អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូននិស្សិតពេទ្យប្រមាណ ២០០ នាក់ ដែលរៀននៅសាលាមធ្យមសិក្សាសុខាភិបាលភូមិភាគកំពង់ចាម ក្នុងខេត្តកំពង់ចាម នៅថ្ងៃទី ២៩ ខែមីនា ឆ្នាំ២០២៣។ គោលបំណងនៃទស្សនកិច្ចសិក្សានេះ គឺចង់ឱ្យនិស្សិតទាំងអស់បានយល់ដឹង និងចងចាំអំពីសោកនាដកម្មនៅក្នុងរបបខ្មែរក្រហម ការរំដោះជាតិពីរបបប្រល័យពូជសាសន៍ និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។
ក្នុងដំណើរទស្សនកិច្ចសិក្សាក្នុងមួយថ្ងៃនេះ និស្សិតទាំងអស់បានស្ដាប់ការធ្វើបទបង្ហាញរបស់មន្ដ្រីផ្នែកកិច្ចការសាធារណៈ អ.វ.ត.ក អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់ និងអ្នកទទួលខុសត្រូវលើឧក្រិដ្ឋកម្មធ្ងន់ធ្ងរបំផុតនៅក្នុងរបបខ្មែរក្រហម និងការងារសេសសល់ដែល អ.វ.ត.ក ត្រូវអនុវត្តបន្ដក្រោយពេលបញ្ចប់ការជំនុំជម្រះក្ដី។ ជាមួយគ្នានេះផងដែរ និស្សិតទាំងអស់ក៏បានទៅទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងវិមានឈ្នះឈ្នះ។
និស្សិតឆ្នាំទី១ ទាំងអស់មានការរំភើបក្រៃលែងដែលបានមកចូលរួមក្នុងកម្មវិធីទស្សនកិច្ចសិក្សានេះ ដោយបញ្ជាក់ថា ទស្សនកិច្ចនេះបានផ្ដល់ចំណេះដឹងយ៉ាងច្រើនដល់ពួកគេ តាមរយៈការទស្សនាទិដ្ឋភាពជាក់ស្ដែង និងបានស្ដាប់ការពន្យល់បកស្រាយពីមន្ដ្រីពាក់ព័ន្ធនូវតាមទីតាំងនីមួយៗ។ និស្សិតទាំងនោះក៏បានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ហើយពួកគេក៏មិនភ្លេចថ្លែងអំណរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា អ.វ.ត.ក បានរៀបចំរៀងទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
រូបថតដោយ៖ អ.វ.ត.ក និងក្រុមដឹកនាំយុវជនទស្សនកិច្ចសិក្សាទីតាំងប្រវត្តិសាស្ដ្រ