អ.វ.ត.ក រៀបចំទស្សនកិច្ចសិក្សាជូនសិស្សានុសិស្សប្រមាណ១៥០នាក់ មកពីស្រុកកងមាស ខេត្តកំពង់ចាម

eccc

អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្ស​ប្រមាណ ១៥០ នាក់​ មកពីវិទ្យាល័យ​ ហ៊ុន សែន ខ្ចៅ ក្នុងស្រុកកងមាស ខេត្តកំពង់ចាម នាថ្ងៃទី២៤ ខែឧសភា ឆ្នាំ២០២៣។ ការរៀបចំដំណើរទស្សនកិច្ចសិក្សានេះ គឺដើម្បីជួយ​ជម្រុញ​​យុវជនឱ្យ​បាន​​យល់​ដឹងបន្ថែម​​ និងចង​ចាំ​អំពីសោកនាដកម្ម​របស់ប្រជាជនកម្ពុជានៅក្នុងរបបខ្មែរក្រហម និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។

ក្នុងដំណើរទស្សនកិច្ចសិក្សានៅថ្ងៃនេះ សិស្សានុសិស្សទាំងអស់ទទួល​បាន​ការស្វាគមន៍​ និង​បទបង្ហាញ​ពីមន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម ​អំពី​ដំណើរការជំនុំជម្រះក្ដី​លើអតីតមេដឹកនាំខ្មែរក្រហម និង​សមិទ្ធិផល​របស់​ អ.វ.ត.ក និង​បាន​ទស្សនា ស្វែងយល់​អំពី​រឿងរ៉ាវ​ប្រវត្តិសាស្ដ្រ​នៅក្នុងវិមានឈ្នះ ឈ្នះ ​សារៈមន្ទីរឧក្រិដ្ឋកម្ម​​ប្រល័យពូជសាសន៍ទួលស្លែង និង​មជ្ឈ​​មណ្ឌលប្រល័យពូជសាសន៍ជើងឯក។

អ្នកគ្រូ ចន សុជាតិ​ តំណាងក្រុមដឹកបានគូសបញ្ជាក់ថា ដំណើរទស្សនកិច្ចនេះពិតជាមានសារៈសំខាន់ណាស់​សម្រាប់​សិស្សានុសិស្សទាំងអស់ ដើម្បីឱ្យពួកគេ​បានដឹង​ប្រវត្តិសាស្ដ្រកម្ពុជាដែល​ប្រជាជនខ្មែរធ្លាប់​បានជួបប្រទះ និង​ចូលរួម​ការពារ​កុំ​ឱ្យ​កម្ពុជាដើរជាន់ប្រវត្តិសាស្ដ្រ​ដែលខ្មៅងងឹត​ដូច្នោះម្ដងទៀត។ អ្នកគ្រូបន្ថែមថា កម្មវិធីនេះក៏បាន​ផ្ដល់​ឱ្យសិស្សបាន​យល់​ និងបានឃើញជាក់ស្ដែង​ពីសមទ្ធិផលនានា​ក្រោមការដឹងនាំ គ្រប់គ្រងរបស់រាជរដ្ឋាភិបាលកម្ពុជា ដើម្បីអោយប្រជាពលរដ្ឋនៅថ្នាក់ក្រោមមានសុខសន្តិភាព រុងរឿង សម្បូរសប្បាយផងដែរ។

អ្នកគ្រូ សុជាតិ បានសម្ដែងនូវក្ដីអំណរអរគុណដល់ប្រមុខ​រាជ​រដ្ឋាភិបាលកម្ពុជា ដែលលោក​​បាន​កំពុង​ដឹកនាំ​ប្រ​ទេស​​​​ឱ្យទទួល​បាន​សុខសន្ដិភាព​ និង​បានរីក​ចម្រើន​​គ្រប់វិស័យ​រហូតមក​ដល់​សព្វថ្ងៃនេះ និងបាន​អរ​គុណដល់​សាលាក្ដីខ្មែរ​ក្រហម​​ដែល​បាន​រៀបចំ​កម្មវិធី​ទស្ស​ន​កិច្ច​សិក្សានេះឡើង ដើម្បីឱ្យ​យុវ​ជនបានស្វែង​យល់ច្បាស់​​អំពីប្រវត្តិសាស្ដ្ររ​បស់​​កម្ពុជា​។

​សូមបញ្ជាក់​ថា អ.វ.ត.ក បានរៀបចំរៀងទស្សនកិច្ចសិក្សារៀង​រាល់សប្ដាហ៍ ជូនសិស្សានុសិស្ស និស្សិត យុវជន និង​ពលរដ្ឋទូទៅ ដើម្បីជួយជម្រុញដល់​ការចងចាំ និងការចូលរួម​ទប់​ស្កាត់ការវិល​ត្រ​ឡប់​មក​វិញ​នូវ​អំពើឃោរឃៅ​ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។​ ចាប់តាំងពីឆ្នាំ ២០០៩  រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕

eccc

eccc

eccc

Most read