សេចក្តី​ប្រកាស​ព័ត៌មាន​របស់​សហចៅក្រម​ស៊ើបអង្កេត​ជាតិ


នៅថ្ងៃនេះ សហ​ចៅក្រម​ស៊ើបអង្កេត​អន្តរជាតិ​បម្រុង លោក Laurent Kasper-Ansermet បាន​ចេញ​សេចក្តី​ប្រកាស​ព័ត៌មាន​មួយ​ដោយ​មិនមាន​ការ​ពិគ្រោះ​យោបល់​ជាមួយ​នឹង​សហចៅក្រម​ស៊ើបអង្កេត​ជាតិ។ អាស្រ័យ​ហេតុនេះ សហ​ចៅក្រម​ស៊ើបអង្កេត​ជាតិ​សូម​ជម្រាប​ដល់​មតិជាតិ​និង​អន្តរជាតិ​ឲ្យ​បាន​ជ្រាប​ថា៖

១. បន្ទាប់​ពី​សហ​ចៅក្រម​ស៊ើបអង្កេត​អន្តរជាតិ Siegfried Blunk បាន​លា​ឈប់​កាលពីថ្ងៃទី៩ ខែតុលា ឆ្នាំ ២០១១ រហូត​មក​ទល់​ពេលនេះ មិនទាន់​មាន​ការ​តែងតាំង​សហ​ចៅក្រម​ស៊ើបអង្កេត​អន្តរជាតិ​ថ្មី​ជា​ផ្លូវការ​មក​ជំនួស​នៅឡើយ​ទេ។

២. ទន្ទឹមនឹងនេះ នៅថ្ងៃទី ០៥ ខែធ្នូ ឆ្នាំ ២០១១ សហ​ចៅក្រម​ស៊ើបអង្កេត​ជាតិ​បាន​ជួប​សហ​ចៅក្រម​ស៊ើបអង្កេត​អន្តរជាតិ​បម្រុង លោក Laurent Kasper-Ansermet នៅ​ការិយាល័យ​សហ​ចៅក្រម​ស៊ើបអង្កេត ហើយ​បាន​ជម្រាប​លោក Laurent Kasper-Ansermet ថា ដើម្បី​ធានា​នូវ​ភាព​ត្រឹមត្រូវ​តាម​ផ្លូវច្បាប់ (ស្រប​តាម​គោលការណ៍​ដែល​មាន​ចែង​ក្នុង​វិធាន ៧.៤ នៃ​វិធាន​ផ្ទៃក្នុង មាត្រា២៦ និងមាត្រា ២៧ នៃ​ច្បាប់​ស្តីពី​ការបង្កើត អ.វ.ត.ក មាត្រា៣ និងមាត្រា៥.៦ នៃ​កិច្ច​ព្រមព្រៀង) ក៏​ដូច​ជា​ការ​អនុវត្ត​ជាមួយ​សហ​ចៅក្រម​ស៊ើបអង្កេត​អន្តរជាតិ​មុនៗ​កន្លងមក សហ​ចៅក្រម​ស៊ើបអង្កេត​អន្តរជាតិ​បម្រុង​ត្រូវតែ​រង់ចាំ​ទទួល​បាន​ការតែងតាំង​ជា​ផ្លូវការ​តាម​នីតិវិធី​ជា​ធរមាន​ជា​មុន​សិន មុន​នឹង​ចាប់ផ្តើម​ការងារ​របស់ខ្លួន។ ដូច្នេះ​ ចំណាត់ការ​នីតិវិធី​ផ្សេងៗ​របស់​សហចៅក្រម​ស៊ើប​អង្កេត​អន្តរជាតិ​បម្រុង លោក Laurent Kasper-Ansermet មិនមាន​សុពលភាព​តាម​ផ្លូវ​ច្បាប់​ឡើយ។