អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី១៨ ខែមករា ឆ្នាំ២០២៣ នេះ បានរៀបចំទស្សនកិច្ចសិក្សាជូននិស្សិតជាង២០០ នាក់មកពីសាកលវិទ្យាល័យគ្រប់គ្រងសេដ្ឋកិច្ច និងវិទ្យាស្ថានជាតិកសិកម្ម ក្នុងខេត្តកំពង់ចាម។ ដំណើរទស្សនកិច្ចសិក្សានេះ គឺដើម្បីផ្ដល់ឱ្យនិស្សិតទាំងអស់បានឈ្វេងយល់ឱ្យកាន់តែស៊ីជម្រៅអំពីឧក្រិដ្ឋកម្មសាហាវយង់ខ្នងដែលកើតមានឡើងនៅក្នុងរបបឃោរឃៅខ្មៅងងឹត និងដើម្បីជាការរំឮកវិញ្ញាណក្ខ័ណជនរងគ្រោះពីរបបនោះផងដែរ។
និស្សិតទាំងអស់បានទទួលនូវព័ត៌មានជាច្រើនអំពីប្រវត្តិសាស្ត្រនៃរបបខ្មែរក្រហម តាមរយៈការទស្សនាសារៈមន្ទីរប្រល័យពូជសាសន៍គុកទួលស្លែង វាលពិឃាតបឹងជើងឯក និងវិមានឈ្នះឈ្នះ និងទទួលបានព័ត៌មានជុំវិញដំណើរការជំនុំជម្រះក្តីលើអតីតមេដឹកនាំខ្មែរក្រហម ដែលធ្វើបទបង្ហាញដោយមន្ត្រីផ្នែកកិច្ចការសាធារណៈ នៃសាលាក្តី ខ្មែរក្រហម។
ដំណើរទស្សនកិច្ចសិក្សានេះ នឹងនៅតែបន្ដរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅបន្ដទៀត ដែលនេះ គឺជាផ្នែកមួយដើម្បីការចងចាំ និងការចូលរួមទប់ស្កាត់ការវិលត្រឡប់មកវិញ នៃអំពើឃោរឃៅដូចក្នុងរបបខ្មែរក្រហម មកលើទឹកដីកម្ពុជាសាជាថ្មី។
ចាប់តាំងពីតុលាការដំណើរការដំបូង រហូតមកដល់ខែមករា ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈរបស់សាលាក្តីខ្មែរក្រហម៕