ការសិក្សាបង្ហាញថា ៧៥% នៃដើមបណ្តឹង​រដ្ឋប្បវេណី​និយាយថា អ.វ.ត.ក ធ្វើបាន​ល្អ​គ្រប់គ្រាន់​សម្រាប់​ជនរងគ្រោះ

Posted 29 មេសា 2013 by លោក ឡាស អូលសិន

នៅក្នុងការសិក្សាមួយដែលទើបតែបាន​បោះពុម្ព​ផ្សាយ​ថ្មីៗនេះ ដោយ Harvard Humanitarian Initiative, Harvard University និង​សមាគម​អាដហុក (ADHOC), ៧៤,៥% នៃ​ដើមបណ្តឹង​រដ្ឋប្បវេណី​ដែល​បាន​ចូលរួម​ក្នុង​ការសិក្សានេះ បាន​និយាយ​ថា អ.វ.ត.ក ធ្វើការ​បាន​ល្អ​គ្រប់គ្រាន់​សម្រាប់​ជនរងគ្រោះ​នៃ​របប​ខ្មែរក្រហម។

ការសិក្សា​បាន​បង្ហាញ​ថា ដើមបណ្តឹង​រដ្ឋប្បវេណី​មានការ​ពេញចិត្ត​ចំពោះ អ.វ.ត.ក និង​ដំណើរការ​នីតិវិធី​ដែល​កំពុងតែ​ប្រព្រឹត្ត​ទៅ។ ខាងក្រោមនេះ​គឺជា​លទ្ធផល​នៃ​ការ​ឆ្លើយតប​មួយចំនួន​របស់​ដើមបណ្តឹង​រដ្ឋប្បវេណី៖

  • ៩៥,២% ជឿជាក់ថា អ.វ.ត.ក នឹង​នាំ​យុត្តិធម៌​ជូន​ជនរងគ្រោះ និង/ឬ ក្រុម​គ្រួសារ​របស់​ជនរងគ្រោះ
  • ៩១,២% ជឿជាក់ថា អ.វ.ត.ក លើក​កម្ពស់​ការផ្សះផ្សារ​ជាតិ
  • ៨៨,៨% ជឿជាក់​ថា អ.វ.ត.ក មាន​អព្យាក្រឹតភាព
  • ៨៨,៨% ជឿជាក់ថា ចៅក្រម​នៅ អ.វ.ត.ក មានភាពយុត្តិធម៌
  • ៧៤,៨% និយាយថា គាត់អាច​ចំណាយ​ប្រាក់​លើ អ.វ.ត.ក បើទោះជា​គាត់​អាច​ប្រើប្រាស់​ប្រាក់នោះ​ដើម្បី​ធ្វើអ្វី​ផ្សេង​ក៏ដោយ
  • ៧៤,៥% និយាយថា អ.វ.ត.ក ធ្វើបាន​ល្អគ្រប់គ្រាន់​សម្រាប់​ជនរងគ្រោះ​នៃ​របប​ខ្មែរក្រហម

នៅពេល​សួរអំពី​ឆន្ទៈ​របស់គាត់​ក្នុង​ការ​ចូលរួម​ក្នុង​ដំណើរការ​របស់ អ.វ.ត.ក ក្នុង​នាម​ជា​ដើមបណ្តឹង​រដ្ឋប្បវេណី​ក្នុង​សំណុំរឿង ០០២ អ្នក​ឆ្លើយ​សំណួរ​ចំនួន ៧០,១% ឆ្លើយថា គាត់ធ្វើនេះ​ដើម្បី​ទាមទារ​យុត្តិធម៌​ជូន​មនុស្ស​ជាទី​ស្រលាញ់​របស់​គាត់។

សាធារណជន​អាច​ទាញ​យក​របាយការណ៍​នៃ​ការ​សិក្សា​នេះ នៅក្នុង link ខាងក្រោម៖

http://www.eccc.gov.kh/sites/default/files/Victims-participation-before-ECCC-Baseline-Study-Jan-2013.pdf

