អង្គជំនុំជម្រះតុលាការកំពូល
ឯកឧត្តម គង់ ស្រ៊ីម (កម្ពុជា)
ឯកឧត្តម គង់ ស្រ៊ីម ត្រូវបានតែងតាំងជាប្រធានអង្គជំនុំជម្រះតុលាការកំពូល និងជាចៅក្រមជាតិប្រចាំការនៅ អ.វ.ត.ក ដោយព្រះរាជក្រឹត្យចុះថ្ងៃទី៧ ខែឧសភា ឆ្នាំ២០០៦។ មុនពេលចូលកាន់ទទួលតួនាទីនេះ ឯកឧត្តមធ្លាប់មានតួនាទីជាច្រើនដូចជាៈ អនុប្រធានតុលាការកំពូលនៃព្រះរាជាណាចក្រកម្ពុជា អគ្គព្រះរាជអាជ្ញារងនៃការិយាល័យអគ្គព្រះរាជអាជ្ញាអមសាលាឧទ្ធរណ៍ និងអនុប្រធានការិយាល័យអយ្យការនៃនាយកដ្ឋានកិច្ចការព្រហ្មទណ្ឌនិងស៊ីវិលនៃក្រសួងយុត្តិធម៌ និងជាមន្រ្តីក្រសួងយុត្តិធម៌។ ឯកឧត្តមក៏ជាសាស្រ្តាចារ្យច្បាប់នៅសាកលវិទ្យាល័យនានាក្នុងទីក្រុងភ្នំពេញផងដែរ។ គាត់បានទទួលបរិញ្ញាប័ត្រច្បាប់ពីមហាវិទ្យាល័យច្បាប់នៃសាកលវិទ្យាល័យទីក្រុងហូជីមីញ ប្រទេសវៀតណាម។
លោកចៅក្រម ម៉ូតូ ណូហ្គូឈី (Motoo Noguchi) (ជប៉ុន)
លោក ម៉ូតូ ណូហ្គូឈី មានបទពិសោធន៍វិជ្ជាជីវៈជាអ្នកច្បាប់ជាង ២៥ ឆ្នាំ។ លោកធ្លាប់ជាព្រះរាជអាជ្ញានៅប្រទេសជប៉ុន សាស្រ្តាចារ្យនៅវិទ្យាស្ថានស្រាវជ្រាវនិងបណ្តុះបណ្តាលនៃក្រសួងយុត្តិធម៌ មេធាវីប្រចាំនៅធនាគារអភិវឌ្ឍន៍អាស៊ី សាស្រ្តាចារ្យនៅវិទ្យាស្ថានអង្គការសហប្រជាជាតិនៅអាស៊ីនិងចុងបូព៌ាសម្រាប់ទប់ស្កាត់ឧក្រិដ្ឋកម្មនិងការប្រព្រឹត្តចំពោះចារី មេធាវីជាន់ខ្ពស់ប្រចាំការិយាល័យកិច្ចការច្បាប់អន្តរជាតិក្នុងក្រសួងការបរទេស សាស្រ្តាចារ្យជាន់ខ្ពស់បង្រៀននៅកម្មវិធីក្រោយឧត្តមសិក្សានៅសាកលវិទ្យាល័យតូក្យូ។ លោកបានទទួលបរិញ្ញាប័ត្រច្បាប់ពីសាកលវិទ្យាល័យតូក្យូនៅឆ្នាំ១៩៨៣។ លោកមានទំនាក់ទំនងជាមួយសាលាច្បាប់នៃសាកលវិទ្យាល័យវ៉ាស៊ីនតោនពីឆ្នាំ ១៩៩២-១៩៩៣ នៅតុលាការឧក្រិដ្ឋកម្មអន្តរជាតិនៅឆ្នាំ២០០៥ មជ្ឈមណ្ឌល ស្សែល (Schell) ផ្នែកសិទ្ធិមនុស្សអន្តរជាតិនៃសាលាច្បាប់ យែល (Yale) ពីឆ្នាំ២០០៦ ដល់ឆ្នាំ២០០៧។ លោកបាននិពន្ធនិងបង្រៀនច្បាប់ឧក្រិដ្ឋកម្មអន្តរជាតិជាច្រើននៅក្នុងប្រទេសជប៉ុននិងនៅបរទេស។
លោកស្រីចៅក្រម អាញ៉េស្កា ក្លូណូវីកកា មីឡាត (Agnieszka Klonowiecka-Milart) (ប៉ូឡូញ)
