ការ​ផ្សព្វផ្សាយ​ពី ​អ.វ.ត.ក ​នៅ​វិទ្យាស្ថាន​ទ័ព​ជើង​គោ​ក​

និស្សិតនាយទាហានស្ត្រី និងបុរសចំនួន ៨០០ នាក់បានប្រែក្លាយពហុកីឡដ្ឋាននៅវិទ្យា
ស្ថានកងទ័ពជើងគោកក្នុងខេត្តកំពង់ស្ពីឲ្យទៅជាកន្លែងពង្រឹងចំណេះដឹង កាលពីព្រឹកថ្ងៃសុក្រ ទី២១ ខែមិថុនា ឆ្នាំ ២០១៣ កន្លងទៅ។
 

និស្សិតនាយទាហានថ្នាក់បរិញ្ញាបត្រនៃវិទ្យាស្ថានទ័ពជើងគោកបានមកចូលរួមស្តាប់ការធ្វើបឋកថាមួយដែលផ្តល់ជូនដោយមន្ត្រីផ្នែកកិច្ចការសាធារណៈរបស់អង្គ
ជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ នេះគឺជាលើកទី២ ហើយដែលផ្នែកកិច្ចការសាធារណៈបានធ្វើបឋកថានៅវិទ្យាស្ថានកងទ័ពជើងគោកនៅក្នុងរយៈពេលមួយឆ្នាំមកនេះ។ លោក នេត្រ ភក្ត្រា មន្ត្រីនាំពាក្យនៃ អ.វ.ត.ក បានមកធ្វើបទបង្ហាញនៅទីនោះជាលើកទី១ កាលពីខែកក្កដា ឆ្នាំ ២០១២។ អ្នកដែលបានចូលរួមស្តាប់នៅក្នុង ការធ្វើបឋកថានេះគឺភាគច្រើនជានិស្សិតនាយទាហានជំនាន់ថ្មី និងចាស់មួយចំនួន។ គោលបំណង នៃការធ្វើបឋកថានេះដើម្បីជម្រាបដល់ពួកគាត់អំពីការវិវឌ្ឍថ្មីៗរបស់សាលាក្តីខ្មែរក្រហម។

បឋកថារបស់លោក នេត្រ ភក្ត្រា បានចាប់ផ្តើមឡើងជាមួយការពិនិត្យជាទូទៅទាក់ទងនឹងប្រវត្តិសាស្ត្រនៃរបបខ្មែរក្រហម ដំណើរវិវឌ្ឍន៍នៃដំណើរការរបស់ អ.វ.ត.ក ចាប់តាំងពីឆ្នាំ ២០០៦ ហើយ នៅពេលខ្លះក៏មានការជួបប្រទះនូវបញ្ហាថវិកាផងដែរ។ បឋកថាបានលើកឡើងពីទិដ្ឋភាពផ្លូវច្បាប់ នៃការបិទបញ្ចប់សំណុំរឿង ០០១ ដំណើរការជំនុំជម្រះក្តីសំណុំរឿង ០០២ និងការវិវឌ្ឍជុំវិញសំណុំ រឿង ០០៣ និង០០៤។ បន្ទាប់ពីបានចំណាយរយៈពេលបីម៉ោងក្នុងការធ្វើបទបង្ហាញ និងការឆ្លើយ សំណួរ  ការធ្វើបឋកថានេះហាក់ដូចជាមិនចង់ចប់សោះ ដោយសារតែនិស្សិតនាយទាហានជាច្រើនរូប មានការចាប់អារម្មណ៍ខ្ពស់ និងបានធ្វើការចោទសួរនូវសំណួរជាច្រើន ដើម្បីទទួលបាន ចំណេះដឹងបន្ថែមអំពីបញ្ហាខ្មែរក្រហម និងដំណើរការរបស់ អ.វ.ត.ក។

