យុវសិស្ស ឡាយ តេកឃាង ជាសិស្សថ្នាក់ទី១១ នៃវិទ្យាល័យមហាមង្គល ហ៊ុន សែន មហាសៀក ក្នុងស្រុកកោះសូទិន នៅថ្ងៃទី២២ ខែមិថុនា នេះ បានរួមដំណើរជាមួយមិត្តរួមវិទ្យាល័យរបស់លោក មកចូលរួមក្នុងកម្មវិធីទស្សនកិច្ចសិក្សារៀបចំដោយសាលាក្ដីខ្មែរក្រហម។
នៅក្នុងដំណើរទស្សនកិច្ចនោះ តេកឃាង បានលើកឡើងថា បើទោះបីជាលោកកើតមិនទាន់របបកម្ពុជាប្រជាធិបតេយ្យ ក៏ដោយ ប៉ុន្ដែលោកបានដឹងយ៉ាងច្បាស់ថា ក្នុងរបបនោះ ពិតជាឃោរឃៅខ្លាំងណាស់។ យុវសិស្សថ្នាក់ទី១១ រូបនេះបន្ថែមថា លោកបានដឹងរឿងរ៉ាវខ្លះៗនេះរបបនោះ តាមរយៈការសិក្សារៀនសូត្រ តាមបណ្ដាញសង្គម និងជាពិសេសគឺការនិយាយប្រាប់ពីចាស់ៗនៅក្នុងភូមិរបស់គាត់។
តេកឃាង បាននិយាយថា៖ “ខ្ញុំជឿ(ថា) របបនឹងឃោរឃៅខ្លាំង ដូចជាគេចាប់បង្ខំឱ្យយើងធ្វើការអីទាំងក្មេងអីចឹង ឱ្យយើងស្លៀកពាក់ប្ដូរខោអាវទៅជាពណ៌ខ្មៅអីទាំងអស់ ហើយឱ្យយើងធ្វើការលើសម៉ោងធម្មតាហើយឱ្យតែទឹកបបរហូប តាមកន្លែងខ្លះបានបបរច្រើន កន្លែងខ្លះបានតិច ហើយមានលាយពោត លាយអីចឹង ហើយបើសិនយើងធ្វើការអីហើយ យើងឃ្លានអី យើងចង់ទៅលួចរបស់របរគេ ជួនកាលពួកនឹងវាមានគ្នាច្រើនគេប្រាប់ទៅ គេអាចយកយើងទៅសម្លាប់ចោលអីចឹងទៅ ហើយនៅក្នុងរបបនឹងគេសម្លាប់មនុស្សច្រើន។”
សម្រាប់ យុវសិស្សថ្នាក់ទី១១ រូបនេះ ដើម្បីចូលរួមទប់ស្កាត់របបឃោរឃៅនោះ យុវជនជំនាន់ក្រោយត្រូវសិក្សាប្រវត្តិសាស្ដ្រកម្ពុជាប្រជាធិបតេយ្យឱ្យបានច្បាស់លាស់ ហើយចូលរួមចៀសវាងការធ្វើអំពើឃោរឃៅដូចនោះផងដែរ។
សូមបញ្ជាក់ថា នៅថ្ងៃទី២២ ខែមិថុនា ឆ្នាំ២០២៣ នេះ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្សប្រមាណ១៧០ នាក់ មកពីវិទ្យាល័យមហាមង្គល ហ៊ុន សែន មហាសៀក ក្នុងស្រុកកោះសូទិន ខេត្ដកំពង់ចាម ទៅទស្សនកិច្ចសិក្សានៅវិមានឈ្នះ ឈ្នះ មជ្ឈមណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។
កម្មវិធីទស្សនកិច្ចសិក្សានេះ ត្រូវបាន អ.វ.ត.ក រៀបចំឡើងរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
