អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) រៀបចំកម្មវិធីទស្សនកិច្ចសិក្សាជូនសិស្សានុសិស្សប្រមាណ២០០នាក់ នៃវិទ្យាល័យ ព្រះសីហនុ ក្នុងខេត្តកំពុងចាម នៅថ្ងៃទី៧ ខែមីនា ឆ្នាំ២០២៣។ ការរៀបចំដំណើរទស្សនកិច្ចសិក្សានេះ គឺដើម្បីផ្ដល់ឱ្យយុវសិស្សទាំងអស់បានចងចាំ និងបានឈ្វេងយល់ស៊ីជម្រៅអំពីឧក្រិដ្ឋកម្មដ៏សាហាវយង់ខ្នង ដែលបានកើតឡើងនៅក្នុងរបបឃោរឃៅខ្មៅងងឹត និងដើម្បីរំឮកវិញ្ញាណក្ខ័ណជនរងគ្រោះពីរបបនោះផងដែរ។
ក្នុងដំណើរទស្សនកិច្ចសិក្សានៅថ្ងៃនេះ សិស្សានុសិស្សទាំងអស់បានទៅទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះ និងមានបទបង្ហាញមន្ដ្រីមកពីសាលាក្ដីខ្មែរក្រហម អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យផងដែរ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបប្រល័យពូជសាសន៍ខ្មែរក្រហម ដំណើការជំនុំជម្រះក្តីលើអតីតមេដឹកនាំខ្មែរក្រហម និងការពលីរបស់ថ្នាក់ដឹកនាំកម្ពុជាដើម្បីរំដោះប្រទេសជាតិចេញពីរបបប្រល័យពូជសាសន៍នោះ។
លោក រ៉ាត់ ពិសាក់ ដែលដឹកនាំសិស្សានុសិស្សចូលរួមក្នុងកម្មវិធីទស្សនកិច្ចសិក្សានេះបាននិយាយថា យុវជនទាំងអស់មានភាពសប្បាយរីករាយយ៉ាងខ្លាំង ដែលបានមកចូលរួមក្នុងកម្មវិធីទស្សនកិច្ចសិក្សានៅទីតាំងប្រវត្តិសាស្ដ្រកម្ពុជាទាក់ទងនឹងរបបខ្មែរក្រហម។ អ្នកដឹកនាំ រូបនេះបន្ថែមថា ទស្សនកិច្ចនេះបានផ្ដល់ចំណេះដឹងយ៉ាងច្រើនដល់សិស្សានុសិស្ស តាមរយៈការទស្សនាទិដ្ឋភាពជាក់ស្ដែង និងបានស្ដាប់ការពន្យល់បកស្រាយពីមន្ដ្រីពាក់ព័ន្ធនូវតាមទីតាំងនីមួយៗ។ លោកថា កម្មវិធីនេះ ជួយឱ្យយុវជនបានចងចាំនូវអ្វីដែលរបបខ្មែរក្រហមបានប្រព្រឹត្តទៅលើប្រជាពលរដ្ឋកម្ពុជា ហើយពួកគាត់ក៏បានប្ដេជ្ញាចូលរួមការពារសន្ដិភាព និងទប់ស្កាត់មិនឱ្យរបបប្រល័យពូជសាសន៍នេះកើតមានជាថ្មីម្ដង ទៀតក្នុងប្រទេសកម្ពុជានោះទេ។
ថ្នាក់ដឹកនាំសិស្សវិទ្យាល័យរូបនេះក៏បានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ លោក ក៏បានថ្លែងអំណរគុណសាលាក្ដីខ្មែរក្រហម ដែលបានរៀបចំកម្មវិធីដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
