តំណាងក្រសួងមន្ទីរក្នុងជួររដ្ឋាភិបាលចំនួន ៤១ ព្រមទាំងតំណាងកងកម្លាំងប្រដាប់អាវុធ សាកលវិទ្យាល័យ បណ្ណាល័យ វិទ្យាស្ថានអប់រំ និងនិស្សិត ចំនួនជាង ៤០០នាក់ បានចូលរួមក្នុងពិធីចែកសៀវភៅសាលដីកាស្ថាពរក្នុងសំណុំរឿង ០០១ ដែលប្រព្រឹត្តទៅនៅថ្ងៃទី១១ ខែកក្កដា ឆ្នាំ២០១២ នៅសាលសវនាការនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ អញ្ជើញជាអធិបតីក្នុងពិធីនេះគឺឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទីនៃ អ.វ.ត.ក ដែលបានផ្តល់បទឧទ្ទេសនាមអំពីដំណើរការនិងការវិវត្តរបស់ អ.វ.ត.ក។ ក្រៅពីនេះ អ្នកចូលរួមក៏មានឧិកាសសួរសំណួរផងដែរ។