ប្រធានគណៈប្រតិភូ និងជាប្រធានក្រុមការងារយុវជនស្រុកចំការលើ លោក ប៊ិន ជីវ័ន្ដមុន្នីរៈ នៅថ្ងៃទី៣១ ខែឧសភា ឆ្នាំ២០២៣ នេះ បានដឹកនាំយុវជនប្រមាណ ១៦៣ នាក់ មកពីស្រុកចំការលើ ក្នុងខេត្តកំពង់ចាម ចូលរួមក្នុងកម្មវិធីទស្សនកិច្ចសិក្សារបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
លោក មុន្នីរៈ បានថ្លែងទៅកាន់យុវជនថា ទោះបីជារបបប្រល័យពូជសាសន៍ខ្មែរក្រហមបានរលត់ផុតទៅហើយ និងការឈឺចាប់របស់ប្រជាពលរដ្ឋខ្មែរក៏អាចបានស្បើយខ្លះហើយក្ដី ក៏ប៉ុន្ដែក្នុងនាមយុវជនជំនាន់ក្រោយមិនត្រូវបំភ្លេចទុក្ខខ្លោចផ្សាររបស់ប្រជាពលរដ្ឋពីរបបនោះផងដែរ។ លោកថា “ការឈឺចាប់របស់យើងអាចស្បើយបាន ប៉ុន្ដែយើងមិនអាចបំភ្លេចអតីតកាលដ៏ជូរចត់របស់យើងបាននោះទេ” វាជាសត្យានុម័តហោចណាស់យើងមានសាច់ញាតិម្នាក់បានស្លាប់នៅក្នុងរបបប្រល័យពូជសាន៍នេះ។ លោកបន្ដថា ក្នុងនាមយុវជនជំនាន់ក្រោយ ត្រូវតែនាំគ្នាសិក្សាប្រវត្តិសាស្ដ្ររបស់ខ្លួន ដោយត្រូវអានសៀវភៅ និងស្រាវជ្រាវឱ្យច្បាស់ពីប្រវត្តិសាស្ដ្រដ៏ឃោរឃៅរបស់ខ្មែរក្រហម ដែលបានប្រព្រឹត្ដិមកលើប្រជាជនកម្ពុជាយើង។
ប្រធានក្រុមការងារយុវជនរូបនេះ ក៏បានជម្រុញឱ្យយុវជនទាំងអស់ត្រូវយកចិត្តទុកដាក់ស្ដាប់បទបង្ហាញនៅតាមទីតាំងនីមួយៗដែលពួកគេបានមកទស្សនាក្នុងថ្ងៃនេះផងដែរ ដោយលោកបញ្ជាក់ថា ដំណើរទស្សនកិច្ចសិក្សានៅថ្ងៃនេះ មានសារៈសំខាន់ណាស់សម្រាប់យុវជនទាំងអស់គ្នា ជាឱកាសកម្រទទួលនូវពុទ្ធិដោយផ្ទាល់ក្នុងការទទួលបានចំណេះដឹងប្រវត្តិសាស្ដ្រពិតប្រាកដពីទង្វើឃោរឃៅរបស់របបខ្មែរក្រហម ចលនាតស៊ូក្នុងការរំដោះប្រទេសជាតិរបស់រាជរដ្ឋាភិបាលកម្ពុជាពីរបបប្រល័យពូជសាសន៍ និងរឿងរ៉ាវជុំវិញការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។
លោក មុន្នីរៈ ក៏បានសម្ដែងនូវក្ដីអំណរអរគុណដល់ប្រមុខរាជរដ្ឋាភិបាលកម្ពុជា ដែលលោកបានកំពុងដឹកនាំប្រទេសឱ្យទទួលបានសុខសន្ដិភាព និងបានរីកចម្រើនគ្រប់វិស័យរហូតមកដល់សព្វថ្ងៃនេះ និងបានអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដើម្បីឱ្យយុវជនបានស្វែងយល់ច្បាស់អំពីប្រវត្តិសាស្ដ្រ និងដំណើរវិវដន្ដ៍របស់កម្ពុជា។
សូមបញ្ជាក់ថា ក្នុងដំណើរទស្សនកិច្ចសិក្សានៅថ្ងៃនេះ យុវជនទាំងអស់បានទៅទស្សនកិច្ចសិក្សាវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងមានបទបង្ហាញរបស់មន្ដ្រីមកពីសាលាក្ដីខ្មែរក្រហម អំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។
កម្មវិធីទស្សនកិច្ចសិក្សានេះត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
