ពេលនេះគឺឆ្នាំ២០១៣ហើយ ការបង្កើត blog ពុំមែនជាអ្វីដែលថ្មីទេ។ បើដូច្នោះ ហេតុអ្វីបានជាយើងបង្កើត blog ធ្វើអ្វី?
ផ្នែកកិច្ចការសាធារណៈនៃ អ.វ.ត.ក បានព្យាយាមប្រើប្រាស់វិធីផ្សេងៗគ្នាជាច្រើនដើម្បីជូនដំណឹងដល់សាធារណជន អំពីកិច្ចការរបស់ អ.វ.ត.ក។ ជារឿយៗ ព្រឹត្តិការណ៍សំខាន់ៗដែលកើតឡើងនៅ អ.វ.ត.ក ត្រូវបានផ្សព្វផ្សាយតាមរយៈសេចក្តីប្រកាសព័ត៌មាន តាមរយៈគេហទំព័រ និងតាមរយៈរបាយការណ៍តុលាការប្រចាំខែរបស់តុលាការ។ អ.វ.ត.ក គឺជាតុលាការនិយាមអន្តរជាតិទីមួយដែលប្រើប្រាស់បណ្តាញព័ត៌មានសង្គម ដូចជា facebook និង twitter ជាយុទ្ធសាស្រ្តផ្សព្វផ្សាយព័ត៌មាន។
ទោះជាយ៉ាងនេះក៏ដោយ មានរឿងរ៉ាវមួយចំនួននៅក្នុងដំណើរការរបស់តុលាការដែលពុំអាចរៀបរាប់អស់ក្នុងមួយកថាខ័ណ្ឌដ៏ខ្លីដែលមានតែ ១៤០ ពាក្យបានឡើយ ក៏ប៉ុន្តែ រឿងរ៉ាវទាំងអស់នោះក៏មិនសំខាន់រហូតដល់ត្រូវចេញជាសេចក្តីប្រកាសព័ត៌មានដែរ។ វិធីសាស្រ្តចាស់ៗមួយចំនួនទៀតក្នុងទំនាក់ទំនង អនុញ្ញាតឲ្យព័ត៌មានចេញពីភាគីតែម្ខាង ហើយអ្នកអានពុំមានឧិកាសបញ្ចេញមតិយោបល់ឬសួរសំណួរអ្វីទាំងអស់។
យើងសង្ឃឹមថា blog ដែលយើងបម្រុងបង្កើត នឹងបំពេញចន្លោះប្រហោងទាំងនេះក្នុងទំនាក់ទំនងព័ត៌មាន។
យើងនឹងប្រើប្រាស់វាសម្រាប់ផ្សព្វផ្សាយព័ត៌មានអំពីដំណើរការថ្មីៗបំផុតនៅតុលាការ និងព្យាយាមបង្ហាញរូបភាពអំពីថាតើយើងចាំបាច់ត្រូវធ្វើអ្វីខ្លះដើម្បីធ្វើឲ្យដំណើរការនូវតុលាការមួយដែលមានកម្រិតដូចដែលលោកអ្នកបានឃើញនៅ អ.វ.ត.ក។ Blog នេះនឹងសរសេរដោយបុគ្គលិកជាតិនិងអន្តរជាតិនៃផ្នែកកិច្ចការសាធារណៈ។ យើងមានបំណងបន្ថែមព័ត៌មានថ្មីៗរៀងរាល់មួយសប្តាហ៍ម្តង។
យើងលើកទឹកចិត្តឲ្យសាធារណជនដែលបានទស្សនា blog នេះ ឲ្យចូលរួមផ្តល់មតិយោបល់ មកយើងខ្ញុំវិញ ឬសួរសំណួរផ្សេងៗ។ យើងគ្រាន់តែសំណូមពរឲ្យលោកអ្នកចៀសវាងប្រើភាសាពុំសមរម្យ ដែលមានន័យប្រមាថមាក់ងាយ ឬអុជអាលបញ្ឆេះកំហឹង ឬបន្តុះបង្អាប់បុគ្គលណាម្នាក់។
ឥឡូវនេះវាអាស្រ័យទៅលើលោកអ្នក តើលោកអ្នកចង់ឲ្យយើងខ្ញុំសរសេរអំពីអ្វីបន្ថែមទៀត?