និស្សិតខ្លះបានចោទសួរអំពីស្ថានភាពហិរញ្ញវត្ថុរបស់ អ .វ.ត.ក។ តើភាគីជាតិនៃសាលាក្តីខ្មែរក្រហម អាចដំណើរការជំនុំជម្រះក្តីបានដែរឬទេ ប្រសិនបើគ្មានជំនួយពីអន្តរជាតិ? តើប្រទេសកម្ពុជានឹងត្រូវសងនូវរាល់ថវិកាជំនួយដែលប្រទេសម្ចាស់ជំនួយផ្តល់ឲ្យសាលាក្តី ឬយ៉ាងណា? តើមានរយៈពេល ប៉ុន្មានទៀតដែលប្រទេសម្ចាស់ជំនួយផ្តល់ការគាំទ្រថវិកាដល់តុលាការ? ខ្លះបានធ្វើការចោទសួរទាក់ ទងនឹងវិស័យនយោបាយ ដោយបានចោទសួរថា ហេតុអ្វីបានជា អ.វ.ត.ក ទើបតែបង្កើតឡើង
ក្រោយពីរបបខ្មែរក្រហមដួលរលំពីអំណាចជាច្រើនទសវត្សរ៍មកហើយនោះ?  អ្នកខ្លះទៀតបានចោទសំណួរដូចដែលប្រជាជនខ្មែរទូទៅបានចោទសួរដែរថា ប៉ុល ពត បានអះអាងថាខ្លួនជាអ្នក សេ្នហាជាតិ តើមូលហេតុអ្វីបានជារបបគាត់មានការសម្លាប់មនុស្សដ៏ច្រើនយ៉ាងនេះ? ហេតុអ្វីបាន ជាតុលាការចំណាយពេលវេលាយូរម្ល៉េះ បើតាមការលើកឡើងរបស់និស្សិតនាយទាហានម្នាក់ថា «យើងបានដឹងអស់ទៅហើយថាមានអំពើឧក្រិដ្ឋកម្មដែលបានកើតឡើងនោះ?»។ សរុបទៅ លោក នេត្រ ភក្ត្រា បានទទួលសំណួរទាំងអស់ជាង ៧០ ដែលធ្វើឲ្យវគ្គសួរ និងឆ្លើយក្នុងការចុះផ្សព្វផ្សាយដល់ប្រជាពលរដ្ឋមានរយៈពេលវែងជាងគេក្នុងចំណោមការផ្សព្វផ្សាយនានាចាប់តាំងពីឆ្នាំ ២០០៩ មក។  
 

លោក សុខ សាន្ត ដែលជាសាស្ត្រាចារ្យបង្រៀនប្រវត្តិសាស្ត្រនៅវិទ្យាស្ថានទ័ពជើងគោក បានរៀបចំដំណើរទស្សនកិច្ចនេះ។ លោកបានលើកឡើងថា លោកបានបង្រៀនប្រវត្តិសាស្ត្រនៃរបបកម្ពុជាប្រជាធិបតេយ្យដល់និស្សិតរបស់លោក ប៉ុន្តែបានជំរុញដល់ពួកគាត់ក្នុងការពង្រឹងសមត្ថភាពរបស់ពួកគាត់បន្ថែមទៀតតាមវិធីផ្សេងៗ។ ពួកគេមួយចំនួនបានមកធ្វើទស្សនកិច្ចសិក្សាស្វែងយល់រួចម្តង មកហើយនៅសាលាក្តីខ្មែរក្រហម។ និស្សិតមានចម្ងល់ជាច្រើនទាក់ទងនឹងតុលាការ ប៉ុន្តែគ្មាន
នរណាម្នាក់អាចឆ្លើយប្រាប់ពួកគេបានឡើយ។ លោកមានជំនឿថា ការផ្សព្វផ្សាយរបស់សាលាក្តីខ្មែរក្រហមនេះដោយមានមន្ត្រីនាំពាក្យសាលាក្តីបានឆ្លើយទៅនឹងសំណួររបស់ពួកគេ និស្សិតទាំងអស់ នឹងបានទទួលព័ត៌មានច្រើន និងបានចំណេះដឹង ហើយនិស្សិតរបស់គាត់មួយចំនួនក៏ត្រៀមក្នុងការ ធ្វើដំណើរមកកាន់សាលាក្តីខ្មែរក្រហមដើម្បីតាមដានសវនាការ ក៏ដូចជាធ្វើទស្សនកិច្ចសិក្សាស្វែង យល់ពីទីតាំងឧក្រិដ្ឋកម្មនានាដូចជា វាលពិឃាតបឹងជើងឯក និងគុកទួលស្លែងជាដើម។

តំណាងផ្នែកិច្ចការសាធារណៈរបស់ អ.វ.ត.ក បានបញ្ចប់កិច្ចការរបស់ខ្លួន ជាមួយការចែកអាវយឺត មួក និងសៀវភៅសំណួរ-ចម្លើយស្តីពីអង្គជំនុំជម្រះវិសាមញ្ញក្នុងតុលាការកម្ពុជា និងសាលដីកាស្ថាពរលើករណី ០០១ ទៅដល់និស្សិតទាំងអស់៕