យុវជន៖ ទស្សកិច្ចសិក្សារៀបចំដោយ អ.វ.ត.ក ជួយយុវជនបានយល់ដឹងពីប្រវត្តិសាស្ដ្រពិតរបស់កម្ពុជា

ECCC

លោក ស៊ុយ ឡេងគា ប្រធានក្រុមដឹកនាំយុវជនក្នុងស្រុកស្ទឹងត្រង់ ខេត្តកំពង់ចាម បានដឹកនាំ​យុវជន និងសិស្សានុសិស្សចំនួន ២០០ នាក់ មកពីវិទ្យាល័យ ហ៊ុន សែន អារក្សត្នោត និងវិទ្យាល័យ ហ៊ុន សែន ពាមកោះស្នា ក្នុងស្រុកស្ទឹងត្រង់ ចេញដំណើរមកទស្សនកិច្ចសិក្សានៅវិមានឈ្នះឈ្នះ មជ្ឈ​មណ្ឌល​ប្រល័យពូជសាសន៍បឹងជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង នាថ្ងៃទី ៣០ ខែ មីនា ឆ្នាំ២០២៣។

ដំណើរទស្សនកិច្ចសិក្សានេះ រៀបចំដោយអង្គជំនុំជម្រះវិសាមញ្ញ​ក្នុងតុលាការកម្ពុជា (អ.វ.ត.ក) ឬសាលាក្ដីខ្មែរក្រហម ដើម្បីជួយ​ឱ្យសិស្សានុសិស្ស និងយុវជនទាំងអស់​បាន​​យល់​ដឹង​ និងចង​ចាំ​អំពីសោកនាដកម្ម​នៅក្នុងរបបខ្មែរក្រហម ការ​រំដោះជាតិពីរបបប្រល័យពូជសាសន៍ និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។

លោក ស៊ុយ ឡេងគា បានបញ្ជាក់ថា លោក​ពិតជា​មានសេចក្ដីរំភើប​ដែល​បាន​ដឹកនាំយុវជន​មកទស្សនកិច្ចនៅថ្ងៃនេះ។ លោក បន្ដថា ដំណើរទស្សនកិច្ចនេះ ពិតជាមានសារៈសំខាន់ណាស់​សម្រាប់​យុវជន​ជំនាន់ក្រោយ ដើម្បីឱ្យ​ពួកគាត់បានឃើញ បានចងចាំ​ និងបានរៀនសូត្រ​ដោយ​ផ្ទាល់​នៅតាមទីតាំង​សោកនាដកម្មដ៏ឃោរឃៅបំផុតដែលបានកើតឡើងនៅក្នុងរបបខ្មែរក្រហម។ ប្រធានយុវជនរូបនេះបន្ដថា សិស្សានុសិស្ស និងយុវជន ​ក៏បាន​យល់​ដឹង​អំពីរឿងរ៉ាវពិត​​របស់​ប្រមុខរាជរដ្ឋាភិបាល​កម្ពុជា​ ក្នុងការពលីដើម្បីសង្គ្រោះ​​ប្រទេសជាតិ​ពីរបប​ប្រល័យពូជសាសន៍ បានផ្ដល់​សុខសន្ដិភាព​ដល់​ប្រជាជនកម្ពុជា និងបាន​ផ្ដល់​យុត្តិធម៌​ជូនជន​រងគ្រោះ​នៃរបប​វាលពិឃាតនោះ​ តាម​រយៈការបង្កើត​សាលាក្ដីខ្មែរក្រហម​ដើម្បីនាំយក​មេដឹកនាំរបប​ប្រល័យពូជសាសន៍នោះមក​ជំនុំជម្រះក្ដី។  

លោក ឡេងគា បន្ថែមថា រូបលោក​តំណាងឱ្យយុវជនដែលចូលរួមក្នុងដំណើរទស្សនកិច្ចសិក្សានៅក្នុងថ្ងៃនេះ សូម​​ថ្លែងនូវការ​​កោត​សរ​សើរ និង​ដឹង​គុណ​ដល់​គោល​នយោ​បាយ​ឈ្នះ​ឈ្នះ​របស់​រាជ​រដ្ឋា​ភិបាល​កម្ពុជា ​ដែល​បាន​ដឹក​នាំប្រទេស​នាំ​មក​នូវ​សុខ​សន្ដិភាព និងស្ថេរ​ភាព​សង្គម​។ ហើយលោកក៏សូម​អរ​​គុណដល់ អ.វ.ត.ក ដែល​បាន​រៀបចំ​កម្មវិធីនេះឡើង ដើម្បី​ឲ្យ​ពួក​គាត់​បាន​យល់​ដឹង បាន​ទស្សនា​ទីតាំង​​ឧក្រិដ្ឋកម្ម​ដែល​បន្សល់​ទុកពី​របប​ខ្មែរក្រហម និង​បាន​មក​ឃើញ​ការ​អភិវឌ្ឍ​ន៍​នៅ​ក្នុង​រាជ​ធានីភ្នំ​ពេញ​​​នាពេលបច្ចុប្បន្ននេះផងដែរ។

​សូមបញ្ជាក់​ថា អ.វ.ត.ក បានរៀបចំរៀងទស្សនកិច្ចសិក្សារៀង​រាល់សប្ដាហ៍ ជូនសិស្សានុសិស្ស និស្សិត យុវជន និង​ពលរដ្ឋទូទៅ ដើម្បីជួយជម្រុញដល់​ការចងចាំ និងការចូលរួម​ទប់​ស្កាត់ការវិល​ត្រ​ឡប់​មក​វិញ​នូវ​អំពើឃោរឃៅ​ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។​ ចាប់តាំងពីតុលាការ​ដំ​ណើ​ការ​ដំបូង រហូតមកដល់ឆ្នាំ​២០២៣ នេះ សាធារណ​ជនជាតិ និង​អន្តរ​ជាតិ​​ជាងកន្លះ​លាន​នាក់​ហើយ​ បាន​ចូលរួមក្នុងដំណើរទស្សនកិច្ចសិក្សា ក្រោមការសម្រប​សម្រួល និង​រៀបចំ​ដោយផ្នែកកិច្ចការ​សា​ធា​រណៈ​នៃសាលាក្តីខ្មែរក្រហម៕

ECCC

ECCC

ECCC

ECCC

ECCC

Most read