លោកស្រី អាញ៉េស្កា មីឡាត បានចាប់ផ្តើមវិជ្ជាជីវៈច្បាប់ដោយបានបង្រៀនច្បាប់និងនីតិវិធីព្រហ្មទណ្ឌ នៅសាកលវិទ្យាល័យច្បាប់ក្នុងក្រុង លូប្ល៊ីន (Lublin) ប្រទេសប៉ូឡូញ។ លោកស្រីចាប់ផ្តើមបម្រើការនៅក្នុងស្ថាប័នតុលាការនៅឆ្នាំ១៩៩១ ហើយចាប់ពីពេលនោះមក លោកស្រីត្រូវបានជ្រើសតាំងជាច្រើនដងឲ្យធ្វើការនៅនាយកដ្ឋានសហប្រតិបត្តិការអន្តរជាតិនិងច្បាប់អឺរ៉ុបនៃក្រសួងយុត្តិធម៌ប៉ូឡូញ។ នៅក្នុងនាយកដ្ឋាននេះ លោកស្រីបានជួយធ្វើវិសោធនកម្មច្បាប់ និងកែទម្រង់ច្បាប់ឲ្យស្របគ្នានឹងបទដ្ឋានអន្តរជាតិ។ចាប់ពីឆ្នាំ១៩៩៨ លោកស្រីបម្រើការនៅផ្នែកកំណែទម្រង់ច្បាប់និងតុលាការនៅក្នុងប្រទេសជាច្រើនដែលកំពុងស្ថិតក្នុងដំណាក់កាលអន្តរកាល រួមមានប្រទេសបូស្នៀ កូសូវ៉ូ និងអាហ្កានីស្ថាន។ ចន្លោះឆ្នាំ២០០០-២០០៧ លោកស្រីមានតួនាទីជាចៅក្រមអន្តរជាតិថ្នាក់កំពូលនៅក្នុងបេសកកម្មរដ្ឋបាលបណ្តោះអាសន្នរបស់អង្គការសហប្រជាជាតិនៅកូសូវ៉ូ។ នៅក្នុងបេសកកម្មនេះ លោកស្រីបានបំពេញការងារជាមួយនឹងសមាជិកផ្សេងៗទៀតក្នុងតុលាការជាតិដើម្បីវិនិច្ឆ័យទៅលើឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងនឹងមនុស្សជាតិ អំពើភេរវកម្ម និងឧក្រិដ្ឋកម្មធ្ងន់ធ្ងរជាច្រើនទៀត។
លោកចៅក្រម ចាន់ដ្រា នីហាល ចាយ៉ាស៊ីងហេ (Chandra Nihal Jayasinghe) (ស្រីលង្កា)
លោក ចាន់ដ្រា នីហាល ចាយ៉ាស៊ីងហេ ជាអតីតឧត្តមស្នងការស្រីលង្កាប្រចាំចក្រភពអង់គ្លេស និងជាអគ្គរដ្ឋទូតប្រចាំសាធារណរដ្ឋអៀរឡង់។ លោកធ្លាប់បម្រើការជាចៅក្រមជាន់ខ្ពស់ និងពេលខ្លះជាប្រធានចៅក្រមស្តីទីនៅក្នុងតុលាការកំពូលស្រីលង្កា។ លោកក៏ធ្លាប់ជាប្រធានសាលាឧទ្ធរណ៍ស្រីលង្កាផងដែរ។ លោកបានបម្រើការជាមេធាវីជាន់ខ្ពស់នៅនាយកដ្ឋានអគ្គរដ្ឋអាជ្ញាអស់រយៈពេល២២ឆ្នាំ ក្រោយមកនៅឆ្នាំ១៩៩៤ លោកបានក្លាយជាអគ្គទីប្រឹក្សារងផ្នែកច្បាប់ ហើយការងាររបស់លោកភាគច្រើនទាក់ទងនឹងឧក្រិដ្ឋកម្ម ។ លោក ចាយ៉ាស៊ីងហេ បានទទួលសញ្ញាប័ត្របរិញ្ញាប័ត្រច្បាប់ពីសាកលវិទ្យាល័យកូឡុំបូ និងសញ្ញាប័ត្រសិទ្ធិមនុស្សពីសាកលវិទ្យាល័យ លុន (Lund) នៃប្រទេសស៊ុយអែដ។ លោកក៏ធ្លាប់ជាសាស្រ្តាចារ្យទស្សនកិច្ចនៅសាកលវិទ្យាល័យ អ៊ីលីណយ ក្នុងរដ្ឋឈីខាហ្គោ។
លោកចៅក្រម សោម សិរិវឌ្ឍ (កម្ពុជា)
