អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) រៀបចំកម្មវិធីទស្សនកិច្ចសិក្សាជូនយុវជន និងសិស្សានុសិស្សខ្មែរឥស្លាមប្រមាណ២០០នាក់ មកពីស្រុកទឹកឈូ និងក្រុងកំពត ខេត្តកំពត នៅថ្ងៃទី០៩ ខែមីនា ឆ្នាំ២០២៣។ ការរៀបចំដំណើរទស្សនកិច្ចសិក្សានេះ គឺដើម្បីផ្ដល់ឱ្យយុវជន និងសិស្សទាំងអស់បានចងចាំ និងបានឈ្វេងយល់ស៊ីជម្រៅអំពីឧក្រិដ្ឋកម្មដ៏សាហាវយង់ខ្នង ដែលបានកើតឡើងនៅក្នុងរបបឃោរឃៅខ្មៅងងឹត និងដើម្បីរំឮកវិញ្ញាណក្ខ័ណជនរងគ្រោះពីរបបនោះផងដែរ។
ក្នុងដំណើរទស្សនកិច្ចសិក្សានៅថ្ងៃទី០៩ ខែមីនា នេះ យុវសិស្សទាំងអស់បានទៅទស្សនកិច្ចសិក្សានៅវិមានឈ្នះឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងមានបទបង្ហាញមន្ដ្រីមកពីសាលាក្ដីខ្មែរក្រហម អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យផងដែរ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ យុវជន និងសិស្សានុសិស្សទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបប្រល័យពូជសាសន៍ខ្មែរក្រហម ដំណើការជំនុំជម្រះក្តីលើអតីតមេដឹកនាំខ្មែរក្រហម និងការពលីរបស់ថ្នាក់ដឹកនាំកម្ពុជាដើម្បីរំដោះប្រទេសជាតិចេញពីរបបប្រល័យពូជសាសន៍នោះ។
លោក លី អះម៉ាត់ នាយករងវិទ្យាល័យអាល់អាហ្វាហ្វ និងជាអ្នកដឹកនាំក្រុមបាននិយាយថា យុវជន និងសិស្សានុសិស្សទាំងអស់មានភាពសប្បាយរីករាយយ៉ាងខ្លាំង ដែលបានមកចូលរួមក្នុងកម្មវិធីទស្សនកិច្ចសិក្សានៅទីតាំងប្រវត្តិសាស្ដ្ររបស់កម្ពុជានៅក្នុងថ្ងៃនេះ។ លោកបន្ដថា ទស្សនកិច្ចនេះបានផ្ដល់ចំណេះដឹងយ៉ាងច្រើន តាមរយៈការទស្សនាទិដ្ឋភាពជាក់ស្ដែង និងបានស្ដាប់ការពន្យល់បកស្រាយពីមន្ដ្រីពាក់ព័ន្ធនូវតាមទីតាំងនីមួយៗ។ លោកថា កម្មវិធីនេះអាចជួយឱ្យយុវជនជំនាន់ក្រោយបានចងចាំនូវអ្វីដែលរបបខ្មែរក្រហមបានប្រព្រឹត្តទៅលើប្រជាពលរដ្ឋកម្ពុជា ហើយពួកគាត់ក៏បានប្ដេជ្ញាចូលរួមការពារសន្ដិភាព និងទប់ស្កាត់មិនឱ្យរបបប្រល័យពូជសាសន៍នេះកើតមានជាថ្មីម្ដង ទៀតក្នុងប្រទេសកម្ពុជានោះទេ។
ថ្នាក់ដឹកនាំដែលមានវ័យជាង៥០ឆ្នាំរូបនេះ ក៏បានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ លោក ក៏បានថ្លែងអំណរគុណសាលាក្ដីខ្មែរក្រហម ដែលបានរៀបចំកម្មវិធីដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។