អត្ថបទព័ត៌មាន
សេចក្តីប្រកាសរបស់សហចៅក្រមស៊ើបអង្កេត ទាក់ទិននឹងសំណុំរឿង ០០៣ និង ០០៤
ដោយអនុលោមតាមវិធាន ៥៦(២) នៃវិធានផ្ទៃក្នុងនៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) សហចៅក្រមស៊ើបអង្កេតជូនដំណឹងដល់សាធារណជនអំពីការវិវត្តន៍ ទាក់ទងនឹងសំណុំរឿង ០០៣ និង ០០៤។ នៅក្នុងស្មារតីនៃកិច្ចសហការដូចដែលមានកំណត់នៅក្នុងច្បាប់ស្ដីពីការបង្កើត អ.វ.ត.ក និងវិធានផ្ទៃក្នុង សហចៅក្រមស៊ើបអង្កេតបានបង្កើតឲ្យមានជាក្រុមការងាររូមជាច្រើនក្រុម។ ភារកិច្ចបច្ចុប្បន្នរបស់ក្រុមការងារទាំងនេះគឺការពិនិត្យនិងវិភាគលើឯកសារនានាដែលមាននៅក្នុងសំណុំរឿង ជាពិសេសឯកសារដែលមានស្រាប់នៅក្នុងសំណុំរឿង ០០១ និង ០០២។ដូច្នេះ នៅក្នុងដំណាក់កាលបច្ចុប្បន្ននេះគឺមិនមានការចុះស៊ើបអង្កេតណាមួយកំពុងត្រូវបានធ្វើឡើយ។សហចៅក្រមស៊ើបអង្កេតសង្ឃឹមថា សេចក្ដីប្រកាសព័ត៌មាននេះនិងអាចបញ្ចៀសនូវរាល់ការយល់ខុស និងការបកស្រាយមិនត្រឹមត្រូវនានា ទាក់ទិននឹងស្ថានភាពបច្ចុប្បន្ននៃការងាររបស់ការិយាល័យសហចៅក្រមស៊ើបអង្កេតដែលនៅតែជាកិច្ចការសម្ងាត់នៅឡើយ។
អនុរដ្ឋមន្រ្តីក្រសួងការបរទេសនៃសហរដ្ឋអាមេរិកធ្វើទស្សនកិច្ចនៅសាលាក្តីខ្មែរក្រហម
មន្រ្តីជាន់ខ្ពស់នៃសហរដ្ឋអាមេរិកបានមកធ្វើទស្សនកិច្ចនៅសាលាក្តីខ្មែរក្រហមកាលពីព្រឹកថ្ងៃសៅរ៍ ទី ១៧ ខែ កក្កដា ឆ្នាំ ២០១០។ ដំណើរទស្សនកិច្ចនេះគឺដើម្បីស្វែងយល់អំពីកិច្ចការរបស់សាលាក្តីខ្មែរក្រហមដែលត្រៀមនឹងប្រកាសសាលក្រមទី១នៅថ្ងៃទី ២៦ ខែកក្កដា ខាងមុខនេះ។
អាល្លឺម៉ង់ បានចូលរួមចំណែកផ្តល់ថវិកាចំនួន ១,២ លាន អ៊ឺរ៉ូ ដល់ផ្នែកជាតិនៃ អ.វ.ត.ក
រដ្ឋាភិបាលនៃសាធារណរដ្ឋសហព័ន្ធរដ្ឋអាល្លឺម៉ង់បានចូលរួមចំណែកថវិកាចំនួន ១,២ លាន អ៊ឺរ៉ូ សម្រាប់ គម្រោងលើកកំពស់ការចូលរួមរបស់ជនរងគ្រោះនៅក្នុងកិច្ចដំណើរការនីតិវិធីនៅ អ.វ.ត.ក។ ឯកសារគម្រោងនេះ ត្រូវបានចុះហត្ថលេខា នៅថ្ងៃទី១៦ ខែធ្នូ ឆ្នាំ២០១០ ដោយនាយក GTZ ប្រចាំនៅតំបន់អាស៊ីខាងត្បូង ឡាវ និង កម្ពុជា និងដោយ ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក នៅថ្ងៃទី២០ ខែធ្នូ ឆ្នាំ២០១០។ថវិការួមចំណែកនេះត្រូវបានផ្តល់ជូនសម្រាប់គម្រោងរយៈពេល ១៦ ខែ គិតចាប់ពីខែកញ្ញា ឆ្នាំ២០១០ ហើយនឹងត្រូវបញ្ចប់ត្រឹមថ្ងៃទី៣១ ខែធ្នូ ឆ្នាំ២០១១ ដោយផ្តោតលើសកម្មភាពនៃការចាត់ចែងលើឯកសារ កម្មវិធី ចុះផ្សព្វផ្សាយ និងការតំណាងតាមផ្លូវច្បាប់នៅចំពោះមុខ អ.