លោក សោម សិរិវឌ្ឍ មានបទពិសោធន៍ជំនាញតុលាការរយៈ ពេល២២ឆ្នាំ។ លោកបម្រើការជាចៅក្រមក្នុងតុលាការកំពូលតាំងពីឆ្នាំ១៩៨៨មក។ ពីឆ្នាំ១៩៧៩ -១៩៨៦ លោកជាប្រធានស្តីទីនៃខុទ្ទកាល័យក្រសួងមហាផ្ទៃ ហើយពីឆ្នាំ១៩៨៦-១៩៨៨ លោកគឺជាមន្រ្តីនៅតុលាការកំពូល។ លោកធ្លាប់បានចូលរួមក្នុងសិក្ខាសាលាជាច្រើននៅប្រទេសជប៉ុន ប្រទេសស្វ៊ីស និងទីក្រុងប៉ារីស។ លោកធ្វើជាគ្រូឧទ្ទេសនាមនៅរាជបណ្ឌិតសភាវិជ្ជាជីវៈតុលាការ។ នៅឆ្នាំ២០០៥ លោកបានក្លាយជាសមាជិកក្រុមរៀបចំសេចក្តីព្រាងក្រមរដ្ឋប្បវេណីនិងក្រមនីតិវិធីរដ្ឋប្បវេណីសម្រាប់ប្រទេសកម្ពុជា។
បណ្ឌិត ស៊ីន រិទ្ធ (កម្ពុជា)
បណ្ឌិត ស៊ីន រិទ្ធ គឺជាអគ្គព្រះរាជអាជ្ញារងនៃការិយាល័យអគ្គព្រះរាជអាជ្ញាអមសាលាឧទ្ធរណ៍។ លោកបានសិក្សាច្បាប់អស់រយៈពេល ១០ ឆ្នាំ នៅសាធារណរដ្ឋ កាហ្សាក់ស្ថាន និងបានទទួលសញ្ញាប័ត្របណ្ឌិតច្បាប់ពីសាកលវិទ្យាល័យជាតិ កាហ្សាក់ស្ថាន នៅឆ្នាំ១៩៩៧។ លោកត្រូវបានតែងតាំងជាព្រះរាជអាជ្ញារងនៅតុលាការខេត្តបាត់ដំបងនៅឆ្នាំ២០០១ ហើយនៅឆ្នាំ២០០៥ លោកត្រូវបានតែងតាំងជាព្រះរាជអាជ្ញានាំមុខសម្រាប់តុលាការកំពូល។ លោកធ្លាប់ជាសមាជិកក្រុមរៀបចំសេចក្តីព្រាងក្រមរដ្ឋប្បវេណី និងក្រមនីតិវិធីរដ្ឋប្បវេណីសម្រាប់ប្រទេសកម្ពុជា។ លោកជាសាស្រ្តាចារ្យច្បាប់ព្រហ្មទណ្ឌអន្តរជាតិនៅរាជបណ្ឌិតសភាវិជ្ជាជីវៈតុលាការ និងសាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច។
បណ្ឌិត យ៉ា ណារិន (កម្ពុជា)
បណ្ឌិត យ៉ា ណារិន ជាប្រធានតុលាការខេត្តមណ្ឌលគិរី។ លោកចាប់ផ្តើមបម្រើការនៅការិយាល័យតុលាការដំបូងនៅឆ្នាំ២០០១ និងទទួលបានការតែងតាំងជាចៅក្រមនៅតុលាការខេត្តរតនគិរីនៅឆ្នាំ២០០២ ហើយនៅឆ្នាំ២០០៥ បានក្លាយជាប្រធានតុលាការខេត្តនេះ។ មុននឹងទទួលតួនាទីខាងលើនេះ លោកជាមន្រ្តីនៅលេខាធិការដ្ឋាននៃក្រុមប្រឹក្សាអ្នកច្បាប់នៅទីស្តីការគណៈរដ្ឋមន្រ្តី ទទួលខុសត្រូវសិក្សាសេចក្តីព្រាងច្បាប់និងលិខិតបទដ្ឋានដែលស្នើឡើងដោយក្រសួងនានា។ លោកបានសិក្សាច្បាប់នៅសាកលវិទ្យាល័យរដ្ឋកាហ្សាក់ (Kazakh) និងទទួលសញ្ញាប័ត្របណ្ឌិតឯកទេសឧក្រិដ្ឋវិទ្យា ពីវិទ្យាស្ថានរដ្ឋនិងច្បាប់នៃប្រទេសកាហ្សាក់ស្ថាន នៅឆ្នាំ១៩៩៨។
ចៅក្រមបម្រុងនៅអង្គជំនុំជម្រះតុលាការកំពូល៖
លោក ម៉ុង មុន្នីចរិយា (កម្ពុជា)