លទ្ធផលនៃការសិក្សានេះ យោងតាម​បទសម្ភាសន៍​ជាមួយ​តំណាង​ដើមបណ្តឹង​រដ្ឋប្បវេណី​ចំនួន ១២០នាក់ និង​ដើមបណ្តឹង​រដ្ឋប្បវេណី​ចំនួន ២៩៤នាក់ ដែល​ត្រូវបាន​ជ្រើសរើស​ដោយ​ព្រាវ​ចេញពី​បញ្ជីឈ្មោះ​ដើមបណ្តឹង​រដ្ឋប្បវេណី​ក្នុង​សំណុំរឿង ០០២ ចំនួន ១ ០៥៨ នាក់ ដែល​បាន​ទទួល​ជំនួយ​គាំទ្រ​ពី​អង្គការ​អាដហុក។ ដើមបណ្តឹង​រដ្ឋប្បវេណី​ចំនួន ១ ០៥៨ នាក់នេះ ស្មើនឹង ៤៩,៣% នៃចំនួន​ដើមបណ្តឹង​រដ្ឋប្បវេណី​ទាំងអស់​ក្នុង​សំណុំរឿង ០០២។ ដូច្នេះ លទ្ធផល​នៃការ​សិក្សា​នេះ​អាច​​តំណាង​ឲ្យការ​យល់ឃើញ​របស់​ដើមបណ្តឹង​រដ្ឋប្បវេណី​ទាំងអស់​ក្នុង​សំណុំរឿង ០០២។

 

អ.វ.ត.ក គឺជាតុលាការ​ទីមួយ​ដែល​ជំនុំជម្រះ​ក្តី​ឧក្រិដ្ឋកម្ម​ទ្រង់ទ្រាយ​ធំ​ជា​លក្ខណៈ​អន្តរជាតិ ដែល​ផ្តល់ឧិកាស​ឲ្យ​ជនរងគ្រោះ​បាន​ចូលរួម​ដោយ​ផ្ទាល់​ក្នុង​ដំណើរការ​តុលាការ ក្នុងនាម​ជា​ដើមបណ្តឹង​រដ្ឋប្បវេណី។ ដើមបណ្តឹង​រដ្ឋប្បវេណី​គឺជា​ភាគី​នៅក្នុង​ដំណើរការ​ជំនុំជម្រះ ដែល​ប្រឆាំងនឹង​ជនជាប់ចោទ​ដែល​ត្រូវ​ជំនុំជម្រះ​នៅ​ចំពោះមុខ អ.វ.ត.ក ហើយ​ក្រុមនេះ​មាន​សិទ្ធិ​ប្រហាក់ប្រហែល​នឹង​សហ​ព្រះរាជអាជ្ញា​និង​ចុងចោទ​ដែរ។ ដើមបណ្តឹង​រដ្ឋប្បវេណី​អាច​ទាមទារ​សំណង​ផ្លូវចិត្ត​និង​សំណង​សមូហភាព ប៉ុន្តែ​ពុំមាន​សិទ្ធិ​ទទួល​បាន​សំណង​ហិរញ្ញវត្ថុ​ជា​លក្ខណៈ​បុគ្គល​ឡើយ។

 

បុគ្គលណាក្តី ដែល​អាច​បង្ហាញ​ថា​ខ្លួនបាន​ទទួល​រងទុក្ខ​ផ្លូវកាយ ផ្លូវចិត្ត ឬផ្លូវសម្ភារៈ ដោយ​ផ្ទាល់​ពី​អំពើ​នៃ​ឧក្រិដ្ឋកម្ម​ដែល​ត្រូវបាន​លើក​យកមក​ជំនុំជម្រះ​នៅ​ចំពោះមុខ អ.វ.ត.ក អាច​ដាក់​ពាក្យ​សុំតាំងខ្លួន​ជា​ដើមបណ្តឹង​រដ្ឋប្បវេណី។ ដើមបណ្តឹង​រដ្ឋប្បវេណី​មាន​សិទ្ធិ​មាន​មេធាវី​តំណាង​រូបគាត់​ក្នុង​អំឡុង​ពេល​ស៊ើប​អង្កេត និង​ក្នុង​អំឡុង​ដំណើរការ​នីតិវិធី។ ក្នុង​អំឡុង​ដំណើរការ​នីតិវិធី​និង​ពេល​ក្រោយ សហមេធាវី​នាំមុខ​តំណាង​ដើមបណ្តឹង​រដ្ឋប្បវេណី​ជាអ្នក​សម្រប​សម្រួល​ការ​ធ្វើជា​តំណាង​តាម​ផ្លូវច្បាប់​នៃ​ដើមបណ្តឹង​រដ្ឋប្បវេណី​ទាំងអស់​ដែល​នៅក្នុង​ដំណាក់​កាល​នេះ ត្រូវបាន​បែងចែក​ជា​ក្រុមៗ។