សិស្សានុសិស្សចំនួន ១៧០ នាក់ មកពីក្រុងច្បារមន ខេត្តកំពង់ស្ពឺ ចូលរួមក្នុងកម្មវិធីទស្សនកិច្ចសិក្សារបស់ អ.វ.ត.ក

សិស្សានុសិស្សចំនួន ១៧០ នាក់​ មកពីអនុវិទ្យាល័យ ឆាយ ឆុប ក្នុងក្រុងច្បារមន ខេត្តកំពង់ស្ពឺ ចូលរួមក្នុង​កម្មវិធីទស្សនកិច្ចសិក្សារបស់​អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នាថ្ងៃទី ២៥ ខែ ឧសភា ឆ្នាំ ២០២៣ នេះ ដើម្បី ​​យល់​ដឹងបន្ថែម​​ និងចង​ចាំ​អំពីសោកនាដកម្ម​របស់ប្រជាជនកម្ពុជានៅក្នុងរបបខ្មែរក្រហម ការតស៊ូក្នុង​ការ​រំដោះប្រទេសជាតិរបស់រាជរដ្ឋាភិបាលកម្ពុជា និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។

ក្នុងដំណើរទស្សនកិច្ចសិក្សានៅថ្ងៃនេះ សិស្សទាំងអស់ទទួល​បាន​ការស្វាគមន៍​ និង​ពន្យល់​យ៉ាងក្បោះ​ក្បាយ​ពីមគ្គុទ្ទេសន៍អំពីអត្ថន័យ និងសារៈសំខាន់នៃវិមានឈ្នះ​ ឈ្នះ ​សារៈមន្ទីរឧក្រិដ្ឋកម្ម​​ប្រល័យ​ពូជ​សាសន៍ទួលស្លែង មជ្ឈ​​មណ្ឌល​ប្រល័យពូជសាសន៍ជើងឯក និងមាន​បទ​បង្ហាញរបស់​​មន្ដ្រីមកពីសាលាក្ដីខ្មែរក្រហម អំពីសមិទ្ធផលនៃការជំនុំជម្រះក្ដីលើ​អតី​ត​មេដឹក​នាំ​ជាន់​ខ្ពស់​​នៃរបបខ្មែរក្រហម​ផងដែរ។

ក្រោយ​ពេល​បញ្ចប់​ទស្សន​កិច្ច​សិក្សា​នៅ​ក្នុង​មួយ​ថ្ងៃ​នេះ សិស្សា​នុសិស្ស​​ទាំងអស់​បាន​ទទួល​ព័ត៌​មាន និង​ចំណេះដឹង​យ៉ាងច្រើន​ជុំ​វិញការ​ធ្វើទារុណ​កម្ម​យ៉ាង​ព្រៃ​ផ្សៃ និង​ការកាប់សម្លាប់​ប្រ​ជា​​ពល​រដ្ឋ​កម្ពុជា​នៅ​ក្នុង​របប​ប្រល័យ​ពូជ​សាសន៍​ខ្មែរ​ក្រហម ​ដំណើ​ការ​ជំនុំ​ជម្រះ​ក្តី​លើ​អតីត​មេដឹក​នាំខ្មែរក្រហម​ និង​ការ​ពលី​របស់​ថ្នាក់ដឹក​នាំកម្ពុជា​ដើម្បី​រំដោះ​ប្រទេស​ជាតិ​ចេញ​ពី​របប​ប្រល័យ​ពូជសា​សន៍​នោះ។

​សូមបញ្ជាក់​ថា អ.វ.ត.ក បានរៀបចំទស្សនកិច្ចសិក្សារៀង​រាល់សប្ដាហ៍ ជូនសិស្សានុសិស្ស និស្សិត យុវជន និង​ពលរដ្ឋទូទៅ ដើម្បីជួយជម្រុញដល់​ការចងចាំ និងការចូលរួម​ទប់​ស្កាត់ការវិល​ត្រ​ឡប់​មក​វិញ​នូវ​អំពើឃោរឃៅ​ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។​ ចាប់តាំងពីឆ្នាំ ២០០៩  រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕

eccc

eccc

eccc

eccc

 

Most read