វ.ត.ក។ ការចូលរួមរបស់ជនរងគ្រោះគឺជាការងារ មួយក្នុងចំណោមការងារជាច្រើនទៀតដែល អ.វ.ត.ក បានបំបែកឯកត្តកម្ម ហើយបង្កើតជាបទដ្ឋានថ្មីៗសម្រាប់តុលាការទាំងឡាយដែលទទួលការគាំទ្រ និងចូលរួមពីអន្តរជាតិ។ គម្រោងនេះនឹងជួយបន្តជម្រុញឱ្យមានយុត្តិធម៌ និងការផ្សះផ្សាជាតិ តាមរយៈការអនុវត្តន៍សិទ្ធយ៉ាងពេញលេញរបស់ជនរងគ្រោះចំពោះមុខ អ.វ.ត.ក។ប្រទេសអាល្លឺម៉ង់ គឺជាប្រទេសផ្តល់ជំនួយសំខាន់មួយក្នុងចំណោមបណ្តាប្រទេសផ្តល់ជំនួយដទៃទៀត ដែលផ្តល់ការគាំទ្រដល់ អ.វ.ត.ក ជាហូរហែរមក ចាប់តាំងពីពេលសាលាក្តីនេះត្រូវបានបង្កើតឡើងនៅក្នុងឆ្នាំ២០០៦។ ចាប់ពីឆ្នាំ២០០៥រហូតដល់ពេលនេះ ប្រទេសអាល្លឺម៉ង់បានផ្តល់ថវិកាសរុបជាង ៧ លាន អ៊ឺរ៉ូ សម្រាប់ទាំងផ្នែកជាតិ និងអន្តរជាតិនៃអ.វ.ត.ក។ នៅក្នុងឆ្នាំ២០១០ ក៏ដូចជាឆ្នាំ២០០៩ ដែរ ប្រទេសអាល្លឺម៉ង់បានផ្តល់ថវិកាចំនួន ១,៥ លាន អ៊ឺរ៉ូ ដល់ អ.វ.ត.ក។
សេចក្តីប្រកាសព័ត៌មាន -
អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបន្តកិច្ចព្រមព្រៀងជាមួយអង្គការចិត្តសង្គមអន្តរវប្បធម៌ (ហៅកាត់ថា TPO) ក្នុងគោលបំណងចាក់ផ្សាយកម្មវិធីផ្សាយបន្តផ្ទាល់មួយតាមវិទ្យុដែលមានឈ្មោះថា “អតីតក្នុងបច្ចុប្បន្ន”។ កម្មវិធីនេះពិភាក្សាអំពីបញ្ហានានាពាក់ព័ន្ធនឹងជនរងគ្រោះសម័យខ្មែរក្រហម។ កិច្ចព្រមព្រៀងនេះគឺជាផ្នែកមួយនៃកិច្ចសហប្រតិបត្តិការរវាង អ.វ.ត.ក និង TPO ដែលបានដំណើរការតាំងពីឆ្នាំ២០០៩មក ដើម្បីជួយដល់ជនរងគ្រោះពីការប៉ះទង្គិចផ្លូវចិត្ត ក្នុងការប្រឈមមុខនឹងអតីតកាលដ៏គួរឲ្យរន្ធត់ក្រោមរបបខ្មែរក្រហម។ កម្មវិធីនេះនឹងត្រូវចាក់ផ្សាយចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០១១ នៅភ្នំពេញ និងនៅតាមបណ្តាខេត្តចំនួន៨ ទៀត។ កម្មវិធីនេះមានគោលបំណងដូចខាងក្រោម៖បង្កើនការយល់ដឹង និងធ្វើឲ្យសាធារណជនកម្ពុជាបានជ្រាបអំពីផលប៉ះពាល់នៃការប៉ះទង្គិចផ្លូវចិត្ត ដោយសាររបបខ្មែរក្រហម។ចែករំលែក និងផ្លាស់ប្តូរបទពិសោធន៍ (ពាក់ព័ន្ធនឹងការប៉ះទង្គិចផ្លូវចិត្ត) តាមរយៈការរៀបចំវេទិកាសាធារណៈ។ផ្តល់ការគាំទ្រផ្លូវចិត្ត និងមធ្យោបាយនានា ដែលអាចធ្វើឲ្យអ្នកស្តាប់មានលទ្ធភាពដោះស្រាយបញ្ហាសុខភាពផ្លូវចិត្តពាក់ព័ន្ធនឹងអតីតកាលសម័យខ្មែរក្រហម។ចងក្រងព័ត៌មានសាធារណៈស្តីពីការវិវឌ្ឍន៍ថ្មីៗនៅ អ.វ.ត.ក សម្រាប់ដើមបណ្តឹង រដ្ឋប្បវេណី និងជនរងគ្រោះនៃរបបខ្មែរក្រហម។យើងសង្ឃឹមថាកម្មវិធីនេះនឹងទាក់ទាញប្រិយមិត្តឲ្យទូរស័ព្ទចូលរួមដើម្បីចែករំលែកបទពិសោធន៍ និងជំរុញការផ្សព្វផ្សាយសារស្តីពីការព្យាបាល និងការផ្សះផ្សារ ឲ្យបានកាន់តែទូលំទូលាយក្នុងស្រទាប់មិត្តអ្នកស្តាប់។
