ឯកឧត្តមឧត្តមសេនីយ៍ឯក Jerry Mateparae អគ្គទេសាភិបាលនៃប្រទេសនូវ៉ែលហ្សេឡង់ បានដឹកនាំគណៈប្រតិភូចំនួន ១៤ រូបមកកាន់ អ.វ.ត.ក កាលពីថ្ងៃទី៩ ខែសីហា ឆ្នាំ ២០១៣ ក្នុងអំឡុងពេលឯកឧត្តម ធ្វើទស្សនកិច្ចផ្លូវរដ្ឋក្នុងប្រទេសកម្ពុជា។ នេះគឺជាលើកទីមួយហើយដែលមេដឹកនាំមួយរូបដែលមានឋានៈជាប្រមុខរដ្ឋ បានមកទស្សន
កិច្ចនៅ អ.វ.ត.ក។ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលកម្ពុជាសម្រាប់តុលាការ ខ្មែរក្រហម និងឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទីនៃអ.វ.ត.ក បានស្វាគមន៍ឯកឧត្តមអគ្គទេសាភិបាល ព្រមទាំងបានជួបពិភាក្សាអំពីការវិវឌ្ឍថ្មីៗរបស់តុលាការ និងបញ្ហាប្រឈមផ្សេងៗ ដែល
តុលាការបាននិងកំពុងជួបប្រទះដើម្បី បញ្ចប់អាណត្តិរបស់ខ្លួន។ អគ្គទេសាភិបាលនៃប្រទេសនូវ៉ែលហ្សេឡង់ បានប្រកាសសន្យាផ្តល់ថវិកាបន្ថែមចំនួន ២០០.០០០ ដុល្លារណូវ៉ែលហ្សេឡង់ ជូនដល់ភាគីជាតិអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។