត្ថភាពក្នុងវិស័យដ៏សំខាន់នេះ។»
សូមបញ្ជាក់ថា កម្មវិធីបណ្តុះបណ្តាលនៅថ្ងៃនេះគឺជាផ្នែកមួយនៃកម្មវិធីបណ្ដុះបណ្ដាលអំពី"ការគ្រប់គ្រងកំណត់ត្រា និងបណ្ណសារឆ្នាំ២០២៤" ដែលបានចាប់ផ្តើមពីថ្ងៃទី២៦ ដល់ថ្ងៃទី៣០ ខែសីហា នៅក្នុងរាជធានីភ្នំពេញ។ កម្មវីធីនេះបានបង្ហាញពីសារៈសំខាន់នៃការធ្វើឌីជីថលឯកសារនៅក្នុងការអនុវត្តបណ្ណសារទំនើប ដែលនឹងបន្ដឆ្ពោះទៅគ្រប់គ្រងបណ្ណសារក្នុងពេលអនាគត់ក្នុងតំបន់៕