សំណុំរឿង ០០២ ត្រូវបានបញ្ជូនទៅជំនុំជម្រះ
ថ្ងៃនេះ អង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបញ្ជាក់សម្រេច និងបានកែប្រែផ្នែកខ្លះនៃដីកាបញ្ជូនរឿងទៅជំនុំជម្រះក្តីលើករណីជនជាប់ចោទ អៀង សារី, អៀង ធីរិទ្ធ, ខៀវ សំផន, និង នួន ជា។ អង្គបុរេជំនុំជម្រះបានចេញដីកាបង្គាប់ឲ្យបញ្ជូនជនជាប់ចោទទៅជំនុំជម្រះ និងបន្តដាក់ជនជាប់ចោទក្នុងមន្ទីរឃុំឃាំងបណ្តោះអាសន្ន រហូតដល់ពេលមានការនាំខ្លួនពួកគាត់ទៅជំនុំជម្រះនៅចំពោះមុខអង្គជំនុំជម្រះសាលាដំបូង។ ដីកាបញ្ជូនរឿងទៅជំនុំជម្រះបានបញ្ចូលបទចោទនានា រួមមាន ឧក្រិដ្ឋកម្មប្រឆាំងនឹងមនុស្សជាតិ អំពើប្រល័យពូជសាសន៍ អំំំពើបំពារបំពានធ្ងន់ធ្ងរលើអនុសញ្ញាក្រុងហ្សឺណែវឆ្នាំ១៩៤៩ និងអំពើមនុស្សឃាត អំពើទារុណកម្ម និងការធ្វើទុក្ខបុកម្នេញខាងសាសនា ដូចមានចែងក្នុងក្រមព្រហ្មទណ្ឌកម្ពុជាឆ្នាំ១៩៥៦។សហចៅក្រមស៊ើបអង្កេតបានចេញដីកាដំណោះស្រាយ ដោយមានការចោទប្រកាន់បឋមទៅលើជនជាប់ចោទនៅថ្ងៃទី១៥ ខែកញ្ញា ឆ្នាំ២០១០។ ជនជាប់ចោទទាំងបួនរូបបានដាក់បណ្តឹងឧទ្ធរណ៍ប្រឆាំងនឹងដីកាដំណោះស្រាយ ទៅអង្គបុរេជំនុំជម្រះ។អង្គបុរេជំនុំជម្រះបានបដិសេធបណ្តឹងឧទ្ធរណ៍របស់ ខៀវ សំផន ហើយទទួលយកផ្នែកខ្លះនៃបណ្តឹងឧទ្ធរណ៍របស់ អៀង សារី, អៀង ធីរិទ្ធ, និង នួន ជា។ នៅត្រង់ផ្នែកដែលអាចទទួលយកបាន អង្គបុរេជំនុំជម្រះបានបដិសេធមូលដ្ឋាននៃបណ្តឹងឧទ្ធរណ៍ ដោយត្រូវធ្វើការកែប្រែចំនួនពីរចំណុច។ ចំណុចទីមួយ អង្គបុរេជំនុំជម្រះបានបង្គាប់ឲ្យមានការកែប្រែដីកាដំណោះស្រាយ ដោយមានការបញ្ជាក់ច្បាស់លាស់អំពីលក្ខខណ្ឌតម្រូវឲ្យមានអត្ថិភាពនៃទំនាក់ទំនង រវាងអំពើជាមូលដ្ឋាននៃឧក្រិដ្ឋកម្មប្រឆាំងនឹងមនុស្សជាតិ និងជម្លោះប្រដាប់អាវុធ។ ចំណុចទីពីរ អង្គបុរេជំនុំជម្រះក៏បានយល់ឃើញថាអំពើរំលោភសេពសន្ថវៈពុំទាន់មានអត្ថិភាពថាជាឧក្រិដ្ឋកម្មប្រឆាំងនឹងមនុស្សជាតិក្នុងរយៈកាលពីឆ្នាំ១៩៧៥ ដល់ឆ្នាំ១៩៧៩ នោះទេ ប៉ុន្តែអំពើរំលោភសេពសន្ថវៈអាចត្រូវបានចាត់ទុកថាជា “អំពើអមនុស្សធម៌ដទៃទៀត” ក្នុងនិយមន័យច្បាប់នៃឧក្រិដ្ឋកម្មប្រឆាំងនឹងមនុស្សជាតិ។ ដីកាដំណោះស្រាយត្រូវបានកែប្រែត្រង់ចំណុចទាំងពីរនេះ។ អង្គបុរេជំនុំជម្រះនឹងចេញសាលដីកាដោយមានសំអាងហេតុលើបណ្តឹងឧទ្ធរណ៍ នៅពេលក្រោយ។សូមទាញយកជាលក្ខណៈ PDF