លោក ម៉ុង មុន្នីចរិយា ជាប្រធានចៅក្រមនៅសាលាដំបូងខេត្តព្រះសីហនុចាប់ពីឆ្នាំ២០០៩។ នៅឆ្នាំ១៩៩៦ លោកជាចៅក្រមសាលាដំបូងរាជធានីភ្នំពេញ ហើយនៅឆ្នាំ២០០២ លោកត្រូវបានតែងតាំងជាចៅក្រមតុលាការកំពូល។ ក្នុងអំឡុងពេល១០ឆ្នាំចុងក្រោយនេះ លោកជាសមាជិកក្រុមកម្ពុជាទទួលខុសត្រូវធ្វើសេចក្តីព្រាងក្រមរដ្ឋប្បវេណីនិងក្រមនិតីវិធីរដ្ឋប្បវេណី ហើយចាប់ពីឆ្នាំ២០០៤ លោកគឺជាសាស្រ្តាចារ្យនៅសាលាភូមិន្ទចៅក្រម និងមជ្ឈមណ្ឌលបណ្តុះបណ្តាលវិជ្ជាជីវៈមេធាវី។ លោកទទួលបានសញ្ញាប័ត្រអនុបណ្ឌិតច្បាប់ពីសាកលវិទ្យាល័យជាតិកាហ្សាក់ស្ថាននៅឆ្នាំ១៩៩៣ និងជានិស្សិតស្រាវជ្រាវថ្នាក់បណ្ឌិតនៅសាកលវិទ្យាល័យបៀលប្រាយ។ នៅឆ្នាំ១៩៩៥ លោកបានទទួលសញ្ញាប័ត្រវិជ្ជាជីវៈចៅក្រម។ លោកក៏ធ្លាប់ចូលរួមវគ្គបណ្តុះបណ្តាលស្តីអំពីតុលាការឧក្រិដ្ឋកម្មអន្តរជាតិ ដែលរៀបចំឡើងដោយទីស្តីការគណៈរដ្ឋមន្រ្តី សហប្រតិបត្តិការជាមួយមជ្ឈមណ្ឌលសម្រាប់ស្តារយុត្តិធម៌នៅអាស៊ី និងវគ្គបណ្តុះបណ្តាលរបស់កម្មវិធីអភិវឌ្ឍន៍របស់អង្គការសហប្រជាជាតិ (UNDP) នៅសាលាភូមិន្ទចៅក្រមនិងព្រះរាជអាជ្ញា។
លោកស្រីចៅក្រម ហ្វ្លូរេន មុមបា (Florence Ndepele Mwachande Mumba) (ហ្សំបៀ)
លោកស្រី មុមបា បម្រើការជាចៅក្រមនៅតុលាការកំពូលនៃប្រទេសហ្សំបៀតាំងពីឆ្នាំ១៩៩៧។ លោកស្រីជាចៅក្រមស្ត្រីទី១នៅតុលាការជាន់ខ្ពស់ (១៩០៨-១៩៨៨) និងជាប្រធានក្រុមស៊ើបអង្កេត (១៩៨៩-១៩៩៦)។ បច្ចុប្បន្នលោកស្រីជាប្រធានគណៈកម្មការ បោះឆ្នោតនៃប្រទេសហ្សំបៀ (២០០៨-២០១១)។ នៅក្នុងក្របខណ្ឌអន្តរជាតិ លោកស្រីបម្រើការនៅគណៈកម្មការស្ត្រីនៃអង្គការសហប្រជាជាតិ (១៩៩២-១៩៩៥) និងត្រូវបានបោះឆ្នោតជាចៅក្រមនៅតុលាការឧក្រិដ្ឋកម្មអន្តរជាតិសម្រាប់អតីតប្រទេសយូហ្គោស្លាវីនៅឆ្នាំ១៩៩៧ និងក្លាយជាអនុប្រធានតុលាការនេះពីឆ្នាំ ១៩៩៩-២០០១។ លោកស្រីក៏ធ្លាប់ជាចៅក្រមនៅសាលាឧទ្ធរណ៍នៃតុលាការឧក្រិដ្ឋកម្មអន្តរជាតិសម្រាប់អតីតប្រទេសយូហ្គោស្លាវី និងតុលាការឧក្រិដ្ឋកម្មអន្តរជាតិសម្រាប់ប្រទេសរ្វ៉ាន់ដា (២០០៣-២០០៥)។ ក្នុងនាមជាអ្នកច្បាប់ល្បីឈ្មោះនិងជាសកម្មជនសិទ្ធិស្ត្រី លោកស្រី មុមបា បានធ្វើដំណើរទៅទីកន្លែងជាច្រើនដើម្បីធ្វើបទបង្ហាញឯកសារស្រាវជ្រាវ និងបានការពារក្តីនីតិរដ្ឋក្នុងបញ្ហាអភិបាលកិច្ច។