អង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី១ ខែកុម្ភៈ ឆ្នាំ២០២៣ នេះ បានរៀបចំទស្សនកិច្ចសិក្សាជូនសិស្សានុសិស្សចំនួន ២៦០ នាក់ មកពីវិទ្យាល័យ ហ៊ុន សែន កំចាយមារ ក្នុងស្រុកកំចាយមារ ខេត្តព្រៃវែង។ គោលបំណងនៃការរៀបចំដំណើរទស្សនកិច្ចសិក្សានេះ គឺដើម្បីផ្ដល់ឱ្យសិស្សានុសិស្សទាំងអស់បានចងចាំ និងឈ្វេងយល់ឱ្យកាន់តែស៊ីជម្រៅអំពីឧក្រិដ្ឋកម្មដ៏សាហាវយង់ខ្នង ដែលបានកើត ឡើងនៅក្នុងរបបឃោរឃៅខ្មៅងងឹត និងដើម្បីរំឮកវិញ្ញាណក្ខ័ណជនរងគ្រោះពីរបបនោះផងដែរ។
សិស្សានុសិស្សទាំងអស់បានទទួលនូវព័ត៌មានជាច្រើនអំពីរឿងរ៉ាវដែលបានកើតឡើងលើប្រជាពលរដ្ឋកម្ពុជាក្នុង របបខ្មែរក្រហម តាមរយៈការទស្សនាសារៈមន្ទីរប្រល័យពូជសាសន៍គុកទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះ និងព័ត៌មានជុំវិញដំណើរការជំនុំជម្រះក្តីលើអតីតមេដឹកនាំខ្មែរក្រហម ដែលធ្វើបទបង្ហាញដោយមន្ត្រីផ្នែកកិច្ចការសាធារណៈនៃសាលាក្តីខ្មែរក្រហម។
យុវសិស្សដែលបានចូលរួមក្នុងកម្មវិធីទស្សនកិច្ចសិក្សានេះបានគូសបញ្ជាក់ថា ទស្សនកិច្ចសិក្សានេះពិតជាមានសារៈសំខាន់សម្រាប់ពួកគាត់ ព្រោះពួកគាត់បានមកទស្សនាទីតាំងប្រវត្តិសាស្ដ្រ និងបានយល់ដឹងបន្ថែមអំពីទុក្ខលំបាកវេទនាជាច្រើនដែលកើតមានឡើងលើពលរដ្ឋកម្ពុជានៅក្នុងរបបវាលពិឃាដនោះ។ ហើយពួកគេក៏បានយល់ដឹងអំពីការតស៊ូ និងពលីរបស់ថ្នាក់ដឹកនាំកម្ពុជាក្នុងការរំដោះជាតិពីរបបប្រល័យពូជសាសន៍ និងបានដឹកនាំប្រទេសជាតិឱ្យមានការរីកចម្រើនរហូតដល់ពេលបច្ចុប្បន្ននេះផងដែរ។
តាមរយៈការយល់ដឹងពីការចូលរួមក្នុងកម្មវិធីទស្សនកិច្ចសិក្សានេះ ក្នុងនាមយុវជនជំនាន់ក្រោយបានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។
សិស្សានុសិស្សទាំងអស់ក៏សូមថ្លែងអំណរគុណសាលាក្ដីខ្មែរក្រហម ដែលបានរៀបចំកម្មវិធីដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។
ចាប់តាំងពីតុលាការដំណើរការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
រូបថតដោយ: Andre Kwok