អង្គជំនុំជម្រះសាលាដំបូងនឹងបើកសវនាការជាសាធារណៈចំនួនពីរ នៅថ្ងៃទី៣១ ខែមករា ឆ្នាំ២០១១
អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងបើកសវនាការ ជាសាធារណៈចំនួនពីរនៅថ្ងៃទី៣១ ខែមករា ឆ្នាំ២០១១ តាមកាលវិភាគដូចខាងក្រោម៖
សមាជិកក្រុមប្រឹក្សាឃុំទូទាំងប្រទេសកម្ពុជាជួបផ្លាស់ប្តូរយោបល់ជាមួយមន្ត្រីនៃសាលាក្តីខ្មែរក្រហម
សមាជិកក្រុមប្រឹក្សាឃុំជិត ២០០នាក់ មកពី២៤ខេត្តក្រុងទូទាំងព្រះរាជាណាចក្រកម្ពុជា បានជួបផ្ទាល់និងផ្លាស់ប្តូរយោបល់ជាមួយមន្ត្រីជាន់ខ្ពស់នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី២៨ ខែមករា ឆ្នាំ២០១១ នៅក្នុងជំនួយមួយដែលមានរយៈពេលជាងពីរម៉ោង។
គម្រោងថវិកាថ្មីរបស់អង្គជំនុំជម្រះវិសាមញ្ញក្នុងតុលាការកម្ពុជាសម្រាប់ឆ្នាំ២០១០-២០១១
គម្រោងថវិកាថ្មីរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សម្រាប់ឆ្នាំ២០១០ និង ២០១១ ត្រូវបានប្រកាស ហើយពេលនេះអាចមើលឃើញនៅលើគេហទំព័ររបស់ អ.វ.ត.ក។
កិច្ចប្រជុំពេញអង្គលើកទី ៩ របស់ អ.វ.ត.ក បានបញ្ចប់
កិច្ចប្រជុំពេញអង្គលើកទី ៩ របស់ អ.វ.ត.ក បានបញ្ចប់នាថ្ងៃនេះ បន្ទាប់ពីបានជួបប្រជុំចាប់ពីថ្ងៃទី ២១ ដល់ថ្ងៃទី ២៣ ខែកុម្ភៈ ឆ្នាំ២០១១។ កិច្ចប្រជុំពេញអង្គនេះបានពិចារណាទៅលើសំណើសុំធ្វើវិសោធនកម្មវិធានផ្ទៃក្នុង ដើម្បីលើកស្ទួយដល់ការរៀបចំចាត់ចែងសវនាការឲ្យមានប្រសិទ្ធភាព និងធ្វើឲ្យកិច្ចដំណើរការនិតិវិធីជំនុំជម្រះកាន់តែឆាប់រហ័សជាងមុន។
សេចក្តីអញ្ជើញចូលរួមសវនាការសាធារណៈលើបណ្តឹងសាទុក្ខក្នុងសំណុំរឿងក្តីរបស់ ឌុច ពីថ្ងៃទី ២៨ ដល់ថ្ងៃទី ៣០ ខែមីនា ឆ្នាំ២០១១
អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) មានកិត្តយសសូមគោរពអញ្ជើញសាធារណជន មន្រ្តីការទូត និងតំណាងសារព័ត៌មានជាតិនិងអន្តរជាតិ ចូលរួមសវនាការសាធារណៈលើបណ្តឹងសាទុក្ខ ក្នុងសំណុំរឿង០០១ ប្រឆាំងនឹង កាំង ហ្កេកអ៊ាវ ហៅ ឌុច ដែលត្រូវចោទប្រកាន់ពាក់ព័ន្ធនឹងឧក្រិដ្ឋកម្ម ដែលកើតឡើងនៅមន្ទីរ ស-២១ (ទួលស្លែង) និងនៅទីកន្លែងផ្សេងទៀតដែលទាក់ទងគ្នា។