អ.វ.ត.ក រៀបចំកម្មវិធីទស្សនកិច្ចសិក្សាជូនសិស្សានុសិស្សចំនួន២០០នាក់ មកពីក្រុងព្រៃវែង

eccc

អង្គជំ​នុំជម្រះ​វិសាមញ្ញ​ក្នុងតុលាការកម្ពុជា (អ.វ.ត.ក) រៀបចំ​កម្មវិធី​ទស្សនកិច្ចសិក្សា​ជូន​សិស្សា​នុ​សិស្ស​​ចំនួន ២០០ នាក់​ មកពីក្រុងព្រៃវែង ក្នុងខេត្តព្រៃវែង នាព្រឹកថ្ងៃទី​៣ ខែឧសភា ឆ្នាំ២០២៣ ដើម្បី​ស្វែង​យល់​ឱ្យ​កាន់​តែស៊ីជម្រៅ និងចងចាំអំពី​ឧក្រិដ្ឋកម្ម​សាហាវ​យង់​​ខ្ន​ង​ដែល​កើត​មានឡើង​នៅ​ក្នុង​របប​ឃោរឃៅ​ខ្មៅងងឹត ​ការ​រំដោះជាតិពីរបបប្រល័យពូជសាសន៍ និង​ការជំនុំជម្រះក្ដីលើ​ឧក្រិដ្ឋកម្ម​ក្នុង​របបឃោរឃៅនោះ។

ក្នុងដំណើរទស្សនកិច្ចសិក្សានៅថ្ងៃនេះ សិស្សទាំងអស់​បានទៅទស្សនកិច្ចសិក្សា​​សារៈមន្ទីរឧក្រិដ្ឋកម្ម​​ប្រល័យ​ពូជ​សាសន៍ទួលស្លែង មជ្ឈ​​មណ្ឌល​ប្រល័យពូជសាសន៍ជើងឯក វិមានឈ្នះឈ្នះ និងមាន​បទ​បង្ហាញ​មន្ដ្រីមកពីសាលាក្ដីខ្មែរក្រហម អំពីសមិទ្ធផល និង​ដំណើការជំនុំជម្រះក្ដីលើ​អតី​ត​មេដឹក​នាំ​ជាន់​ខ្ពស់​​នៃរបប​កម្ពុជាប្រជា​ធិប​តេយ្យ។ ក្រោយពេលបញ្ចប់​ទស្សនកិច្ចសិក្សានៅក្នុងមួយថ្ងៃនេះ សិស្សា​នុសិស្ស​ទាំង​អស់​​បាន​ទទួល​ព័ត៌​មាន និង​ចំណេះដឹងយ៉ាងច្រើន​​​ជុំ​វិញ​​​ដំណើការជំនុំជម្រះក្តីលើ​អតីត​មេ​ដឹក​នាំខ្មែរក្រហម ការ​ធ្វើទារុណកម្ម​យ៉ាងព្រៃផ្សៃ និងការកាប់សម្លាប់​ប្រជាពលរដ្ឋកម្ពុជាដោយ​ពួក​ខ្មែ​រ​ក្រហម និង​ការពលី​របស់​ថ្នាក់ដឹក​នាំកម្ពុជាក្នុងការ​រំដោះប្រទេសជាតិ​ចេញ​ពីរបប​ប្រល័យ​ពូជ​សាសន៍​។​

សិស្សានុសិស្សបានលើក​ឡើងដូចៗគ្នាថា ទស្សនកិច្ចសិក្សាដែលរៀបចំ​ដោយ អ.វ.ត.ក នេះ ធ្វើឱ្យ​ពួក​គេ​បាន​យល់​ដឹងច្រើនអំពីប្រវត្ដិសាស្ដ្រនៃរបប​កម្ពុជាប្រជាធិបតេយ្យ តាមរយៈការ​ឃើញភស្ដុ​តាង​ជាក់​ស្ដែងនៅតាម​ទីតាំងប្រវត្ដិសាស្ដ្រ​នីមួយៗ។ សម្រាប់សិស្សានុសិស្សទាំងនោះ ការ​យល់​ដឹង​អំពី​ប្រវតិ្ដ​សាស្ដ្រ​ដ៏ឃោរឃៅនេះ គឺមាន​សារៈសំខាន់​ណាស់​សម្រាប់​ការ​ចូលរួ​ម​ទប់​ស្កាត់​របបឃោរឃៅ​ដូច្នោះ​កុំ​ឱ្យកើត​មានឡើងជាថ្មីនៅលើទឹកដីកម្ពុជា និងបាន​យល់​ច្បាស់​ពីតម្លៃនៃសន្ដិភាព។

បន្ថែមលើសពីនេះទៅទៀត សិស្សានុសិស្ស​ទាំងអស់​បាន​អរ​គុណដល់​សាលាក្ដីខ្មែរ​ក្រហម​​ដែល​បាន​រៀបចំ​កម្មវិធី​ទស្ស​ន​កិច្ច​សិក្សានេះឡើង ដើម្បីឱ្យ​យុវ​ជនបានស្វែង​យល់ច្បាស់​​អំពីប្រវត្តិសាស្ដ្ររ​បស់​​កម្ពុជា​។ ពួកគេ​​ក៏​បានថ្លែងអំណរគុណដល់ប្រមុខ​រាជ​រដ្ឋាភិបាលផង​ដែរ ដែលលោក​​បាន​ដឹកនាំ​ប្រ​ទេស​​​កម្ពុ​ជា​​​​ឱ្យទទួល​បាន​សុខសន្ដិភាព​ និង​បានរីក​ចម្រើន​​គ្រប់វិស័យ​រហូតមក​ដល់​សព្វថ្ងៃនេះ។ ​ ​

សូមបញ្ជាក់​ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និង​ពលរដ្ឋទូទៅ ដើ​ម្បី​ជួយជម្រុញដល់​ការចងចាំ និងការចូលរួម​ទប់​ស្កាត់ការវិល​ត្រ​ឡប់​មកវិញនូវ​អំពើឃោរឃៅ​ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំង​ពី​តុលា​ការ​​ដំណើរការដំបូង រហូតមកដល់ឆ្នាំ​២០២៣ នេះ សាធារណ​ជនជាតិ និង​អន្តរ​ជាតិ​​ជាងកន្លះ​លាន​នាក់​ហើយ​ បានចូលរួមក្នុងដំណើរទស្សនកិច្ចសិក្សា ក្រោមការសម្រប​សម្រួល និង​រៀបចំ​ដោយ​ផ្នែក​កិច្ច​ការសាធារណៈនៃសា​លា​ក្តីខ្មែរក្រហម៕

eccc

ECCC

ECCC

ECCC

Most read