ខ្មែរក្រហមៈ "តើជាការពិតដែរឬទេ?"​

កម្មសិក្សាការីនៅផ្នែកកិច្ចការសាធារណៈ លោក ថម៉ាស់ ស្ទីវិនសាន់ រាយការណ៍អំពីការធ្វើបទឧទ្ទេសនាមដល់សិស្សសាកលវិទ្យាល័យនៅភាគខាងត្បូងប្រទេស។

កាលពីថ្ងៃសុក្រ ខ្ញុំមានឧិកាសបានរួមដំណើរជាមួយមន្ត្រីកិច្ចការសាធារណៈក្នុងដំណើរផ្សព្វផ្សាយព័ត៌មាននៅសាកលវិទ្យាល័យស្វាយរៀង។ និស្សិតប្រមាណ ២០០-៣០០នាក់ អាយុចន្លោះពី១៨ដល់ ២២ ឆ្នាំ បានចូលរួមស្តាប់បទឧទ្ទេសនាម។ ខណៈដែលមន្ត្រីកិច្ចការសាធារណៈ នេត្រ ភក្ត្រា កំពុងតែធ្វើបទបង្ហាញ ខ្ញុំឆ្លៀតគេចចេញទៅក្រៅសាលដើម្បីជួបជាមួយអ្នករៀបចំកម្មវិធី គឺលោក ហែម ស៊ុនត្រាក់វឌ្ឍ។

លោកគ្រូ ស៊ុនត្រាក់វឌ្ឍ អាយុ៣៤ឆ្នាំ បង្រៀនភាសាអង់គ្លេសកម្រិតខ្ពស់នៅស្វាយរៀង។ លោកកើតនៅឆ្នាំដែលខ្មែរក្រហមដួលរលំពីអំណាច ហើយលោកឆ្លងកាត់បទពិសោធន៍អំពីសំណល់នៃរបបខ្មែរក្រហមនៅក្នុងជីវិតរបស់លោក។ លោក ស៊ុនត្រាវឌ្ឍ ពុំដែលបានឃើញមុខសមាជិក៦នាក់ទៀត  ក្នុងគ្រួសាររបស់លោកឡើយ ដោយសារអ្នកទាំងនោះបានស្លាប់នៅឯវាលស្រែ និងនៅការដ្ឋានពលកម្ម របស់ខ្មែរក្រហមអស់ទៅហើយ។ គាត់និយាយថា ម្តាយរបស់គាត់ធ្លាប់និយាយអំពីរបបខ្មែរក្រហម ព្រោះចង់ឲ្យគាត់យល់អំពីផលវិបាកដែលបានប៉ះពាល់ដល់កំណើតរបស់លោក។

លោក ហែម ស៊ុនត្រាក់វឌ្ឃ (រូបថតៈ អ.វ.ត.ក /ថម៉ាស់ ស្ទីវិនសាន់)

តាំងពីមកដល់ប្រទេសកម្ពុជា ពីរបីខែមុន ខ្ញុំចាប់ផ្តើមយល់ថា មិនមានគ្រួសារកម្ពុជាច្រើនទេ ដែលនិយាយរឿងរ៉ាវអំពីបទពិសោធន៍របស់គាត់ក្នុងរបបកម្ពុជាប្រជាធិបតេយ្យ។ ខ្ញុំសួរថាតើនិស្សិតមានសិក្សាអំពីប្រវត្តិសាស្រ្តកម្ពុជាចន្លោះឆ្នាំ ១៩៧៥-៧៩ នៅសាលាដែរឬទេ។ លោកគ្រូ ស៊ុនត្រាវឌ្ឍ ឆ្លើយថា នៅឆ្នាំទី១មានកម្មវិធីសិក្សាអំពីប្រវត្តិសាស្រ្តកម្ពុជាប្រជាធិបតេយ្យរយៈពេល១ឆមាស ហើយលោកជឿថា កម្មវិធីដែលបានរៀបចំនោះមានសុក្រឹតភាព ទៅតាមហេតុការណ៍ជាក់ស្តែងដែលបានកើតឡើង។ បើទោះជាយ៉ាងនេះក៏ដោយ និស្សិតមួយចំនួននៅតែមិនជឿ។ លោកគ្រូ ស៊ុនត្រាវឌ្ឃ បន្ត៖ "ខ្ញុំនៅចាំនិស្សិតស្រីម្នាក់សួរខ្ញុំថា តើរឿងនេះពិតមែនឬក៏មិនពិត"។

ដោយសារតែមានកង្វល់ថា និស្សិតរបស់លោកពុំមានការយល់ដឹងគ្រប់គ្រាន់អំពីការពិតដែលកើតឡើងនៅក្នុងរបបខ្មែរក្រហម លោកគ្រូ ស៊ុនត្រាវឌ្ឃ ព្យាយាមរកវិធីណាឲ្យនិស្សិតបានទទួលចំណេះដឹងបន្ថែម។ លោកបានឮតាមវិទ្យុនិងទូរទស្សន៍អំពីដំណើរទស្សនកិច្ចសិក្សានៅ អ.វ.ត.ក, វាលពិឃាតជើងឯក និងគុកទួលស្លែង ដែល អ.វ.ត.ក អាចរៀបចំជូនដោយមិនគិតកម្រៃ។ លោកបានរៀបចំដំណើរទស្សនកិច្ចសម្រាប់សិស្សរបស់លោកចំនួនពីរលើកមកហើយ។ មានម្តងនោះ និស្សិតស្រីដែលមិនជឿ បានមកទស្សនាសវនាការជំនុំជម្រះក្តី ឌុច អតីតប្រធានមន្ទីរ ស-២១។ បន្ទាប់ពីដំណើរទស្សនកិច្ច នាងនិយាយថា "ខ្ញុំជឿថានេះជាការពិត"។

លោកគ្រូ ស៊ុនត្រាវឌ្ឍ ប្រាប់ខ្ញុំថា គាត់គាំទ្រដំណើរការរបស់ អ.វ.ត.ក យ៉ាងពេញទំហឹង និងថា តុលាការនេះបានបង្ហាញការពិតនៃប្រវត្តិសាស្រ្តដ៏ខ្មៅងងឹតរបស់កម្ពុជា។ លោកគ្រូបន្ថែមថា "មនុស្សជំនាន់ក្រោយត្រូវតែយល់"។

បទសម្ភាសន៍របស់ខ្ញុំជាមួយលោកគ្រូ ហែម ស៊ុនត្រាវឌ្ឍ នឹងបោះពុម្ពផ្សាយនៅក្នុងរបាយការណ៍តុលាការសម្រាប់ខែមិថុនា។

និស្សិតនៅសាកលវិទ្យាល័យស្វាយរៀងស្តាប់បទឧទ្ទេសនាមរបស់លោក នេត្រ ភក្ត្រា មន្ត្រីនាំពាក្យ អ.វ.ត.ក (រូបថតៈ អ.វ.ត.ក /ថម៉ាស់ ស្ទីវិនសាន់)


និស្សិតនៅសាកលវិទ្យាល័យស្វាយរៀងស្តាប់បទឧទ្ទេសនាមរបស់មន្ត្រីនាំពាក្យ អ.វ.ត.ក ថ្ងៃទី ១៧ ខែឧសភា ឆ្នាំ២០១៣ (រូបថតៈ អ.វ.ត.ក /ថម៉ាស់ ស្ទីវិនសាន់)