សិស្សានុសិស្សប្រមាណ ១៥០ នាក់ មកពីវិទ្យាល័យសម្ដេច ជា ស៊ីម ឱរ៉ាល់ ក្នុងស្រុកឱរ៉ាល់ ខេត្តកំពង់ស្ពឺ ចូលរួមក្នុងកម្មវិធីទស្សនកិច្ចសិក្សារបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នាថ្ងៃទី១ ខែមិថុនា ឆ្នាំ២០២៣ នេះ ដើម្បីស្វែងយល់ឱ្យកាន់តែច្បាស់អំពីសោកនាដកម្មរបស់ប្រជាជនកម្ពុជានៅក្នុងរបបខ្មែរក្រហម ការតស៊ូក្នុងការរំដោះប្រទេសជាតិរបស់រាជរដ្ឋាភិបាលកម្ពុជា និងការជំនុំជម្រះក្ដីលើឧក្រិដ្ឋកម្មក្នុងរបបដ៏ឃោរឃៅនោះ។
ក្នុងដំណើរទស្សនកិច្ចសិក្សានៅថ្ងៃនេះ សិស្សទាំងអស់ទទួលបានការស្វាគមន៍ និងពន្យល់យ៉ាងក្បោះក្បាយពីមគ្គុទ្ទេសន៍អំពីអត្ថន័យ និងសារៈសំខាន់នៃវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងមានបទបង្ហាញរបស់មន្ដ្រីមកពីសាលាក្ដីខ្មែរក្រហម អំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។
ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបប្រល័យពូជសាសន៍ខ្មែរក្រហម ដំណើការជំនុំជម្រះក្តីលើអតីតមេដឹកនាំខ្មែរក្រហម និងការពលីរបស់ថ្នាក់ដឹកនាំកម្ពុជាដើម្បីរំដោះប្រទេសជាតិចេញពីរបបប្រល័យពូជសាសន៍នោះ។
នាយកវិទ្យាល័យដែលបានដឹកនាំសិស្សមកចូលរួមក្នុងទស្សនកិច្ចសិក្សានេះ បានថ្លែងនូវការកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ហើយលោកក៏សូមអរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា អ.វ.ត.ក បានរៀបចំទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
