ថ្ងៃនេះ អ.វ.ត.ក បានបោះពុម្ពផ្សាយរបាយការណ៍ប្រឹក្សារបស់ សហចៅក្រមរបាយការណ៍ស្តីពីមុខងារនៅសេសសល់ពាក់ព័ន្ធនឹងជនរងគ្រោះ គឺលោកចៅក្រម យូ ឧត្តរា និងលោកស្រីចៅក្រម Claudia FENZ។ របាយការណ៍នេះអាចរកមើលបាននៅលើ គេហទំព័រ អ.វ.ត.ក និងតាមរយៈស្គែនកូដ QR ខាងក្រោមនេះ៖
សាវតារ៖ នៅថ្ងៃទី០២ ខែកក្កដា ឆ្នាំ២០២១ ការិយាល័យរដ្ឋបាលបានចាត់តាំងលោកចៅក្រម យូ ឧត្តរា និងលោកស្រីចៅក្រម Claudia Fenz ជាសហចៅក្រមរបាយការណ៍អំពីលទ្ធភាពនៃការចាត់វិធានការដែលអាចមានលក្ខណៈសមស្រប និងប្រកបដោយអត្ថន័យ ចំពោះជនរងគ្រោះនៃរបបខ្មែរក្រហម នៅក្រោមអាណត្តិការងារនៅសេសសល់របស់ អ.វ.ត.ក។ នៅថ្ងៃទី០១ ខែធ្នូ ឆ្នាំ២០២១ បន្ទាប់ពីមានការអំពាវនាវឲ្យមានការចូលរួមចំណែកជាគំនិត សហចៅក្រមរបាយការណ៍បានដាក់របាយការណ៍របស់ខ្លួន ដែលមួយផ្នែកបានផ្តល់ជាអនុសាសន៍ឲ្យមានរៀបចំកិច្ចសន្ទនាដោយផ្ទាល់ជាមួយដៃគូពាក់ព័ន្ធនានា។ ដោយសារមានការផ្តល់អនុសាសន៍នៅក្នុងរបាយការណ៍នេះ អ.វ.ត.ក បានសម្រេចរៀបចំសិក្ខាសាលាស្តីពីជនរងគ្រោះ នៅខែឧសភា ឆ្នាំ២០២២។ អ.វ.ត.ក បានបើកឲ្យមាន ការចុះឈ្មោះចំពោះអ្នកមានចំណាប់អារម្មណ៍ចង់ចូលរួម សិក្ខាសាលា ចាប់ពីពេលនេះតទៅ។